Júregimniń ıesi... (úsh kórinisti drama)

521

Fabýlasy: Búginde  qyzmet qýyp júrip otbasyn qurýdy keıinge qaldyryp, qashan kári qyz atanyp qalǵanyn bilmeı qalǵan qazaqtyń qyzdary kóbeıip barady.  Mundaǵy pesada 35 jasqa kelip otyryp qalǵan Darıǵanyń oqıǵasy kesh, tús, tańerteń bolyp, onyń 35-30-23 jastary bir kún ishinde sýretteledi. Darıǵa qııaldan jasap alǵan minsiz hanzadasyn kútip júrip-aq óziniń bul hálge qalaı túskenin ańǵarmaı qalady. Pesada oǵan kereǵar keıipker retinde kúıeýge shyǵyp, sátti otbasyn quryp otyrǵan sińilisi Jansaıanyń kómegi arqyly kári qyzdardyń psıhologııasy ashylady.

 Qatysýshylar:

Darıǵa – Turmys qurmaǵan. Tanymal  qonaq úıdiń basqarýshysy.  35 jasta.

Jansaıa –Turmys qurǵan. Darıǵanyń sińilisi. 28 jasta.

 

Oqıǵa kesh, tús, tańerteń bolyp keri qaraı ótedi. Keıipkerdiń bir kúndik ómiri beınelengenmen, 12 jyldyq ómiri qamtylady.

Birinshi kórinis

 KESh

 Qalalyq páter. Qonaq bólmesi. Elektr jaryǵy janyp tur. Sóre toly kitaptar. Jınaqy dıvan men kreslo tur. Buryshta úlken aına ornalasqan. Ortada 3-4 adamǵa jaıylǵan saltanatty dastarhan. Jansaıa ydys-aıaq tasyp júr.

Syrttan kostıým-shalbar kıgen Darıǵa kirdi. Qolynda noýtbýgi, sán jýrnaldary bar. Zattaryn qoıyp, syrtqy kıimin sheshindi. Túri sharshańqy.

 Jansaıa:  Tusaýkeseriń qalaı ótti? Qarnyń ashyp qalǵan joq pa?

Darıǵa: (kúlimsiredi) Balanyń tusaýyn kesip kelgendeı suradyń ǵoı.

Jansaıa:  Endi...

Darıǵa: Ápkeń endi jaı ǵana qonaq úı qyzmetkeri emes, elıtalyq oteldiń basqarýshysy bolyp taǵaıyndaldy!

Jansaıa: Quttyqtaımyn, janym! Sen oǵan ábden laıyqsyń...

Jansaıa: Tańǵa deıin jazý jazamyn dep, durystap uıyqtamadyń da. Baıandamań jaqsy shyqty ma?

Darıǵa: Jaqsy shyqpasa da jaqsy shyǵaramyn ǵoı. Ýff, sharshadym... Dastarhandy týra men aıtqandaı jasadyń ba?

Dastarhandy tekserip júr.

Jansaıa: Iıa, kishkene myna jerlerdi súrtip jibersem boldy... Bári daıyn!

Darıǵa:  Kıimderim orynynda ma?

 

Kıim aýystyrýǵa shyǵyp ketedi.

 Jansaıa sórelerdi súrtip jatyp IShI HATQA TOLY úlken hrýstal qumyrany syndyryp aldy.

 Darıǵa shala kıinip júgirip shyqty. Sasqalaqtap qumyra qaldyqtaryn jınap jatqan Jansaıany ashýlanyp julqylady.

 

 Darıǵa: Ne istediń sen, Jansaıa?!

Jansaıa: Kesh... Keshirshi... Men... Men... Men ádeıi emes!.. Baıqamaı...

Darıǵa: Skolko raz govorıla?!  Jansaıa...

Jansaıa: Qaz... qazir bárin jınap...

Darıǵa: Pozdno ýje!

 

Darıǵa ony julqyǵan kúıi jerge qaraı ıterip jiberdi.

 

Darıǵa: Sen... Onyń ómirimdegi ornyn bilesiń ǵoı?.. Nege túsinbeısiń, Jansaıa? Bul meniń búkil álemim... Bári kókke ushty. Joq! Bir mezette... Ony qansha izdedim. Kúttim... Endi? Nege bulaı? Tek men ǵana...

 

Darıǵa yzaǵa býlyǵyp jylady.

 

Darıǵa: Senen qansha ret ótindim. Tipti osy qumyranyń shańyn da súrtpeshi, tıispeshi dep... Nege uqpaısyń?!

