جۇرەگىمنىڭ يەسى... ء(ۇش كورىنىستى دراما)

6583
Adyrna.kz Telegram

فابۋلاسى: بۇگىندە  قىزمەت قۋىپ ءجۇرىپ وتباسىن قۇرۋدى كەيىنگە قالدىرىپ، قاشان كارى قىز اتانىپ قالعانىن بىلمەي قالعان قازاقتىڭ قىزدارى كوبەيىپ بارادى.  مۇنداعى پەسادا 35 جاسقا كەلىپ وتىرىپ قالعان داريعانىڭ وقيعاسى كەش، ءتۇس، تاڭەرتەڭ بولىپ، ونىڭ 35-30-23 جاستارى ءبىر كۇن ىشىندە سۋرەتتەلەدى. داريعا قيالدان جاساپ العان ءمىنسىز حانزاداسىن كۇتىپ ءجۇرىپ-اق ءوزىنىڭ بۇل حالگە قالاي تۇسكەنىن اڭعارماي قالادى. پەسادا وعان كەرەعار كەيىپكەر رەتىندە كۇيەۋگە شىعىپ، ءساتتى وتباسىن قۇرىپ وتىرعان ءسىڭىلىسى جانسايانىڭ كومەگى ارقىلى كارى قىزداردىڭ پسيحولوگياسى اشىلادى.

 قاتىسۋشىلار:

داريعا – تۇرمىس قۇرماعان. تانىمال  قوناق ءۇيدىڭ باسقارۋشىسى.  35 جاستا.

جانسايا –تۇرمىس قۇرعان. داريعانىڭ ءسىڭىلىسى. 28 جاستا.

 

وقيعا كەش، ءتۇس، تاڭەرتەڭ بولىپ كەرى قاراي وتەدى. كەيىپكەردىڭ ءبىر كۇندىك ءومىرى بەينەلەنگەنمەن، 12 جىلدىق ءومىرى قامتىلادى.

ءبىرىنشى كورىنىس

 كەش

 قالالىق پاتەر. قوناق بولمەسى. ەلەكتر جارىعى جانىپ تۇر. سورە تولى كىتاپتار. جيناقى ديۆان مەن كرەسلو تۇر. بۇرىشتا ۇلكەن اينا ورنالاسقان. ورتادا 3-4 ادامعا جايىلعان سالتاناتتى داستارحان. جانسايا ىدىس-اياق تاسىپ ءجۇر.

سىرتتان كوستيۋم-شالبار كيگەن داريعا كىردى. قولىندا نوۋتبۋگى، ءسان جۋرنالدارى بار. زاتتارىن قويىپ، سىرتقى كيىمىن شەشىندى. ءتۇرى شارشاڭقى.

 جانسايا:  تۇساۋكەسەرىڭ قالاي ءوتتى؟ قارنىڭ اشىپ قالعان جوق پا؟

داريعا: (كۇلىمسىرەدى) بالانىڭ تۇساۋىن كەسىپ كەلگەندەي سۇرادىڭ عوي.

جانسايا:  ەندى...

داريعا: اپكەڭ ەندى جاي عانا قوناق ءۇي قىزمەتكەرى ەمەس، ەليتالىق وتەلدىڭ باسقارۋشىسى بولىپ تاعايىندالدى!

جانسايا: قۇتتىقتايمىن، جانىم! سەن وعان ابدەن لايىقسىڭ...

جانسايا: تاڭعا دەيىن جازۋ جازامىن دەپ، دۇرىستاپ ۇيىقتامادىڭ دا. بايانداماڭ جاقسى شىقتى ما؟

داريعا: جاقسى شىقپاسا دا جاقسى شىعارامىن عوي. ۋفف، شارشادىم... داستارحاندى تۋرا مەن ايتقانداي جاسادىڭ با؟

داستارحاندى تەكسەرىپ ءجۇر.

جانسايا: يا، كىشكەنە مىنا جەرلەردى ءسۇرتىپ جىبەرسەم بولدى... ءبارى دايىن!

داريعا:  كيىمدەرىم ورىنىندا ما؟

 

كيىم اۋىستىرۋعا شىعىپ كەتەدى.

 جانسايا سورەلەردى ءسۇرتىپ جاتىپ ءىشى حاتقا تولى ۇلكەن حرۋستال قۇمىرانى سىندىرىپ الدى.

 داريعا شالا كيىنىپ جۇگىرىپ شىقتى. ساسقالاقتاپ قۇمىرا قالدىقتارىن جيناپ جاتقان جانسايانى اشۋلانىپ جۇلقىلادى.

 

 داريعا: نە ىستەدىڭ سەن، جانسايا؟!

جانسايا: كەش... كەشىرشى... مەن... مەن... مەن ادەيى ەمەس!.. بايقاماي...

داريعا: سكولكو راز گوۆوريلا؟!  جانسايا...

جانسايا: قاز... قازىر ءبارىن جيناپ...

داريعا: پوزدنو ۋجە!

 

داريعا ونى جۇلقىعان كۇيى جەرگە قاراي يتەرىپ جىبەردى.

 

داريعا: سەن... ونىڭ ومىرىمدەگى ورنىن بىلەسىڭ عوي؟.. نەگە تۇسىنبەيسىڭ، جانسايا؟ بۇل مەنىڭ بۇكىل الەمىم... ءبارى كوككە ۇشتى. جوق! ءبىر مەزەتتە... ونى قانشا ىزدەدىم. كۇتتىم... ەندى؟ نەگە بۇلاي؟ تەك مەن عانا...

 

داريعا ىزاعا بۋلىعىپ جىلادى.

 

داريعا: سەنەن قانشا رەت ءوتىندىم. ءتىپتى وسى قۇمىرانىڭ شاڭىن دا سۇرتپەشى، تيىسپەشى دەپ... نەگە ۇقپايسىڭ؟!

جانسايا: مەن... جاي... ونى ورنىنان قوزعاپ، استىن...

داريعا: جوعال! كوزىمە كورىنبە!!! ۋبيرايسيا! ۋحودي وتسيۋدا. نە حوچۋ تەبيا ۆيدەت. وستاۆ مەنيا!...

جانسايا: ...

 

جانسايا شىعىپ كەتتى.

داريعا بولمەدەگى زاتتاردى جان-جاققا لاقتىردى.

 

داريعا: قۇرىپ كەتىڭدەر ءبارىڭ!

 

جانسايا باسقا قۇمىرا الىپ شىقتى.

پاۋزا.

داريعا: جانسايا...

 

جانسايا: باستالدى... قازىر كەشىرىم سۇرايدى، جىلايدى. كۇندە وسى...

 

كەلىپ  جانسايانى  قۇشاقتادى.  

داريعا: كەشىرشى مەنى... كەشىرەسىڭ عوي يا...

 

داريعا ىزالانىپ جىلادى.

 

داريعا: تاعدىرىم نەگە وسىلاي جازىلدى ەكەن؟!. قاي قىلىعىما بەرىلدى؟ ءومىر بۋمەرانگ دەسەك، قاي جەردە شالىس باستىم؟؟؟

قازاق قىزىق حالىق... قىزدارىن ايالاپ، ماپەلەۋدەن الدىنا جان سالمايدى. تورگە وتىرعىزىپ قۇرمەتتەپ، ءسوزىن ەكى ەتپەيدى. ال، سول قىز 20-دان اسسا بولدى، تۇرمىسقا شىقپاعانى ءۇشىن قاۋىم بولىپ، ءتىپتى قوعام بولىپ قىسپاققا الادى، شەكتەتە باستايدى. ماڭدايعا جازىلعان تاعدىر ۇعىمىنان اتتاپ، ءبارى قىزدىڭ عانا قولىندا تۇرعانداي  كورەدى.

...اسپاندا ۇشقان قۇسقا ۇزاق قاراپ سۇيسىنەمىن. بىردە جوعارى، بىردە تومەن قالىقتاپ ۇشىپ بارا جاتقان ءساتىن ءجيى ەلەستەتەمىن. مەنى تۇسىنبەيتىن قوعامنىڭ كوگىندە ۇشقىم كەلەدى.  قالىقتاپ...

مەن وزگەردىم... مۇنداي ەمەس ەدىم. بۇرىندا تەز جىلاعىش كوڭىلشەك، الدەقايدا مەيىرىمدىلەۋ بولدىم. بىراق قوعامعا بۇل قاسيەتتىڭ ءبىر تيىنعا دا قاجەت ەمەس ەكەنىن ۇعىندىم. انىعىن ايتسام ۇعىندىردى! جانىمداعى ءالجۋاز ەركەكتەردى كورىپ، ولاردىڭ بويىنان ىزدەگەن قاسيەتتەردى ءوز ىشىمنەن ءوندىرىپ شىعارا باستادىم. بىرتە-بىرتە تۋا ءبىتتى قاسيەتىمدەي بولمىسىما ابدەن دەندەپ الدى. ال ول سۇمەلەكتەر، مەنەن ءالى قىزعا ءتان قىلىق كۇتەدى. بارىنە نامىسسىز، ۇساقتالعان، ەكىجۇزدى، ءالجۋاز ەركەكسىماقتار كىنالى!..

مەن سياقتى قىزداردا، ياعني جاس دەنە ىشىندە ءوز جانىن تاپتاپ، ەسەسىنە باسقانىڭ بولمىسىن قۇيىپ العان ادامدا  قانداي ىڭكار سەزىم بولۋى مۇمكىن؟ ەسسىز عاشىق بولا المايمىن. سەبەبى سەزىمىن اقىلعا جەڭدىرە بىلگەن ادامدا  ەسەپ باسىم بولادى. ول ازداي، قوعامنىڭ، ءتىپتى جاقىندارىمنىڭ سالعان جاراسىنان قورعانۋ ءۇشىن جانىمدى قالىڭ ساۋىت قورعاپ تۇر. ءتىپتى ماحابباتتى دا وتكىزبەيدى...

