ەلىمىزدە 17 مامىردان باستاپ بەنزين مەن ديزەل شەكتى مولشەردە ساتىلادى. بۇل كۇن پرەزيدەنت قاسىم-جومارت توقاەۆتىڭ تۋعان كۇنىمەن تۇسپا-تۇس كەلىپ وتىر، دەپ حابارلايدى «ادىرنا» ءتىلشىسى kolesa.kz-كە سىلتەمە جاساپ.
اي-92 ماركالى بەنزين مەن ديزەل بىلتىر كوكتەمدە ۇكىمەت بەلگىلەگەن باعاعا ساتىلا بەرەدى. الايدا قازاقستاندىقتار جەڭىل كولىككە تاۋلىگىنە — 100 ليتر، اۆتوبۋس پەن جۇك كولىگىنە 300 ليتر عانا جانارماي قۇيا الادى.
ال شەتەلدىك جۇرگىزۋشىلەر ءۇشىن بەنزين قىمباتتاپ، ديزەل، كەرىسىنشە، 450 تەڭگەدەن 315 تەڭگەگە ارزاندايدى.
«باعانى مەملەكەتتىك رەتتەۋ بەلگىلەنگەن جانارماي قۇيۋ بەكەتتەرىندە مۇناي ونىمدەرىن بولشەك ساتۋدىڭ شەكتى باعاسىن بەلگىلەۋ تۋرالى» بۇيرىققا وزگەرىس ەنگىزۋ قۇجاتىنا قر ەنەرگەتيكا ءمينيسترى الماسادام ساتقاليەۆ قول قويدى. قۇجات 2024 جىلى 6 مامىردا جاريالاندى، ون كۇننەن كەيىن كۇشىنە ەنەدى.
17 مامىردان باستاپ ەلدەگى بارلىق جانارماي قۇيۋ بەكەتىندە وتىن قۇنى مىناداي بولادى:
اي-80 بەنزينى — ءليترى 89 تەڭگە.
اي-92 جانە اي-93 — ءليترى 245 تەڭگە.
قازاقستاندا بەرىلگەن جۇرگىزۋشى كۋالىگى بولسا، تاۋلىگىنە 100 ليترگە دەيىن — ءليترى 205 تەڭگە. قازاقستاندا بەرىلگەن جۇرگىزۋشى كۋالىگى مەن كولىك قۇرالىن تىركەۋ كۋالىگى بولسا، موتوتسيكل، جەڭىل اۆتوموبيل، جۇك كولىگى، ارنايى اۆتوموبيل جانە اۆتوبۋسقا تاۋلىگىنە 300 ليترگە دەيىن — ءليترى 205 تەڭگە.
ديزەل (جازعى، ماۋسىمارالىق) — ءليترى 315 تەڭگە. قازاقستاندا بەرىلگەن جۇرگىزۋشى كۋالىگى بولسا، تاۋلىگىنە 100 ليترگە دەيىن — ليترىنە 295 تەڭگە. قازاقستاندا بەرىلگەن جۇرگىزۋشى كۋالىگى مەن كولىك قۇرالىن تىركەۋ كۋالىگى بولسا، جۇك كولىگى، ارنايى اۆتوموبيل جانە اۆتوبۋسقا تاۋلىگىنە 300 ليترگە دەيىن — ءليترى 295 تەڭگە.
قازاقستان بيلىگى ليميت بەلگىلەۋ ارقىلى وتىننىڭ رەسەيگە جانارماي باگى ارقىلى اعىلۋىن تەجەۋگە تىرىسىپ وتىر.
ەسكە سالايىق، بۇعان دەيىن قازاقستان ۇكىمەتى قاجەت بولعان جاعدايدا رەسەيگە جانار-جاعارماي جەتكىزەتىنىن مالىمدەگەن ەدى.
«ۇكىمەت دەڭگەيىندە قاجەت بولعان جاعدايدا رەسەيلىك تاراپپەن جانار-جاعارماي جەتكىزۋ تۋرالى كەلىسىمدەر بار ەكەنى ايتىلدى»، - دەپ جازدى پرەمەر-ءمينيستردىڭ ءباسپاسوز قىزمەتى.