Jansaıa: Men... jaı... ony ornynan qozǵap, astyn...

Darıǵa: Joǵal! Kózime kórinbe!!! Ýbıraısıa! Ýhodı otsıýda. Ne hochý tebıa vıdet. Ostav menıa!...

Jansaıa: ...

 

Jansaıa shyǵyp ketti.

Darıǵa bólmedegi zattardy jan-jaqqa laqtyrdy.

 

Darıǵa: Quryp ketińder báriń!

 

Jansaıa basqa qumyra alyp shyqty.

Paýza.

Darıǵa: Jansaıa...

 

Jansaıa: Bastaldy... Qazir keshirim suraıdy, jylaıdy. Kúnde osy...

 

Kelip  Jansaıany  qushaqtady.  

Darıǵa: Keshirshi meni... Keshiresiń ǵoı ııa...

 

Darıǵa yzalanyp jylady.

 

Darıǵa: Taǵdyrym nege osylaı jazyldy eken?!. Qaı qylyǵyma berildi? Ómir býmerang desek, qaı jerde shalys bastym???

Qazaq qyzyq halyq... Qyzdaryn aıalap, mápeleýden aldyna jan salmaıdy. Tórge otyrǵyzyp qurmettep, sózin eki etpeıdi. Al, sol qyz 20-dan assa boldy, turmysqa shyqpaǵany úshin qaýym bolyp, tipti qoǵam bolyp qyspaqqa alady, shektete bastaıdy. Mańdaıǵa jazylǵan taǵdyr uǵymynan attap, bári qyzdyń ǵana qolynda turǵandaı  kóredi.

...Aspanda ushqan qusqa uzaq qarap súısinemin. Birde joǵary, birde tómen qalyqtap ushyp bara jatqan sátin jıi elestetemin. Meni túsinbeıtin qoǵamnyń kóginde ushqym keledi.  Qalyqtap...

Men ózgerdim... Mundaı emes edim. Burynda tez jylaǵysh kóńilshek, áldeqaıda meıirimdileý boldym. Biraq qoǵamǵa bul qasıettiń bir tıynǵa da qajet emes ekenin uǵyndym. Anyǵyn aıtsam uǵyndyrdy! Janymdaǵy áljýaz erkekterdi kórip, olardyń boıynan izdegen qasıetterdi óz ishimnen óndirip shyǵara bastadym. Birte-birte týa bitti qasıetimdeı bolmysyma ábden dendep aldy. Al ol súmelekter, menen áli qyzǵa tán qylyq kútedi. Bárine namyssyz, usaqtalǵan, ekijúzdi, áljýaz erkeksymaqtar kináli!..

Men sııaqty qyzdarda, ıaǵnı jas dene ishinde óz janyn taptap, esesine basqanyń bolmysyn quıyp alǵan adamda  qandaı ińkár sezim bolýy múmkin? Essiz ǵashyq bola almaımyn. Sebebi sezimin aqylǵa jeńdire bilgen adamda  esep basym bolady. Ol azdaı, qoǵamnyń, tipti jaqyndarymnyń salǵan jarasynan qorǵaný úshin janymdy qalyń saýyt qorǵap tur. Tipti mahabbatty da ótkizbeıdi...

Biraq tabıǵat óz degenin jasamaı qoımaıdy eken. Tańǵy shaıdy jalǵyz ishý... Tipti kınoǵa da jalǵyz barý... Túnde jalǵyz jatý... Qansha jerden sharshap tursań da kózińe uıqy ilingenshe tósekte aýnaı-aýnaı kórpege oratylyp qalasyń Syrt kózge syr bildirmegenimmen, ishim alaı-dúleı, Áriptesterim úshin árqashan tórt qubylasy teń adammyn. Sharshap ketem... Oılashy óziń,  eńiregende etegi tolyp otyrǵan dırektor qaı qyzmetkerine qyzyq bolýy múmkin???

 

Darıǵa biraz tynyshtaldy...

 

Darıǵa: Jansaıa, maǵan renjimeısiń ǵoı ııa?! Men mundaı emes edim. Ózim de túsinbeımin... Osylaı tez nársege ashýlanatyn bolyppyn. 35-ke keldim mine... Qartaıaıyn degenim be... Keshirshi... Sonshama dastarhan jaıyp kútken de kelmedi ǵoı. Nege kelmedi eken a?!. Ylǵı osylaı sebepsiz joǵalyp ketedi... Kózime kórinbeıdi.