بىراق تابيعات ءوز دەگەنىن جاساماي قويمايدى ەكەن. تاڭعى شايدى جالعىز ءىشۋ... ءتىپتى كينوعا دا جالعىز بارۋ... تۇندە جالعىز جاتۋ... قانشا جەردەن شارشاپ تۇرساڭ دا كوزىڭە ۇيقى ىلىنگەنشە توسەكتە اۋناي-اۋناي كورپەگە وراتىلىپ قالاسىڭ سىرت كوزگە سىر بىلدىرمەگەنىممەن، ءىشىم الاي-دۇلەي، ارىپتەستەرىم ءۇشىن ارقاشان ءتورت قۇبىلاسى تەڭ اداممىن. شارشاپ كەتەم... ويلاشى ءوزىڭ،  ەڭىرەگەندە ەتەگى تولىپ وتىرعان ديرەكتور قاي قىزمەتكەرىنە قىزىق بولۋى مۇمكىن؟؟؟

 

داريعا ءبىراز تىنىشتالدى...

 

داريعا: جانسايا، ماعان رەنجىمەيسىڭ عوي يا؟! مەن مۇنداي ەمەس ەدىم. ءوزىم دە تۇسىنبەيمىن... وسىلاي تەز نارسەگە اشۋلاناتىن بولىپپىن. 35-كە كەلدىم مىنە... قارتايايىن دەگەنىم بە... كەشىرشى... سونشاما داستارحان جايىپ كۇتكەن دە كەلمەدى عوي. نەگە كەلمەدى ەكەن ا؟!. ىلعي وسىلاي سەبەپسىز جوعالىپ كەتەدى... كوزىمە كورىنبەيدى.

جانسايا: ول...

جانسايا وزىمەن-ءوزى كۇبىرلەدى.

جانسايا: وسىنىڭ كەلىپ بولمايتىن بولاشاق كۇيۋىنە داستارحان جايۋدان-اق شارشاپ ءبىتتىم. (داريعاعا قاراپ) ول...

داريعا: ايتپا! ول تۋرالى ەشكىمنىڭ اۋزىنان ەستىگىم كەلمەيدى. ول تەك مەنىكى. بولدى!

جانسايا: بىراق، داريعا...

داريعا: بۇگىن تىم كەش بولىپ كەتتى، قاسىما قونشى. كۇيەۋىڭە تەلەفونمەن ەسكەرت. بالاڭدى جاقسىلاپ قاراسىن، ءبىر كۇنگە ەشتەمە ەتپەس. قالا شەتىندەگى ۇيىڭە بۇگىن جەتپەيسىڭ. ەسەسىنە ەرتەڭ دەمال.

جانسايا: بىراق، كۇيەۋىم رەنجيدى عوي...

داريعا: رەنجىگىشىن! جۇرىڭدەر سول كۇيەۋلەرىڭنىڭ استى-ۇستىنە ءتۇسىپ، كوڭىلىن تاۋىپ! ەندەشە، مەنىڭ كولىگىمدى ايداپ كەت. بىراق  تاڭەرتەڭ ەرتە كەل!

جانسايا: قاراڭعىدا... جاقسى جۇرگىزە المايمىن... جارايدى، كۇيەۋىمە بارا المايتىنىمدى ايتىپ كورەيىن، رەنجىسە دە...

داريعا: ءوزىڭ ءبىل. مىنا جەردىڭ بارلىعىن تەز جيناپ، الىپ كەتشى.

 

جانسايا قۇمىرانى اۋىستىردى.

ەسىكتىڭ  قوڭىراۋى سوعىلدى.

داريعا ورنىنان اتىپ تۇردى.

داريعا: كەلدى مە؟

جانسايا: بۇل كىم بولدى ەكەن؟

داريعا: سەن اششى. تەز!

داريعا ءوزىن تەز رەتكە كەلتىرە باستادى.

 

جانسايا تەسىكتەن قارادى. داريعانى قولىن بۇلعاپ شاقىردى.

داريعا ەسىكتى اشتى. جەردە تۇرعان ءبىر قۇشاق گۇلدى ءماز بولىپ كوتەردى.

 

داريعا گۇلدەردى قۇشىرلانا ءبىر يىسكەدى دە قۇشاقتاعان كۇيى اينانىڭ الدىندا تەڭسەلىپ ءبىراز تۇردى. دالابىن الىپ ەرنىن بىرنەشە قايتارا ءبىر بويادى. شاشىنىنىڭ ارتىق جەرلەرىن تۇزەدى. گۇلدى الىپ، تەلەفونىنا بىرنەشە رەت  سەلفي جاساي باستادى.

جانسايا: وزىنە ءوزى جولداعان گۇلگە سونشا شاتتانعانى نەسى؟!

 

داريعا: كىشكەنە جىميا قالساڭ بولدى ءاجىم، ەلكي!

جانسايا: ءبىر قۇشاق گۇل ۇستاپ تۇرىپ، قاتايىپ تۇرعان قىزىق قوي. جىميساڭشى كىشكەنە...

داريعا: ا چتو نە تاك؟ ۆرودە فوتكايۋس. نۋ  نەپولۋچاەتسيا! نۋ لادنو سفوتكاي تى.

تەلەفوندى بەردى.

جانسايا: ءىشىڭدى تارت كىشكەنە... جىمي... جىمي... ەكى، ءۇش!

داريعا ايناعا تەرىس قاراپ تۇرىپ، باقىتتى كەيىپتە بىرنەشە سۋرەتكە ءتۇستى.

جانسايا: قاراشى، مىنا سوڭعىسى دۇرىسىراق شىقتى عوي دەيمىن...

داريعا سۋرەتتى كوردى.

داريعا: فۋ! چتو زا ۆيد؟! وكازىۆاەتسيا منە تاك نەيدەت. داۆاي ەششە راز س درۋگوگو راكۋرسا. ەتوت راكۋرس نە موي...

تاعى دا بىرنەشە رەت ءتۇستى.

داريعا: نۋ، سموتري، سموتري كاجەتسيا پولۋچيلوس. ۆوت ەتوت فوتو ۋجە نورمالنوە.

جانسايا: سالاردا فيلترلاردان وتكىزسەڭ، ودان دا كۇشتى بولاسىڭ...

داريعا ينستاگرامىن اشىپ، لەنتاداعى بىرنەشە ادامعا لايك باسىپ قاراپ ءوتتى دە، ءوزىنىڭ سوڭعى سۋرەتىن سالدى. پوست جازا باستادى.

 

پوست: گۇلدەر ءومىرىمىزدىڭ...

داريعا: وسى باسقا قىزدارعا ۇقساپ ءبىر جازىپ كورەيىنشى. كەيدە قىزىعام سولارعا...

داريعا جازعانىن ءوشىردى دە، ويلاندى...

 

جانسايا: الدىنداعىداي «جىگىتىم سۋرەتكە تۇسىرەيىنشى دەپ بوي بەرمەي قويدى» دەگەندەي جازىپ جۇرمە، مەن تاعى دا اينادان كورىنىپ تۇرمىن.

داريعا: ايتا بەرمەشى سونى مەنى ۇيالتىپ (كۇلدى). راسىندا دا سول ۇيات بولدى ءيا؟! قالايشا بايقاماي قالدىم  ا؟!

جانسايا: قايتا 10 مينۋت بولماي كورىپپىن...

داريعا: سونىڭ وزىندە 500 ادام لايك باسىپ ۇلگەرىپتى، ال قانشاماسى جاي كورىپ، كۇلىپ ءوتتى ەكەن؟! ۇيات-اي... ءاي، قويش سونى! ادەيى جاساعان پريكولىم دەي سالارمىن ازار بولسا.

داريعا: وسى جولى سەن كورىنىپ تۇرعان جەردى قيىپ تاستادىم.

 

پوست:

#جۇرەگىمنىڭيەسى مەنى قۋانتۋدان جالىعار ەمەس...

 

پوستتى جاريالادى. جانساياعا كوسەتتى.

داريعا: قالاي؟

جانسايا: ۆاي-ۆاي-ۆاي... دەگەنمەن مىنا وبرازىڭا جاراساتىن سياقتى...

 

داريعا جينالعان شاشىن بوساتىپ، جاي عانا بۋا سالدى. ءۇي كيىمدەرىن كيدى. پوماداسىن ءسۇرتتى.

 

داريعا: شاي ىشەيىكشى. قىزىلداپ تۇرىپ دايىنداشى!

جانسايا: قىزىلداپ؟

داستارحانعا وتىردى.  داريعا ولاردى  اساپ جەي باستادى.

داريعا: ءدال سولاي...

جانسايا: ديەتا شە؟

داريعا: ك چەرتۋ ديەتۋ!!! كوڭىل-كۇيىم جوق.

جانسايا: جۇمىسىڭ دۇرىس بولماي ءجۇر مە؟

داريعا: سۇراق قويا بەرمەشى... سودان باسقا پروبلەمام جوق دەيسىڭ بە؟ جالپى مەنىڭ جۇمىسىمدا ەشقاشان پروبلەما بولعان ەمەس، بولا قالسا دا سول مەزەتتە شەشۋگە كۇشىم ابدەن جەتەدى!

جانسايا: سوعان بولا سونشا اشۋلانعانىڭ نە؟ جاي سۇرادىم عوي...

داريعا: سۇراماش ەشتەڭە، سۇرامااا!!!

جانسايا ۇندەمەدى.

جانسايا بالالارىنا تەلەفون سوقتى.

