ءماجىلىس وتىرىسىندا قازاقستان حالىق پارتياسى اتىنان سايلانعان دەپۋتات گاۋھار تاناشەۆا ءتورت بالا تاريبەلەپ وتىرعان ايەلدەردىڭ زەينەت جاسىن تومەندەتۋ قاجەتتىگىن ايتتى. مەجە - 53 جاس، دەپ حابارلايدى "ادىرنا" ۇلتتىق پورتالى.
دەپۋتات گاۋھار تاناشەۆا ءوزىنىڭ دەپۋتاتتتىق ساۋالىن پرەمەر-ءمينيستردىڭ ورىنباسارى التاي كولگىنوۆكە جولداپ، ءتورت نەمەسە ودان دا كوپ بالاسى بار انالارعا قاتىستى ماڭىزدى ماسەلەنى كوتەردى.
ء"تورت بالا تاريبەلەپ وتىرعان كوپبالالى ايەلدەردىڭ زەينەتكەرلىك جاسىن 53 جاسقا دەيىن تومەندەتۋ كەرەك. قازىرگى زاڭناماعا سايكەس بەس نەمەسە ودان دا كوپ بالا تۋىپ، اسىراپ العان جانە ولاردى 8 جاسقا دەيىن تاربيەلەگەن كوپبالالى انالار عانا 53 جاسقا دەيىن زەينەتكە شىعادى. سونداي-اق بالانىڭ 8 جاسقا دەيىن تاربيەلەۋ مىندەتتەمەسىن الىپ تاستاۋ ماسەلەسىن قاراستىرۋلارىڭىزدى سۇرايمىز", – دەدى گاۋھار تاناشەۆا.
سونىمەن قاتار، ءماجىلىس مىنبەرىندە ءسوز العان دەپۋتات كوپبالالى وتباسىلارعا بەرىلەتىن جاردەماقى جايىن ءسوز ەتتى. ونى كىشى پەرزەنتى كامەلەت جاسقا تولعانعا دەيىن بەرۋدى ۇسىندى.
"قازىرگى تاڭدا كوپبالالى وتباسىنىڭ ءتورت بالانىڭ ىشىندەگى ۇلكەن بالاسى 18 جاسقا تولعان كەزدە، ول وتباسى كوپبالالى دەگەن مارتەبەسىنەن ايىرىلادى. ءتورت جانە ودان دا كوپ بالاسى بار اتا-انالارعا بالالارىنىڭ جاسىنا قاراماستان كوپبالالىلارعا بەرىلەتىن جاردەماقىنى كىشى بالانىڭ كامەلەتكە تولعانعا دەيىن بەرۋدى قاراستىرۋدى ۇسىنامىز", – دەيدى دەپۋتات.
دەپۋتاتتىڭ ايتۋىنشا، كوپبالالى وتباسىلار - ۇلتتىق قاۋىپسىزدىك پەن ۇلتتىق ەكونوميكانىڭ نەگىزى. ولارعا ەرەكشە كوڭىل ءبولۋ مەن كوپبالالى انا مارتەبەسىن بەكىتۋ - باستى مىندەتتەردىڭ ءبىرى. سونىمەن قاتار، دەپۋتات حالىق سانىن كوبەيسە، مەملەكەتتىك ءتىلدىڭ تارالۋ جانە دامۋ مۇمكىندىگىنىڭ دە ارتاتىنىن ەسكە سالدى.
"ادىرنا" ۇلتتىق پورتالى