Jansaıa: Ol...

Jansaıa ózimen-ózi kúbirledi.

Jansaıa: Osynyń kelip bolmaıtyn bolashaq kúıýine dastarhan jaıýdan-aq sharshap bittim. (Darıǵaǵa qarap) Ol...

Darıǵa: Aıtpa! Ol týraly eshkimniń aýzynan estigim kelmeıdi. Ol tek meniki. Boldy!

Jansaıa: Biraq, Darıǵa...

Darıǵa: Búgin tym kesh bolyp ketti, qasyma qonshy. Kúıeýińe telefonmen eskert. Balańdy jaqsylap qarasyn, bir kúnge eshteme etpes. Qala shetindegi úıińe búgin jetpeısiń. Esesine erteń demal.

Jansaıa: Biraq, kúıeýim renjıdi ǵoı...

Darıǵa: Renjigishin! Júrińder sol kúıeýlerińniń asty-ústine túsip, kóńilin taýyp! Endeshe, meniń kóligimdi aıdap ket. Biraq  tańerteń erte kel!

Jansaıa: Qarańǵyda... jaqsy júrgize almaımyn... Jaraıdy, kúıeýime bara almaıtynymdy aıtyp kóreıin, renjise de...

Darıǵa: Óziń bil. Myna jerdiń barlyǵyn tez jınap, alyp ketshi.

 

Jansaıa qumyrany aýystyrdy.

Esiktiń  qońyraýy soǵyldy.

Darıǵa ornynan atyp turdy.

Darıǵa: Keldi me?

Jansaıa: Bul kim boldy eken?

Darıǵa: Sen ashshy. Tez!

Darıǵa ózin tez retke keltire bastady.

 

Jansaıa tesikten qarady. Darıǵany qolyn bulǵap shaqyrdy.

Darıǵa esikti ashty. Jerde turǵan bir qushaq gúldi máz bolyp kóterdi.

 

Darıǵa gúlderdi qushyrlana bir ıiskedi de qushaqtaǵan kúıi aınanyń aldynda teńselip biraz turdy. Dalabyn alyp ernin birneshe qaıtara bir boıady. Shashynynyń artyq jerlerin túzedi. Gúldi alyp, telefonyna birneshe ret  selfı jasaı bastady.

Jansaıa: Ózine ózi joldaǵan gúlge sonsha shattanǵany nesi?!

 

Darıǵa: Kishkene jymııa qalsań boldy ájim, elkı!

Jansaıa: Bir qushaq gúl ustap turyp, qataıyp turǵan qyzyq qoı. Jymısańshy kishkene...

Darıǵa: A chto ne tak? Vrode fotkaıýs. Nýý  nepolýchaetsıa! Ný ladno sfotkaı ty.

Telefondy berdi.

Jansaıa: Ishińdi tart kishkene... Jymı... Jymı... Eki, úsh!

Darıǵa aınaǵa teris qarap turyp, baqytty keıipte birneshe sýretke tústi.

Jansaıa: Qarashy, myna sońǵysy durysyraq shyqty ǵoı deımin...

Darıǵa sýretti kórdi.

Darıǵa: Fý! Chto za vıd?! Okazyvaetsıa mne tak neıdet. Davaı ee raz s drýgogo rakýrsa. Etot rakýrs ne moı...

Taǵy da birneshe ret tústi.

Darıǵa: ný, smotrı, smotrı kajetsıa polýchılos. Vot etot foto ýje normalnoe.

Jansaıa: Salarda fıltrlardan ótkizseń, odan da kúshti bolasyń...

Darıǵa ınstagramyn ashyp, lentadaǵy birneshe adamǵa laık basyp qarap ótti de, óziniń sońǵy sýretin saldy. Post jaza bastady.

 

Post: Gúlder ómirimizdiń...

Darıǵa: Osy basqa qyzdarǵa uqsap bir jazyp kóreıinshi. Keıde qyzyǵam solarǵa...

Darıǵa jazǵanyn óshirdi de, oılandy...

 

Jansaıa: Aldyndaǵydaı «Jigitim sýretke túsireıinshi dep boı bermeı qoıdy» degendeı jazyp júrme, men taǵy da aınadan kórinip turmyn.

Darıǵa: Aıta bermeshi sony meni uıaltyp (kúldi). Rasynda da sol uıat boldy ıá?! Qalaısha baıqamaı qaldym  a?!

Jansaıa: Qaıta 10 mınýt bolmaı kórippin...