 

جانسايا: اللو، قىزىم؟! قالايسىڭدار؟ پاپاڭ كەلدى مە؟ ... تاماق شە؟ ... ممم، جارايدى بوتام...

جانسايا مۇڭايا تۇتقانى قويدى.

داريعا: ولارعا كۇنىنە 5 رەت زۆونداماساڭ بولماي ما وسى؟ باقسىن اناۋ! قاراسىن دۇرىستاپ!

جانسايا: قويشى بولدى... ونسىز دا جەتىسىپ جۇرگەم جوق.

داريعا: بالانى نە ءۇشىن تۋاسىڭدار وسى توپىرلاتىپ؟ ءوز ومىرلەرىڭدى دۇرىستاپ سۇرە الماي ءجۇرىپ، ولاردىڭ دا ءومىرىنىڭ كۇل-تالقانىن شىعارىپ!

جانسايا: ءار بالانىڭ ءوز نەسىبەسى بولادى دەيدى. پەيىلدەرىنە قاراي ءالى-اق ءبارى وڭالار...

داريعا: ءبىر عانا بالانىڭ تاعدىرى بولسا ءبىر ءسارى. ورىمدەي 3 قىز! ارينە، بىردەن ۇل تۋىلا قويماعاننان كەيىن جوسپارسىز توپىرلاتىپ تۋىپ... ۇلدى مۇراگەر جاسايىن دەپ پە ەدىڭدەر؟ كۇيەۋىڭ قاي دəۋلەتىنە ورىنباسار ىزدەپ ءجۇر؟ 20 جىلدىق يپوتەكاسىنا ما، əلدە 10 جىلدىق كرەديتىنە مە؟ ميلليونداپ تابىس تاباتىن حولدينگى بولسا، ماقۇل-اۋ. ورتا كəسىبى بولسىنشى، حوتيا بى...

جانسايا: ءبىز جەتپەگەنگە، بالالارىمىز جەتەر بۇيىرتسا...

داريعا: ودان دا كۇيەۋىم "كەزىندە چەرت بولىپ، جۇمىس ىستەمەي، ماقساتسىز ءومىر ءسۇرىپ، ءبəرىن قۇر وتكىزىپ الدى. ەندى سول قاتەلىكتى تۇزەۋدىڭ قۇرالى رەتىندە بالا تۋدىق", دەسەڭشى. وكىنىشكە قاراي، ول دا دəل ءوزى سياقتى جولى بولماعان سورلى بوپ ءوسۋى مۇمكىن!

جانسايا: نەگە تۇسىنبەيسىڭ سەن؟.. بالالى ءۇي - بازار، ءومىر ولارسىز قىزىق ەمەس!  ومىرىمدى ولارسىز ەلەستەتە دە المايمىن.

داريعا: احا، كوڭىل كوتەرەتىن ءتəسىلدى تاۋىپسىڭدار! ول بالا كوڭىلىڭ مەن كوزىڭە لəززات سىيلاۋ ءۇشىن الدىمەن ينۆەستيتسيا كەرەك! تاماعىن بەرىپ، كيىمىن بۇتىندەپ، تəربيە، ءبىلىم بەرۋ كەرەك. ال، وعان كاپەتس اقشا كەرەك!

الدە، ەرتەڭ "اقشا جوق" دەگەن ءسوزدى بالاسىنا دəل وزىڭدەرىڭ سياقتى قايتالايتىن تاعى ءبىر "نەۋداچنيك" كەرەك پە بۇل ومىرگە؟ جالپى سەندەي ايەلدەرگە قاراسام جانىم اشيدى. نە دۇرىس دەمالمايدى، مانيكيۋر، پەدكيۋر دەگەننىڭ نە ەكەنىن دە بىلمەيدى!

جانسايا: ەل كورىپ، جەر كورىپ جۇرگەن كوزى اشىق ادامسىڭ عوي.  تىم بولماسا، ۇلتىمنىڭ سانىن كوبەيتەيىن دەپ تە ويلانبايسىڭ با وسى؟

داريعا: ال سەندەر توچنو قازاقتىڭ سانىن كوبەيتكىلەرىڭ كەلە مە، əلدە، دۇكەنگە نانعا، تەمەكىگە جۇمسايتىن، پۋلت پەن زاريادكانى ىزدەتەتىن قۇل كەرەك پە؟ مەنىڭشە...

جانسايا: (اشۋلانىپ) ساعان داۋا جوق ەكەن!

داريعا: ءبىزدىڭ دəل قازىرگى قوعامدا بالا əلدەنەنىڭ قۇرالى عانا. زالەتپەن كۇيەۋگە ءتيىپ الۋ ءۇشىن، وتباسىن ساقتاۋ ءۇشىن، تۋعان-تۋىستىڭ قىسىمىنان قۇتىلۋ ءۇشىن، جالعىزدىقتان قاشۋ ءۇشىن، اناۋ ءۇشىن، مىناۋ ءۇشىن... əيتەۋىر ء"ۇشىن" عانا!

جانسايا: ءدال وسى پىكىرلەرىڭدى وزگەرتپەسەڭ سەن ەشقاشان وڭبايسىڭ سەن! بەيشارا...

جانسايا بولمەدەن جىلاپ شىعىپ كەتتى.

 

داريعا الاسۇرا باستادى. جىلدامداتىپ باسىنا ورامال تاقتى. كوزىلدىرىگىن كيىپ، كومپيۋتەر الدىنا وتىردى. باسىن جوعارى كوتەرىپ، كوزىن جۇمىپ كىشكەنە وتىردى دا جازۋعا كىرىستى.

 

حات

قۇرمەتتى... ء(وشىردى). اسا مارتەبەلى... جاراتۋشى!

مەنىڭ ويىمدى تىم بولماسا سەن ءتۇسىنشى. نەگە سولاي؟ ادامدار قالاي اقىماق؟ ءبارى ءبىر-بىرىنە ىنقتىق. ال مەنىكى...  ول جوق! ءبىر جەردەن كورىندى. بىراق كورە المادىم. قۇپيا جۇرەدى. جاسىرىندى. تەك

سۇلباسى. شارام تاۋسىلدى.  شارشاپ، قالجىرادىم.

كەلمەيتىن بولعانى ما؟! بارىنە سەنۋدەن قالدىم...

 

باسىنداعى ورامالىن جۇلىپ الىپ تاستادى. پرينتەردەن حاتتى شىعاردى.

 

داريعا جازعان حاتىن مىجىپ-مىجىپ بۇكتەلگەن حاتقا تولى حرۋستال قۇمىرانىڭ  ىشىنە سالدى.

 

ول نەگە كەلمەيدى؟ مەنىڭشە ءبىزدىڭ جىگىتتەردە ىشكى كومپلەكس بار. قىزداردان وتكاز الۋعا قورقادى. سەبەبى اكەسى كەزىندە «مەنىڭ بالام باتىر» دەپ ميىنا ابدەن قۇيىپ وسىرگەن. ال ونداي ۇل ۇناتقان قىزى بەتىن قاعىپ جىبەرەدى مە دەپ بولجام جاساپ الادى. ا ۆدرۋگ ول سەزىمىن قاعىپ جىبەرىپ، دوستارىنا پريكول عىپ ايتادى؟ ال قىز سىمباتتى، əدەمى، مىنەزدى بولسا، قورقىنىشى ەكى ەسە كوپ، əلبەتتە.

ودان دا موماقاي، ءتۇرى دە ونشا ەمەس، كونبىس بىرەۋدى كوزدەپ، نىساناعا ءدوپ تۇسكەن تيىمدىرەك. تۋسوۆكالاردا ءموليىپ وتىرعان قىزداردىڭ كۇيەۋگە تەز شىعىپ كەتەتىنىن تالاي رەت كورگەنمىن.

ال، وزىنە نە كەرەگەنىن انىق بىلەتىن قىزدار مۇندا ناعىز بايقۇس! كوڭىلى اۋعان جىگىتكە سەزىمىن اشىپ ايتا المايدى. سەبەبى قازاقتا ونداي بولماعان، ۇيات! ءƏرى، قىزدىڭ سىنىپ قالعانىن بىلگەن جىگىت تەك قانا ءوز پايداسىن ويلاپ ۋاقىت وتكىزىپ، قالاعانىن جاسايدى. ا ۆدرۋگ əبدەن əۋرەلەپ، سوڭىندا تاستاپ كەتەدى؟ ودان دا قانشا قينالسا دا، جاستىق قۇشاقتاپ جالعىز وتكەنى تيىمدىرەك ەمەس پە؟! مەن دە قادىرسىز قالۋدان قاشامىن...

 

تەلەفون شىرىلدادى.

تەلەفون تۇتقاسىن كوتەردى.

 

داريعا: اللو؟! ... ءيا، تىڭداپ تۇرمىن. قايدان دەيدى؟ ... ترەينينگتى تۇندە دە جۇرگىزەتىن بولعانسىزدار ما؟ ...محم. تۇسىنىكتى... بىرىنشىدەن، ۋاقىتىن ۇمىتىپ كەتىپپىن، ەكىنشىدەن ەندى قاتىسپايمىن. مەن سولاي شەشتىم. ايىپ ەتپەڭىز... كۇيەۋدى سىزدەردىڭ ترەينينگتەرىڭىز ارقىلى تاپسام، ەندىگىگە دەيىن 10 كۇيەۋگە تيەتىن ۋاقىتىم بولدى. ... جوق، تىزىمنەن شىعارىپ تاستاڭىز! ساۋ بولىڭىز!

 

تۇتقانى قويدى.

 

حم! ترەينينگ دەيدى عوي! 2 جىلدان بەرى ول تۋرالى ديسسەرتاتسيا جازاتىن ۋاقىتىم بولدى.  بارلىعى سولاردىڭ اقىلىنا قاراپ تۇرسا... نادو جە؟!.

