28 ماۋسىمدا استانا قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى ءباا-دەگى ەلشىلىكتىڭ بۇرىنعى كەڭەسشىسى ساكەن ماماشقا قاتىستى دەنساۋلىققا قاساقانا جەڭىل زيان كەلتىرۋ فاكتىسى بويىنشا ءىستى قارادى، دەپ حابارلايدى “ادىرنا” ۇلتتىق پورتالى.
ءىستىڭ ءمان-جايلارى بويىنشا ەلشى كەڭەسشىسى جانجال بارىسىندا جۇبايىنا قاتىستى فيزيكالىق كۇش قولدانعان.
"سوت وتىرىسى بارىسىندا م. جانە ونىڭ ادۆوكاتى اكىمشىلىك قۇقىق بۇزۋشىلىق تۋرالى حاتتامامەن كەلىسپەي، ونىڭ كىناسى ءىس ماتەريالدارىمەن دالەلدەنبەگەنىن كورسەتتى، سونداي-اق قۇقىق بۇزۋشىلىق جاسالعان ورىن قر يۋريسديكتسياسىنا جاتپايتىنىن، ودان بولەك م-نىڭ ارەكەتتەرى قىلمىستىق سوت ءىسىن جۇرگىزۋ شەڭبەرىندە جەكە تەرگەۋ جۇرگىزىلىپ جاتقان ءوزىنىڭ جانە ونىڭ جۇبايىنىڭ اراسىنداعى وتباسىلىق-تۇرمىستىق ءىس-ارەكەتتەرگە جاتاتىنىن كورسەتتى", دەلىنگەن سوت حابارلاماسىندا.
سوت قاۋلىسىمەن سوتتالۋشى اقبتك-ءنىڭ 73-1-بابى بويىنشا قۇقىق بۇزۋشىلىق جاساعانى ءۇشىن كىنالى دەپ تانىلىپ، 15 تاۋلىك مەرزىمگە اكىمشىلىك قاماۋعا الىندى.
قاۋلى زاڭدى كۇشىنە ەنگەن جوق.
ايتا كەتەيىك، ءباا-دەگى قازاقستان ەلشىلىگىندە كەڭەسشىسى بولىپ ىستەيتىن ساكەن ماماشتىڭ ايەلى كارينا ماماش كۇيەۋىنەن كوپ جىلدار بويى قورلىق كورىپ كەلگەنىن ايتىپ، پوليتسياعا ارىزدانعان. ديپلومات ايەلىنىڭ ارىزىنان سوڭ ەلگە شاقىرتىلىپ، قىزمەتىنەن بوساتىلدى.