Darıǵa: Sonyń ózinde 500 adam laık basyp úlgeripti, al qanshamasy jaı kórip, kúlip ótti eken?! Uıat-aı... Áı, qoısh sony! Ádeıi jasaǵan prıkolym deı salarmyn azar bolsa.

Darıǵa: Osy joly sen kórinip turǵan jerdi qıyp tastadym.

 

Post:

#JúregimnińIesi meni qýantýdan jalyǵar emes...

 

Postty jarııalady. Jansaıaǵa kósetti.

Darıǵa: Qalaı?

Jansaıa: Vaı-vaı-vaı... Degenmen myna obrazyńa jarasatyn sııaqty...

 

Darıǵa jınalǵan shashyn bosatyp, jaı ǵana býa saldy. Úı kıimderin kıdi. Pomadasyn súrtti.

 

Darıǵa: Shaı isheıikshi. Qyzyldap turyp daıyndashy!

Jansaıa: Qyzyldap?

Dastarhanǵa otyrdy.  Darıǵa olardy  asap jeı bastady.

Darıǵa: Dál solaı...

Jansaıa: Dıeta she?

Darıǵa: K chertý dıetý!!! Kóńil-kúıim joq.

Jansaıa: Jumysyń durys bolmaı júr me?

Darıǵa: Suraq qoıa bermeshi... Sodan basqa problemam joq deısiń be? Jalpy meniń jumysymda eshqashan problema bolǵan emes, bola qalsa da sol mezette sheshýge kúshim ábden jetedi!

Jansaıa: Soǵan bola sonsha ashýlanǵanyń ne? Jaı suradym ǵoı...

Darıǵa: Suramash eshteńe, suramaaa!!!

Jansaıa úndemedi.

Jansaıa balalaryna telefon soqty.

 

Jansaıa: Allo, qyzym?! Qalaısyńdar? Papań keldi me? ... Tamaq she? ... Mmm, jaraıdy botam...

Jansaıa muńaıa tutqany qoıdy.

Darıǵa: Olarǵa kúnine 5 ret zvondamasań bolmaı ma osy? Baqsyn anaý! Qarasyn durystap!

Jansaıa: Qoıshy boldy... Onsyz da jetisip júrgem joq.

Darıǵa: Balany ne úshin týasyńdar osy topyrlatyp? Óz ómirlerińdi durystap súre almaı júrip, olardyń da ómiriniń kúl-talqanyn shyǵaryp!

Jansaıa: Ár balanyń óz nesibesi bolady deıdi. Peıilderine qaraı áli-aq bári ońalar...

Darıǵa: Bir ǵana balanyń taǵdyry bolsa bir sári. Órimdeı 3 qyz! Árıne, birden ul týyla qoımaǵannan keıin josparsyz topyrlatyp týyp... Uldy murager jasaıyn dep pe edińder? Kúıeýiń qaı dəýletine orynbasar izdep júr? 20 jyldyq ıpotekasyna ma, əlde 10 jyldyq kredıtine me? Mıllıondap tabys tabatyn holdıngi bolsa, maqul-aý. Orta kəsibi bolsynshy, hotıa by...

Jansaıa: Biz jetpegenge, balalarymyz jeter buıyrtsa...

Darıǵa: Odan da kúıeýim "kezinde chert bolyp, jumys istemeı, maqsatsyz ómir súrip, bərin qur ótkizip aldy. Endi sol qatelikti túzeýdiń quraly retinde bala týdyq", deseńshi. Ókinishke qaraı, ol da dəl ózi sııaqty joly bolmaǵan sorly bop ósýi múmkin!

Jansaıa: Nege túsinbeısiń sen?.. Balaly úı - bazar, ómir olarsyz qyzyq emes!  Ómirimdi olarsyz elestete de almaımyn.

Darıǵa: Aha, kóńil kóteretin təsildi taýypsyńdar! Ol bala kóńiliń men kózińe ləzzat syılaý úshin aldymen ınvestıııa kerek! Tamaǵyn berip, kıimin bútindep, tərbıe, bilim berý kerek. Al, oǵan kape aqsha kerek!

Álde, erteń "Aqsha joq" degen sózdi balasyna dəl ózińderiń sııaqty qaıtalaıtyn taǵy bir "neýdachnık" kerek pe bul ómirge? Jalpy sendeı áıelderge qarasam janym ashıdy. Ne durys demalmaıdy, manıkıýr, pedkııýr degenniń ne ekenin de bilmeıdi!