 

ۇستەل ۇستىندەگى شاقىرۋ بيلەتتەگى سۋرەتكە كوزى ءتۇستى. قولىنا الدى.

 

قاسىمدا جۇرگەن گۇلجانات تا تۇرمىسقا شىقتى دە سونىمەن... جۇرتتىڭ-اق جولى بولعىش. 1-2 اي ءجۇرىپ، قول ۇستاسىپ ۇيلەنىپ شىعا كەلەدى. 3 اي بۇرىن كۇيەۋى ماعان كەلىپ تۇراتىن. ول كەزدە ءالى گۇلجاناتتى تانىمايتىن.

ءبىز دۋبايداعى وتەلدە تانىستىق. تاڭعى اس ءىشىپ وتىرعانمىن. ءدال مۇنداي كۇيدى ەشقاشان سەزىنبەپپىن. قانشا تىرىسسام دا ءوزىمدى باسقارۋدان قالدىم.  سەبەبى ول جانىما كەلدى!

ول ناعىز جىگىتتىڭ تورەسى ەدى. ەكى يىعىنا ەكى كىسى مىنگەندەي ناكاچەننىي! ءيىسى ممم.. پريانىي، وبۆولاكيۆايۋششي! ناعىز ەركەككە ءتان وتكىر ءيىس. ونى سەزگەننەن باستاپ ەركىمنەن ايىرىلىپ، ماس بولدىم!

 

جىگىت: ۆيسكي؟ الدە روم؟

داريعا: ۆيسكي...

جىگىت اكەلىپ بەردى.  

داريعا: جىگىتىم، مەن ۆيسكي دەدىم...

جىگىت: روم!

داريعا: ۆيسكي !

جىگىت: روم!

داريعا: ۆيسكي!

جىگىت: روم!

داريعانىڭ بەتىنە ۆيسكيدى شاشىپ جىبەردى.

ولار قارسىلاسا بيلەدى.

داريعا: وڭباعان! قىز دەپ تە ايامايدى!

 

دا پوشەل تى  ك چەرتۋ! ەكى قوشقاردىڭ باسى ءبىر قازانعا سيمايدى.

 

ەكەۋىڭدى دە جەك كورەم! جەك كورەم! ءبارىڭدى...

 

سۋرەتتى جىرتىپ-جىرتىپ تاستادى.

 

ويلاپ وتىرسام... بۇل ومىردەن كىم جالعىز وتپەي جاتىر؟ جاس كەزىندە جىگىتتەردى ابدەن ساپىرعان مەريلين مونرو دا... دجەين وستين... كوكو شانەل... بارلىعى دا «شىن عاشىقتار قوسىلمايدى» دەگەن ءتامسىلدى قاۋزاپ كەتكەن بەيباقتار. وزدەرىن سولاي جۇباتۋدان باسقا امالدارى دا جوق. جالپى سول نە ءسوز؟؟؟ شىن عاشىقتار قوسىلمايدى دەگەن راس پا؟ مەنىڭشە، ادامداردىڭ بارلىعى ءبىر-بىرىنە شىن عاشىق بولادى. قوسىلعاسىن تۇرمىستاعى ۇرىس-كەرىستەر تۋىنداپ، ءبىر-بىرىنە سۋىنا باستايدى. سەبەبى پەندە عوي! پەندە پەندەشىلىگىن جاسايدى! ۆ-و-ووت، سول كەزدە وتىرادى قيالداپ، «نەگىزى «اناااۋ» شىن عاشىعىم بولعان، سوعان قوسىلعانىمدا عوي...» دەپ. سەبەبى ونىمەن ۇرسىسىپ ۇلگەرمەي قالعان عوي))) كاك بۋد-تو سونىمەن قوسىلسا تۇك ۇرسىسپايتىندىعىنا، ءومىر بويى قىزىعىنىڭ بىتپەيتىندىگىنە بىرەۋ كەپىل بولىپ تۇرعانداي. قىزىق!.. سوسىن ەكى كۇيەۋمەن ءومىر سۇرەدى. ءبىرى تەك ميىندا، ەكىنشىسى جانىندا جۇرەدى. سوندا... قايسىسى ومىرلىك جار؟

 

بىردە انامنان سەنىمدى ومىرلىك جاردى قالاي تابۋعا بولادى دەپ سۇراعانىمدا: قىزىم، جاراتقان شىن مانىندە پەندەسىنىڭ ماڭدايىنا وزىنە تيەسىلى تاعدىرىن جازىپ قويعان. يماندىعا يماندى، زۇلىمعا زۇلىم، جالقاۋعا جالقاۋ جار كەز بولادى. سەن ەڭ الدىمەن ءوزىڭدى دامىتۋعا تىرىس. كۇيەۋ ىزدەمە، ءوزىڭدى ىزدە، وزىڭە نە كەرەك ەكەنىن ءتۇسىن، سوندا جاقسى كۇيەۋدىڭ ءوزى سەنى ىزدەپ تابادى، - دەگەن ەدى. مەن وسى ءسوزدى جادىمدا ۇستاپ، كوڭىلىمە توقىدىم. ال سەن قاندايسىڭ سوندا؟ مەنى نەگە تابا الماي ءجۇرسىڭ؟ بالكىم... قيالىمدا عانا قالعانىڭ دۇرىس شىعار... قولدارىڭ قانداي قۋاتتى ەدى... كوزىڭدەگى مەيىرىمدىلىككە شومىلعىم كەلەدى...  دەمىڭە ەرىپ بارامىن... ىشىمە مىڭداعان كوبەلەك ۇيا سالىپ العانداي. جان دۇنيەمدى شىمىرلاتىپ...  وزىڭمەن بىرگە الىپ كەتشى... باسقا الەمدە ءومىر سۇرەيىك. بىرگە...

 

پاۋزا.

 

مايىسىپ قالدى. ءوز-وزىنە قاراپ قىسىلىپ، تومەن قاراعىشتاي بەرەدى. ءوزىن جىگىتتىڭ الدىندا تۇرعانداي سەزىندى. ەركەلەپ تۇر.

 

ءوزىڭ عوي ەندى... سەن مەنى جىلاتا بەرمەشى. مەن تە-ە-ەز لەنجىپ قالام... (تومەن قارادى)

پاۋزا.

قىدىرايىقشى... ممم... مىسالىىى؟.. شۋلى جەردەن جالىعىپ كەتكەم. ودان دا مىسالى، پارككە. تىپ-تىنىش ساياباققا. ەكەۋمى-ءى-ز عانا. قول ۇستاسىپ...

و-وي، ءومىرى سۇيتەسىڭ... نەگە؟

كەلشى! ودان دا بيلەيىك.

 

ء(بيدىڭ باس جاعى باياۋ بولعانىمەن، جارتىسى cترەپتيز گوۋ-گوۋ بيىنە جالعاسادى.)

 

مۋزىكا ويناپ تۇر. ساحناعا كوك ءتۇستى جارىق جاندى.  جۇقا  پەنيۋار كيگەن داريعا بيلەي باستادى. جىگىتتى بيگە شاقىردى. ماحاببات. ىنتىق سەزىم. جىگىت كەتتى.  جارىق كومەسكىلەنە باستادى. مۋزىكا داۋىسى ورتايدى. داريعا ۇستەلدەردىڭ استىنا كىرىپ ءبۇرىسىپ جاتتى.

 

ەكىنشى كورىنىس

 

ءتۇس

داريعا 30 جاس شاماسىندا. بولمە قايتادان جارىق بولدى. داريعا ۇستەلدىڭ استىنان شىقتى.

 

داريعا: ۇستەلدەردى ۇستىمە ءۇيىپ تاستاعانى نەسى؟ دەنەمنىڭ ءبارى اۋىرىپ تۇر. مەن نە ىستەپ جاتىر ەدىم ءوزى... ااا، اس ۇيگە وبەد ىشۋگە بارا جاتىر ەدىم عوي. اياعىم... سىنىپ قالعان عوي دەيمىن. اقساڭداپ ءجۇرىپ ونى قالاي قارسى الامىن سوندا؟  جوق... سىنباعان سياقتى... وندا نەگە اۋىرىپ تۇر ا؟! ءبارى سەنىڭ كەسىرىڭنەن! قاراشى سەن ءۇشىن ءوزىمدى تاعى قۇربان ەتتىم...

جانسايا؟! ۇيدەسىڭ بە؟ اكەلگەن ازىق-تۇلىكتى كوردىڭ بە؟ كەشكە دەيىن ۇلگەرمەي قالمايىق. داستارحان دايىن بولماي ۇيات بولماسىن! كەشەگى ايتقانىم بويىنشا تۋراي بەر سالاتتاردى. جوق، تۇرا تۇرشى. (ورنىنان اتىپ تۇرىپ، ءوز-وزىنە سۇراق قويا باستادى) ول ءوزى قانداي سالاتتاردى ۇناتۋشى ەدى؟؟؟

بالىق قوسىلعان؟..  قوسىلماعان؟..

بالىق جەگەن جاقسى عوي. دەنساۋلىققا پايدالى. قوسىلعانىن ۇناتقانى دۇرىس... جانسايا، بالىق قوسا بەر. باسقا دا تاماقتارىڭدى دا دامدىلەپ جاسارسىڭ...

 

تەلەديدار قوستى. ارنالاردى اۋىستىرىپ كوردى دە، وشىرە سالدى.

 

بۇگىنگى كوڭىل-كۇيىمە ساي ەشتەڭە جوق ەكەن. ءتىپتى مۋز.كانالداردىڭ ءوزى  كاك تو... تراۋرنىي... مۇڭدى. بارىنە نە كورىنگەن؟!.

كۇتكەن ادامىم كەلە جاتىر. ودان اسقان باقىت بار ما؟! جانسا-ا-يا، مەنەن كومەك كەرەك پە؟

(وزىمەن ءوزى)ءاي، بىراق اسحانا جاعى قولىمنان كەلە قويماس.

جانسايا، كەشكە دەيىن ۇلگەرمەي قالمايىق ايتەۋىر...

 

جاڭىلتپاشىن كوڭىلدەنە بىرنەشە قايتالاپ ايتتى.

 

حان بالاسى حانزادا

بولدى عاشىق حانشاعا.

الىپ حاننان حابار،

حانشايىمدى تابار.

 

تەلەفون شىرىلدادى.

اللو! ءيا... سالەمەتسىڭ بە؟ ... ءتۇسىندىم. نۇرجان، ونى كەشەگى ايتقانىمداي جاساڭىز! 25-نە جينالىس جاسايمىز. ... اقش-پەن ءالى بايلانىسقا شىقپادىڭىز با؟ نە ىستەپ جۇرسىزدەر وسى كەزگە دەيىن؟ ... وك! ءوزىم سويلەسىپ، باسشىلىققا ءبىر حابارىن بەرەمىن.  جاقسى! نۇرجان، تاپسىرمالاردى تىڭعىلىقتى اتقارىپ ۇيرەنىڭىز! ... كورىسكەنشە!

 

تۇتقانى قويدى.

 

سونداي مەلوچتاردى ماعان ايتپاي-اق قويسا دا بولادى عوي. جوق، مىندەتتى تۇردە ايتۋ كەرەك، مازالاپ...

تاا-ا-ك، قۋانىشىمدى قاي قۇربىما ايتىپ ماقتانسام ەكەن... گۇلسىم! وي، بىراق ول بالاسىنىڭ قىلىعى مەن ەنەسىن جامانداعاننان باسقا اڭگىمە بىلمەيدى. ودان دا... مارجان! بىراق ول تاعى جان-جانۋارلاردى قورعاۋعا ارنالعان كونفەرەنتسيالاردىڭ بىرىندە وتىرعان شىعار... نازەركە قالاي توقال بولىپ جۇرگەنىن ايتىپ اۋزى بوسامايدى. قويش سونى... باسقا كىم بار ەدى ءوزى... قاتار-قۇربى دا قالمادى...

 

تەلەفون شىرىلدادى.

 

تاعى قايسىسى...

اللو! احا، قالىڭىز قالاي؟ ... مەندە ءبارى ويداعىداي. ... و-و-و، دۇرىس بولعان ەكەن. نە جاڭالىق؟ ... ممم... ەرتەڭ دەيسىز بە؟ بارلىق تۋىسقانداردى شاقىرساڭىز تىپتەن جاقسى بولعان ەكەن. شۇيىركەلەسپەگەلى كوپ بولدى.... ءسىزدىڭ باۋىرساعىڭىز بەن بەشبارماعىڭىزدىڭ ءدامى ءالى تاڭدايىمنان كەتپەي ءجۇر عوي. ... ۋاقىت بولسا، بارۋعا وتە قاتتى تىرىسامىن، اپاي. ... سىزدەر دە مەن جاققا كەلىپ قايتىڭىزدار. ... كەشكە ۇنەمى ۇيدەمىن عوي. ... احا، جاقسى! ...

ساۋ بولىڭىز!

 

تەلەفون تۇتقاسىن قويدى.

 

قالاعان ادامعا ۋاقىت البەتتە تابىلار. بىراق مەن بارمايمىن. سەبەبى ارقايسىسىنىڭ «قاشان تۇرمىسقا شىعاسىڭ؟» دەگەن سۇراقتارىنان ابدەن جاۋىر بولدىم. باس-باسىنا كورگەن سايىن قايتالاپ سۇراي بەرەدى، سۇراي بەرەدى... كاك بۋدتو يا ۆسە رەشا-ا-ايۋ ي ۆسە ۆ مويح رۋكاح!.. ووو، ودان قالسا ەسكى داۋىرلەردەن قالعان بارلىق جالعىز باستى ەركەكتەرمەن تانىستىرعىش... ءوزىمدى جەر بەتىندەگى وتپەي جۇرگەن ەڭ سوڭعى قىز سەزىنىپ كەتەم ونداي كەزدەرى. اۋزىنان ءسوزى، ۇستىنەن ءبوزى ءتۇسىپ قالعان نەبىر جىگىتتەرگە تەلەفون نومەرىمدى بەرەتىنىن قايتەرسىڭ؟! ول بايقۇستار تۇرادى سوسىن، حال سۇراۋدان ارى اسا الماي. وندايلارمەن بىردەن قوشتاسامىن. Good bye! ەركەك – ەركەك سياقتى بولۋ كەرەك!

 

قولىندا تاقتاي، پىشاعى بار، اياعىاۋىر جانسايا كەلدى.

(داريعا ديۆانعا وتىردى. كوسمەتيكا جۋرنالدارىن پاراقتادى.)

مىسالى، مىنا جىگىتتەردەي سىمباتتى، قاراساڭ كوز تويارلىق! مۋجەستۆەننىي! بىرەۋگە مىناۋ مەنىڭ كۇيەۋىم دەگەندە دە ۇيالماي كورسەتەتىندەي...

پاراقتارداعى ءيىس سۋلاردىڭ پروبنيكتارىن قولىمەن ۇيكەپ يىسكەپ، راحاتتاندى. ءار پاراعىن اشىپ يىسكەدى.

جانسايا، مىنا جۋرنالدىڭ جاڭا سانىنا تاپسىرىس بەرە عويشى. يىستەرى كەتە باستاپتى....

قولىندا تاقتاي، پىشاعى بار جانسايا كەلدى. داريعانىڭ جانىنا وتىرىپ تۋراي باستادى.

جانسايا: وسى نەگە ەركەكتەرگە ارنالعان ءيىس سۋدىڭ ءبىر فلاكونىن تۇگەل ساتىپ الا سالمايسىڭ؟

داريعا: بىرەۋ كورىپ قويسا ۇيات؟ ەركەگى جوق ۇيدە ءيىس سۋى نەعىپ تۇر دەپ ويلاپ قالماي ما؟

جانسايا: تىعىپ يىسكەپ ءجۇر.

داريعا: ول بىتكەنشە جالىعىپ كەتپەيمىن بە ول يىستەن؟ جالپى بىرنارسەنى ۇزاق ۋاقىت تۇتىنساڭ، ودان شارشاپ، جالىعىپ كەتەسىڭ عوي. وسى سەندەردە كۇيەۋگە تيەردە ودان جالىعىپ، باسقا بىرەۋدى ۇناتىپ قالسام قايتەم دەگەن قورقىنىش بولعان  جوق پا؟

جانسايا: شىن عاشىق بولىپ تۇرمىسقا شىقساڭ ول وي ميىڭا دا كەلمەيدى.

داريعا: نە نارسەگە بولسا دا قانشا جەردەن ىنتىعىپ، ۇناتىپ تۇرساڭ دا، قولىڭ جەتكەن كۇنى ارمان دا ولەدى دەگەندەي، ءبىر كۇنى قىزىعى تاۋسىلىپ، كوڭىلىڭ سۋىپ قالۋى مۇمكىن عوي...

جانسايا: جاس جۇبايلاردىڭ قىزىعى تاۋسىلمايدى، سەبەبى ۋاقىت وتە كەلە جاي عانا كۇيەۋ ەمەس، باۋىرىڭ سياقتى بولىپ كەتەدى. ماحاببات ۇلكەن باۋىرمالدىلىققا اينالادى.

داريعا: بىلەسىڭ بە، مەنىڭشە جىگىتتەر باراحولكادا ساتىلىپ تۇراتىن كويلەكتەر سياقتى.

جانسايا: قالاي سوندا؟ (كۇلدى)

داريعا: ەسىڭدە مە ستۋدەنت كەزىمىزدە ستيپەنديا تۇسكەن بويدا باراحولكاعا قاراي ۇشاتىن ەدىك قوي.  مەن سوندا ءبىر كويلەكتى ءبىر كۇن بويى ارالاپ ىزدەپ جۇرەتىنمىن. بىرەۋسىن تاباسىڭ قىمبات، قالتاڭ كوتەرمەيدى كەدەي قىزداردى جاقتىرمايتىن تىم باي جىگىتتەر سىندى. ەندى بىرەۋىنىڭ مودەلى كەلسە، ءتۇسى جاراسپاي قالادى، ياعني اقىلدى، بىراق ءتۇرى ونشا ەمەستەر، ەندى ءبىرىنىڭ ساعان شاق كولەمى تابىلمايدى. ياعني جاسى تىم ۇلكەن اعايلاردىڭ  ءسوز ايتاتىنى سياقتى. بىرەۋىنىڭ مودەلى دە، ءتۇسى دە، رازمەرى دە ويداعىداي بولعانىمەن، كيىپ كورسەڭ بىرسۇمدىق، ءوزىڭدى ديسكومفورت سەزىنەسىڭ. ونداي جىگىتتەر دە كوپ بولدى، ءبىلىمى، اقىلى، ءتۇرى، قالتاسى ساي كەلىپ تۇرعانىمەن، جاقىن ارالاسا كەلە ايتەۋىر تارتپايدى، قارىم-قاتىناستا گارمونيا تاپپايسىڭ.

جانسايا: تەڭەۋلەرىڭ قىزىق ەكەن.   بۇنىڭ ءدال باراحولكاعا قانداي قاتىسى بار سوندا؟

داريعا: ەڭ قىزىق جەرى سوندا، باراحولكا تىم ۇلكەن عوي، تاڭ اتقاننان باستاپ كۇن باتقانشا قايدان كىرىپ-قايدان شىققانىڭدى بىلمەي ارالاي بەرەسىڭ، ارالاي بەرەسىڭ، بۇدان دا جاقسىسى تابىلاتىن شىعار دەگەن ۇمىتپەن جاراساپ تۇرعان كويلەكتى الماي جۇرە بەرەسىڭ، جۇرە بەرەسىڭ... كەش باتىپ، ساۋداگەرلەر جينالا باستاعان ساتتە تاپىرىقتايسىڭ كەپ. نە  باعانا جاراسقان كويلەكتەردى قايتىپ بارىپ تاپپايسىڭ، نە قايتادان باسقاسىن ىزدەيتىن ۋاقىت جوق.

جانسايا: پىسىق، اقىلدى قىزدار بىردەن شەشىم قابىلداپ الىپ كەتكەن بولار (كۇلدى) .

داريعا: سولاي سياقتى...   بولايىن دەدىڭ بە؟

جانسايا: تۋراسىپ جىبەرمەسەڭ بىتپەيتىن ءتۇرىم بار.

داريعا: داۆاي، قايسىسىن؟

جانسايا: مىنە...

داريعا:ءۇشبۇرىشتاپ تۋرايىن با؟

جانسايا: ءيا، سولاي.

 

پاۋزا

 

داريعا: جانسايا، سەزەسىڭ بە مەن سونداي باقىتتىمىن! (كەنەت ەسىنە بىردەڭە ءتۇسىپ كەتتتى) قازىر...

 

داريعا ورنىنان تۇرىپ، كومپيۋتەر الدىنا جايعاستى. جان-جاعىنان ىزدەپ ورامالىن تاۋىپ، باسىنا سالدى. كوزىلدىرىگىن كيدى. باسىن جوعارى ۇستاپ كوزىن جۇمىپ ءبىراز وتىردى دا جازۋعا كىرىستى.

 

حات

قۇرمەتتى، جاراتۋشى! قۇدىرەتىڭنىڭ ارقاسىندا

شەكسىز باقىتقا يە بولايىن دەپ وتىرمىن.

راحمەت، ساعان! تەك... تەك ۇزاعىنان ءسۇيىندىر...

 

پرينتەردەن شىعاردى.

حاتتى ادەمىلەپ بۇكتەدى. جارتىلاي حات تولعان حرۋستال قۇمىراعا اپارىپ سالدى. ورامالىن اسپەتتەپ شەشىپ قاسىنا قويدى.

ونى كورگەن جانسايا باسىن شايقاپ مىرس ەتتى.

داريعا ستولعا كەلىپ، سالات تۋراسا باستادى.

 

پاۋزا

 

داريعا: كوپ كۇتتىم، وتە كوپ...

جانسايا: قوناقتار تەزىرەك قايتاتىن شىعار...

داريعا: ءتىپتى جارتى ءومىرىم ءوتتى دەسەم دە بولادى.

جانسايا: ءومىر ءالى الدا عوي...

داريعا: ساعان سولاي بوپ كورىنۋى مۇمكىن. كۇيەۋىڭ، بالاڭ بار.

جانسايا: كۇن سۋىتتى. جىلى اياق كيىم الىپ بەرۋ كەرەك ەدى.

داريعا: ونى كۇتكەن ءار ۋاقىتىمدى پايدالى ىسكە جۇمساعىم كەلدى. ناتيجەسىندە...

جانسايا: بالامىزدى ەشتەمەدەن كەم قىلماي وسىرگىمىز كەلەدى.

داريعا: ناتيجەسىندە ساباق پەن قىزمەتكە الدانۋعا تىرىستىم. ستۋدەنت كەزدە داياشى، جوعارعى كۋرستا – ادمينستراتور، ماگيستراتۋرادا – اتقارۋشى مەنەدجەر،  مىنە باس مەنەدجەر  بولدىم. ءبارى جالعاسا بەردى ونى كۇتە-كۇتە. مىنە...

 

جانسايا: 30 جاس!  وقىعان دەگەن جاقسى عوي. ءبىز كۇيەۋىمىز ەكەۋىمىز كوللەدجدەن ارى وقىمادىق، كۇيبەڭ تىرلىكپەن...

داريعا: بىردەمەدەن قۇر قالاتىنداي كۇيەۋگە ءتيىپ، وقۋدى تاستاپ كەتكەن وزىڭنەن كور. سەن جوعارعى وقۋ وقىسىن دەپ انشا تىرىستىم.

جانسايا: بالام ۇيگە مىسىق اكەلگەن ەكەن، تاماق جەمەي قالىپتى.

داريعا: ءومىر وسىلاي بولادى دەپ كىم ويلاعان؟..

جانسايا:  ءالى جاسپىن عوي. وقىپ السام بولادى.

داريعا: بالانى كەم قىلماي وسىرگىمىز كەلەدى ەمەس، وسىرۋگە مىندەتتىسىڭ!

جانسايا: ەرتەڭ جولداسىم ۇيدە مونشا جاعىپ قويامىن دەدى. مونشاعا ءتۇسىپ كەت!

داريعا: بوتوكس جاساتقان بەتتەرگە مونشانىڭ بولمايتىنىن بىلەسىڭ عوي...

جانسايا: بوتوكس سالدىرا بەرگەنشە، ەكومەن ءبىر بالا سالدىرىپ الساڭىزشى...

داريعا: قويشى، سوسىن اكەمنىڭ بەتىنە قالاي قارايمىن؟!

جانسايا: وندا اسىراپ...

داريعا: نەگە بۇگىن تىم اقىلدى بولىپ كەتكەنسىڭ، جانسايا! باسىم جەرگە جەتىپ تۇرعان جوق، نەبارى 30-اق جاستامىن. #جۇرەگىمنىڭيەسىنە تۇرمىسقا شىعىپ، ءوزىم-اق بوسانامىن!

جانسايا: بۇگىن عانا كورسەم دە كۇيەۋىمدى ساعىندىم... ۇيگە كەتكىم كەلىپ تۇر.

داريعا: سپورت زالىنداعى ترەنەرىم بالا كوتەرگىسى كەلەتىندەر ىشكە پرەسستى كوپ جاساي بەرمەۋ كەرەكتىگىن ەسكەرتتى.

جانسايا: كەيدە ءوزىم دە تۇسىنبەيمىن، سونىڭ قاي جەرىن جاقسى كورەتىنىمدى. ءبىلىمى دە جوق، ءتۇرى دە ونشا ەمەس، مىنەزىنىڭ دە وڭىپ تۇرعانى شامالى، نە اقشا تاپپايدى...

داريعا: تۋىلاتىن بالاڭ دا ادەمى بولۋ ءۇشىن، سىمباتتى بويى ۇزىن جىگىتكە تيۋ كەرەك...

داريعا شاتتانا ورنىنان تۇردى.

 

بىلەسىڭ بە، ونىڭ بويى مەنەن... مىنە، مىناداي ۇزىن  (قولىمەن كورسەتتى).

 

جانسايا: ساعان  ورتاشا بويلىلار ۇناۋشى ەدى عوي.

داريعا: جوق، ويىم وزگەردى. تۋرا گاۋھاردىڭ كۇيەۋىندەي ۇزىن بولسا ەكەن دەيمىن. جىگىتتىڭ ۇزىن بولعانى جاقسى ەكەن.

جانسايا: قىزىق...

داريعا: كوزدەرى سو-و-نداي ءموپ-ءمولدىر. قىر مۇرىندى... ال قولدارى قانداي ادەمى دەسەڭشى. كەيىن نەكە جۇزىگىن تاققاندا ودان سايىن ادەمى كورىنەتىن بولادى. بىراق ول تىم سىمباتتى بولىپ كەتسە، مەن قىزعانامىن. سەبەبى قازىر قىزدار وزدەرى جۇگىرەدى جىگىتتىڭ ارتىنان. سوسىن باسىن اينالدىرىپ ۇيلەنىپ الادى. ترەنينگتە سونىڭ ءبارىن ۇيرەتكەن، تەك مەن ولاردى جاساعىم كەلمەيدى.

جانسايا: نەگە؟

داريعا: نۋ-ۋ، بىلمەيمىن. شىنداپ قالاسام جاساي الامىن. بىراق، بىلەسىڭ عوي، ماعان قانداي جىگىت كەرەك ەكەنىن؟! بىرەۋى تىم جۋاس، ءبىرىنىڭ ءتۇرى ونشا ەمەس، ەندى ءبىرى كەدەي... وعان تاعى جموتتاردى قوس.

جانسايا: كەدەي؟

داريعا: ءيا، كەدەي! قۇداي-اۋ، 30-عا كەلگەنشە استىندا ارزانداۋ بولسا دا ءبىر ماشيناسى جوق جىگىتتەن ارى قاراي نە كۇتۋگە بولادى؟

جانسايا: كەدەي بايىماي ما، باي جارلى بولماي ما؟ وندا تۇرعان نە بار؟ كەرىسىنشە سەندە بار ولار...

داريعا: ءيا، بار. ال وندايلارعا قوسىلسام ۇيدە ماتريارحات ورنايدى! كىم كوبىرەك ايلىق الادى، بيلىك ءبارىبىر سونىڭ قولىندا. ونى كەز-كەلگەن ەركەك ىشتەي بولسا دا مويىندايدى.

جانسايا: مۇمكىن...

داريعا: سوندىقتان، ول مەنەن بارلىق جاعىنان الدا تۇرۋى كەرەك. ءبىلىم، اقىل، اقشا...

جانسايا: ونداي جىگىتتى تابۋ قيىنداۋ... مەنىڭشە، ساعان جۋاس، باعىناتىن كۇيەۋ كەرەك سياقتى. ءوزىڭ سۇيرەپ جۇرەسىڭ.

داريعا: جوق، جانسايا! قاتەلەسەسىڭ... «بايتال شاۋىپ بايگە الماس». اكەم ايتقان... (پاۋزا)

جانسايا: سەن وسى قيالدان جاساپ العان يدەالىڭدى ىزدەپ ۋاقىت وتكىزە بەرمەي، ءبىر ۋاقىت اينالاڭا قاراپ كورسەڭشى. مەنىڭشە، سەن ىزدەگەن جۇرەگىڭنىڭ يەسى ءدال جانىڭدا ءجۇر!

داريعا: جوق! ولار ماعان ۇنامايدى!

ج انسايا: وي، قيال!

قويشى، ودان دا ءتۇرىمدى رەتكە كەلتىرەيىن كەشكە دەيىن. جاقتىرماي كەتىپ جۇرمەسىن (كۇلدى).

 

پاۋزا. داريعا جاستىقتى بالا قىلىپ وراپ، ماپەلەپ ءجۇر.

 

ول كەلەدى... كەزدەسەمىز...  كەرەمەت!

 

جاڭىلتپاشتى ءارتۇرلى مانەردە بىرنەشە  رەت  ايتادى.

 

تاۋدان ءتۇسىپ كەلەدى تاۋ ۇلدارى،

تاۋ ۇلدارى سۇيەدى قاۋىمدارىن.

تاۋ ۇلدارى سۇيەدى اۋىلدارىن،

تاماشالاپ جۇرەدى تاۋىن، باعىن.

 

گۇل اكەلەر مە ەكەن ا؟!

كەشتە شارشاۋ كورىنبەي، 1 ساعات جاتىپ تىنىعىپ الايىنشى.

(پاۋزا)

داريعا توسەككە جاتتى.

داريعا: جالعىزدىق دەگەن نە وسى؟

 

38 جاس: مەنىڭشە،  جالعىزدىق دەگەن – تاعدىر. سەبەبى ونى ەشكىم باسىنا تىلەپ المايدى.

28 جاس: جوق، 38 جاس سەن قاتەلەسەسىڭ! مەنىڭشە – ەركىندىك! سەبەبى  قايدا بارام، نە ىشەم، نە جەيمىن دەمەيسىڭ. راحات!

35 جاس: وي، 28 سەن دە ءبىر ايتا بەرەدى ەكەنسىڭ! جالعىزدىقتا ادام ەركىن بولمايدى.

30 جاس: 35! ويىڭ دۇرىس.  سەبەبى جالعىزدىقتىڭ كەڭىستىگى تار. سول جەردە قىسىلىپ ءومىر سۇرۋگە ءماجبۇرسىڭ!

28 جاس:  30 جاس! نە دەگەن قاتىگەز ەدىڭ   – مەنىڭشە، جالعىزدىق دەگەن سەنىم...

38 جاس: سەن سەنەسىڭ، سەنەسىڭ! سوڭى تۇنعيىق.

25 جاس: جوق! 38 قاتەلەسەسىڭ جالعىزدىقتى – ءوز پايداڭا دا شەشۋگە بولادى.

30 جاس: الع سەن قانشالىقتى ءوز پايداڭا شەشە الدىڭ داريعا؟

35 جاس: مىسالى داۋرەن! بىلەسىڭدەر عوي قىزدار؟!

25جاس: ول ادەمى، سىپايى بولاتىن. سەن ءۇشىن بارىن بەرۋگە دايىن ەدى.

38 جاس: ال سەن وعان قارامادىڭ.

28جاس:  قازىر ول ۇيلەنگەن باقىتتى.

30 جاس:  قازىر ءجۇرسىڭ ەندى سۋرەتتەرىن كورگەن سايىن ءىشىڭ كۇيىپ. ونى قويشى، كەتتى عوي. جاندوستى ايتساڭشى...

25 جاس: ونى قيالي، اقىنسىماق دەپ جاقتىرمادىڭ!

38 جاس: ەرنار دەگەن دە جاپ-جاقسى جىگىت ەدى.

28 جاس: ونىڭ بويى قىسقا دەدى عوي.

25 جاس: قىزدار، اسىلبەك شە؟!

38 جاس: سول جىگىت جاقسى ۋحاجيۆات ەتىپ جۇرگەن جەرىنەن، پودكابلۋچنيكسىڭ دەپ جاقتىرمادى ەمەس پە؟!

28 جاس: سەن سونداي تاككاپارسىڭ!

25 جاس: ءوزىمشىلسىڭ!

38 جاس: جۇرتتى وزىڭنەن تومەن سانايسىڭ!

28 جاس: وزىڭە نە كەرەكتىگىن بىلمەيسىڭ!

25 جاس: قاتىگەزسىڭ!

38جاس: سەن ومىردە اكتريساسىڭ، ال ناعىز شىنايى بەينەڭ وسى!

ولار شۋلاپ كەتتى.

25 جاس: 23! سەن نەگە ۇندەمەيسىڭ؟

 

 

ءۇشىنشى كورىنىس

 

تاڭەرتەڭ

قۇستار سايراپ تۇر. داريعا 23 جاس شاماسىندا. ۇيقىدان تۇردى. تەلەفونى شىرىلدادى.

 

داريعا: اللو!..  قايىرلى تاڭ. ...  محم... جوق، رەنجىمەشى، كەزدەسە المايمىز. سەبەبى؟ ...  سەبەبى جۇمىسىم كوپ. قوسىمشا ساباقتارىم بار. ... ءتۇسىنشى جۇمىستان 1 جىلدىق ەسەپ دايىنداپ وتىرمىن... مۇمكىن كەيىنىرەك...

سولاي... جارايدى، ساۋ بول!

 

تۇتقانى قويدى.

 

قىزعا ۇقساپ قىدىرۋعا دا ۋاقىت جوق. ءبىر جاعىنان ءومىر الدا عوي.  وزىمە لايىقتى، ناعىز جىگىت كەزدەسكەندە شىعارمىن قىدىرۋعا... ال ازىرگە جۇمىس، اياقتان تۇرىپ الۋ كەرەك. قىدىرۋ تابىلار...

 

ول دا قىزىق. ءوزى قاتارلاس قىز ىزدەمەي مە؟! مەنى اپا جاسايىن دەپ ءجۇر مە؟! مەن 23,  ول نەبارى 21-دە عوي. ول ءۇشىن ءبارىبىر كارىمىن. جىگىت دەگەن قىزدان ۇلكەندەۋ بولۋ كەرەك.

 

بەتى-قولىن جۋدى.

تەلەفونىنا سمس كەلدى. وقىدى.

 

تۋ-ۋ، مىنا قىزدار دا قويمادى عوي. ەرىككەن ءبارى شەتىنەن... قيت ەتسە كلۋبقا بارعىش... كەزىندە ساباقتى قاتىرماپ ەدى، قازىر جۇمىس ىستەپ تە جارىتىپ جۇرگەن جوق. نە ءومىر؟ بار تاپقانىنا شىرتتاي بولىپ كيىنىپ الىپ، قىدىرادى دا جۇرەدى. ادام دەگەن بولاشاعىن ويلاماي ما؟

 

جۇمىسىن جالعاستىرىپ جاساپ وتىر.

 

داريعا:  جۇمىس-ءۇي، ءۇي-جۇمىس. كەيدە جالىعىپ، ءبىر سارىندى ومىردەن شارشاپ كەتەمىن. ۇيدە شۇيىركەلەسەتىن جانسايا دا ۇزاتىلدى كۇيەۋدەن قۇر قالعانداي... داۋرەن دە حابارلاسپاعالى ءبىراز بولدى. رەنجىتىپ الدىم سوڭعى كەزدەسكەنىمدە... جۇمىسىڭ بىتپەيدى ءومىرى، نەگە كەڭسەدەن تىم كەش شىعاسىڭ دەيدى... ول جەردە ويناپ وتىراتىنداي. تۇسىنبەي كەتەدى ول دا كەيدە... مەن دە جۇمىستان شارشاپ شىعىپ ەدىم، قاتتى ايتىپ جىبەردىم عوي دەيمىن. نە ىستەپ ءجۇر ەكەن... ساعىندىم...

ۋفف...

بىراقق سەنى جولىقتىرعان تاعدىرىما ريزامىن جانىم... ءار مينۋتىم، ءار سەكۋندىم... ومىرىمە سەن ەنگەلى جۇلدىزدار دا انىق جارقىرايتىنداي... اينالامداعى ادامداردىڭ بارلىعى مەيىرلەنە تۇسكەندەي... نەتكەن قۇدىرەتتى ەدىڭ؟! سەنى جولىقتىرعان تاعدىرىما ريزامىن جانىم... قاي قاسيەتىڭمەن وزىڭە ىنتىقتىرىپ قويدىڭ؟.. جارتى كۇن كورمەسەم، ەلەڭدەپ ءوزىڭدى ساعىنىپ تۇرامىن. قايدا، كىممەن، نە ىستەپ وتىر ەكەنسىڭ؟ قارنىڭ اشىپ قالعان جوق پا؟ جۇمىس كۇنىڭ ءساتتى ءوتىپ جاتىر ما؟ جاۋراپ قالمادىڭ با ەكەن؟ ەشكىم رەنجىتپەدى مە؟ كوڭىل-كۇيىڭ قالاي؟ ءبارىن-ءبارىن بىلگىم كەلەدى...

 

جىگىت كەلدى.

 

جىگىت: كۇنىم مەنىڭ! الەمدەگى ەەەڭ سۇلۋ قىزدىڭ جاعدايى قالاي ەكەن؟

داريعا: كە-ر-ەمەت! وزىڭدە ءبارى جاقسى ما؟

جىگىت: جاقسى، حانشايىمىم.

داريعا: مەنى قالاي ساعىندىڭ؟ كورسەتشى قانە ادەتتەگىدەي...

جىگىت: تۇك تە ساعىنعان جوقپىن!

داريعا: (بۇرتيىپ قالدى) قالاي سوندا؟ تۇك تە...

جىگىت: اقىماعىم سول... رەنجىگەن تۇرىنەن سول... سەنى ۇنەمى جۇرەگىمنىڭ ىشىنە سالىپ جۇرەمىن. ءاردايىم مەنىڭ جانىمداسىڭ.

داريعا: ال، مەن سەنى ساعىندىم... سەن جوقتا ساعىنىشىمدى قايتىپ باسقانىمدى ايتىپ بەرەيىن با؟

جىگىت: كىشكەنە سەزىپ تۇرمىن...

داريعا: (بۇرتيدى) وندا مەنەن ەندى ەشتەڭە سۇراما، اقىرى ءوزىڭ ءبارىن بىلەدى ەكەنسىڭ عوي...

جىگىت: سۋرەتىمە قاراپ تەلمىرۋمەن بولدىڭ عوي، ءيا؟

داريعا: نەااا

جىگىت: ەندى؟

داريعا: سەن بەرگەن گۇلدەرمەن سويلەسىپ ءجۇردىم كۇنى بويى... ولار سۇراقتارىما سەنىڭ ورنىڭا جاۋاپ بەردى.

جىگىت: ولار دا سەنى جاقسى كورەدى.

داريعا: ولار سويلەگەندە تۋرا سەن سياقتى ءسۇۇۇپ-سۇيكىمدى. سوسىن سەنى ودان سايىن جاقسى كورىپ قالدىم. بىراق ءبىر قىزىق ايتايىن با؟

جىگىت: ايتا عوي...

داريعا: سەنىڭ بۇگىن تاعى گۇل بەرەتىنىڭدى ءبىلىپ، مەن ولاردى "ليۋبيت نە ليۋبيت" دەپ جۇلىپ تاستادىم)))

جىگىت: كەزدەسكەن سايىن گۇل بەرەتىنىمە سەنسەڭ دە، سەنى شەكسىز سۇيەتىنىمە كۇمانمەن قارايسىڭ،ءيا؟

داريعا: ارينە...

جىگىت (قۇشاقتادى): ءبارى جاقسى بولادى جانىم... بىراق كەيدە سەنى شەكسىز سۇيگىم كەلمەيدى...

داريعا: نەگەەە؟

جىگىت: ەرنەست حەمينگۋەيدىڭ تاعدىرىن قايتالاعىم كەلمەيدى.

داريعا: سەنى سونشاما قورقاق دەپ ويلاماپپىن))) قورقاق! قورقاق!

جىگىت: ەرنەست ءوزىنىڭ مۋزاسى اگنەسسانى بار ىقىلاسىمەن جان-تانىمەن ءسۇيدى. امەريكادان حاتتار يتالياعا قارشا جاۋىپ تۇردى.

داريعا: سودااان؟

جىگىت: بىراق ءبىر كۇنى قانداي حات العانىن بىلەسىڭبە؟

داريعا: قانداي؟

جىگىت: «ماعان ءجيى حات جازۋدىڭ قاجەتى جوق. مەن ءسىز ويلاعانداي ايەل ەمەسپىن. مەن ءوزىمدى دولى ايەلمىن دەپ سانايمىن. اشۋلانباڭىز. ساۋ بولىڭىز!» دەپ جازىپ جىبەرىپتى...

داريعا: نە دەگەن قاتىگەز قىز بولعان. شىن سۇيمەگەن بولىپ تۇر عوي يا...

جىگىت: شىن سۇيمەگەن ەمەس. ءوزىن ەرنەستكە لايىق ساناماعان.

داريعا: ااا))) ۇرىسپاشى... قاز ا تاك رەنجي سالام...

جىگىت: ماحابباتتى تولىق تۇسىنبەيسىڭ، جانىم.

داريعا: ءتۇسىندىرشى ال...

جىگىت: قاتتى ءتۇسىنىپ كەرەك ەمەس. كوپ بىلگەن زيان.

داريعا: نەگە؟

جىگىت: تەك كلەوپاترا سياقتى قىلىقتى بولا بىلسەڭ بولدى

داريعا: جارااايد... جانىم، جانىم، مەنى العاش كورگەن كەزىڭ ەسىڭدە مە؟

جىگىت: ارينە

داريعا: ايتىپ بەرشى، نە سەزىندىڭ؟

جىگىت: ايتىپ جەتكىزۋ قيىن.

داريعا: ويي، ايتىپ بەەەرش...

جىگىت: كوزبەن كوز ءتۇيىسىپ قالعان ءساتتى ەسىمە السام)))

داريعا: بىراق سىر بىلدىرمەدىڭ ءيا؟

جىگىت: سول كەزدە ءبىر ولەڭ شىعارىپ ەدىم.

داريعا: وو، وقىپ بەرشى!

جىگىت: وقۋعا ۇيالىپ ءجۇر ەدىم. ال تىڭدا.

سەن ەكەنسىڭ جۇرەكتىڭ سۇراعانى،

بولساڭداعى بالاپان ۇياداعى.

جاسقانۋدى بىلمەيتىن وت جانارىم،

سەنەن نەگە جاسقانىپ ۇيالادى؟

داريعا: ولەڭىڭ وتە كەرەمەت! سەن ۇيالشاق ەمەس ەدىڭ عوي. جاي عانا قورقاق ەمەس، ەندى ۇيالشاق قورقاق بولعانىڭ با)))

جىگىت: راقمەت! ۇيالشاقپىن نەگىزى، بىراق سەن ءۇشىن وتكىر بولۋعا تىرىسامىن. قورقاقپىن. سەن ءۇشىن باتىل بولامىن!

داريعا: مەن سەنى جاقسى-ى-ى كورەمىن! شىنىڭدى ايتشى، مەنىڭ قاي جەرىم ۇنايدى ساعان؟

جىگىت: قاي جەرىم ۇنامايدى دەسەڭشى)

داريعا كۇلدى

جىگىت: سەنىڭ بولمىسىڭدا ماعان ۇنامايتىن جەرىڭ جوق.

داريعا: سەندەر بارلى قىزعا سولاي ايتاسىڭدار يا؟

جىگىت: ءتىپتى تىزەڭنىڭ ءوزى ادەمى.

داريعا: يزۆراششەنەتس!

جىگىت: (باس سالىپ قۇشاقتاپ ءسۇيدى) كىم يزۆراششەنەتس ااا؟ كىم، كىم...

داريعا: ءتارتىپسىز جىگىتسىڭ)) سەنى بۇرىشقا تۇرعىزۋ كەرەك!)))

 

ولار توسەكتەس بولدى.

 

پەردە كوتەرىلدى. داريعا جالعىز جاتىر. ورنىنان تۇرىپ دەل-سال كۇي كەشتى. شارشاپ تۇر. اينالاسىنان جىگىتتى ىزدەدى. جىگىت كەتىپ قالعان. تەلەفون سوقتى.

 

جىگىتتىڭ تەلەفونى بوس ەمەس. بىرنەشە رەت سوقتى. زانيات. تاعى دا سوقتى. « بايلانىس اياسىنان تىس جەردە» دەگەن داۋىس ەستىدى.

 

مەڭ-زەڭ كۇيدە زاتتارىن جيناستىردى. جۇمىس قاعازدارىن رەتتەدى.

 

بىرنەشە قايتا تەلەفون سوقتى. « بايلانىس اياسىنان تىس جەردە» دەگەن داۋىس ەستىدى.

 

سمس جازدى.

 

«جانىم، قالايسىڭ؟ قايداسىڭ...»

 

سۋ قۇيىپ ءىشتى. اقىرىن بارىپ توسەگىنە جاتتى. سمس كەلدى. ورنىنان اتىپ تۇردى.

 

سمس: «ءبىز كەشە ۇلكەن قاتەلىك جاسادىق. ەرتەرەك ايتپاعانىم ءۇشىن كەشىرشى. مەنىڭ وتباسىم بار. ولاردى تاستاي المايمىن. ەندى مازالاماشى..»

 

قۇمىرانىڭ قاسىنا باردى. قولىنا الدى. قۇمىراعا قاراپ سويلەدى.

 

حات

 

قۇدىرەتى كۇشتى قۇداي!!! مەن شاراسىزبىن... سەنگەن ادامىم... ءبارى ءبىر مەزەتتە... تۇكىرگەنىم بار بارىنە! ءتىپتى ويلانۋعا دا مۇرشام جوق. ەندى نە ىستەيمىن؟ كىمنەن الدانىش تابامىن؟ تاعى قانداي تارتۋىڭ بار؟ جىبەرە بەر شەتىنەن! ەشتەمە قالدىرما! تۇگەل جىبەر! نەم قالدى دەيسىڭ؟ بارلىعىنا دايىنمىن!سەبەبى مەن ەندى ءومىردى باسقاشا ءسۇرۋدى باستايمىن! بۇرىڭعى داريعا كورگە كەتتى!

 

ۇلكەن حرۋستال قۇمىرا «شڭڭ» ەتىپ دىبىس شىعاردى. داريعا جالت قارادى.

 

باسىنداعى ورامالىن شەشپەدى.

 

ويلانعان قالپى حاتىن بۇكتەدى. سۇيرەتىلىپ بارىپ، بوس قۇمىراعا العاشقى حاتىن سالدى.

 

سوڭى

 

ايدانا الامان

"ادىرنا" ۇلتتىق پورتالى

پىكىرلەر