Jansaıa: El kórip, jer kórip júrgen kózi ashyq adamsyń ǵoı.  Tym bolmasa, ultymnyń sanyn kóbeıteıin dep te oılanbaısyń ba osy?

Darıǵa: Al sender tochno qazaqtyń sanyn kóbeıtkileriń kele me, əlde, dúkenge nanǵa, temekige jumsaıtyn, pýlt pen zarıadkany izdetetin qul kerek pe? Menińshe...

Jansaıa: (ashýlanyp) Saǵan daýa joq eken!

Darıǵa: Bizdiń dəl qazirgi qoǵamda bala əldeneniń quraly ǵana. Zaletpen kúıeýge tıip alý úshin, otbasyn saqtaý úshin, týǵan-týystyń qysymynan qutylý úshin, jalǵyzdyqtan qashý úshin, anaý úshin, mynaý úshin... əıteýir "úshin" ǵana!

Jansaıa: Dál osy pikirlerińdi ózgertpeseń sen eshqashan ońbaısyń sen! Beıshara...

Jansaıa bólmeden jylap shyǵyp ketti.

 

Darıǵa alasura bastady. Jyldamdatyp basyna oramal taqty. Kózildirigin kıip, kompıýter aldyna otyrdy. Basyn joǵary kóterip, kózin jumyp kishkene otyrdy da jazýǵa kiristi.

 

HAT

Qurmetti... (óshirdi). Asa mártebeli... Jaratýshy!

Meniń oıymdy tym bolmasa sen túsinshi. Nege solaı? Adamdar qalaı aqymaq? Bári bir-birine ynqtyq. Al meniki...  Ol joq! Bir jerden kórindi. Biraq kóre almadym. Qupııa júredi. Jasyryndy. Tek

sulbasy. Sharam taýsyldy.  Sharshap, qaljyradym.

Kelmeıtin bolǵany ma?! Bárine senýden qaldym...

 

Basyndaǵy oramalyn julyp alyp tastady. Prınterden hatty shyǵardy.

 

Darıǵa jazǵan hatyn MYJYP-MYJYP búktelgen hatqa TOLY hrýstal qumyranyń  ishine saldy.

 

Ol nege kelmeıdi? Menińshe bizdiń jigitterde ishki kompleks bar. Qyzdardan otkaz alýǵa qorqady. Sebebi ákesi kezinde «meniń balam batyr» dep mıyna ábden quıyp ósirgen. Al ondaı ul unatqan qyzy betin qaǵyp jiberedi me dep boljam jasap alady. A vdrýg ol sezimin qaǵyp jiberip, dostaryna prıkol ǵyp aıtady? Al qyz symbatty, ədemi, minezdi bolsa, qorqynyshy eki ese kóp, əlbette.

Odan da momaqaı, túri de onsha emes, kónbis bireýdi kózdep, nysanaǵa dóp túsken tıimdirek. Týsovkalarda mólıip otyrǵan qyzdardyń kúıeýge tez shyǵyp ketetinin talaı ret kórgenmin.

Al, ózine ne keregenin anyq biletin qyzdar munda naǵyz baıqus! Kóńili aýǵan jigitke sezimin ashyp aıta almaıdy. Sebebi qazaqta ondaı bolmaǵan, uıat! Əri, qyzdyń synyp qalǵanyn bilgen jigit tek qana óz paıdasyn oılap ýaqyt ótkizip, qalaǵanyn jasaıdy. A vdrýg əbden əýrelep, sońynda tastap ketedi? Odan da qansha qınalsa da, jastyq qushaqtap jalǵyz ótkeni tıimdirek emes pe?! Men de qadirsiz qalýdan qashamyn...

 

Telefon shyryldady.

Telefon tutqasyn kóterdi.

 

Darıǵa: Allo?! ... Iá, tyńdap turmyn. Qaıdan deıdi? ... Treınıngti túnde de júrgizetin bolǵansyzdar ma? ...Mhm. Túsinikti... Birinshiden, ýaqytyn umytyp ketippin, ekinshiden endi qatyspaımyn. Men solaı sheshtim. Aıyp etpeńiz... Kúıeýdi sizderdiń treınıngterińiz arqyly tapsam, endigige deıin 10 kúıeýge tıetin ýaqytym boldy. ... Joq, tizimnen shyǵaryp tastańyz! Saý bolyńyz!

 

Tutqany qoıdy.

 

Hm! Treınıng deıdi ǵoı! 2 jyldan beri ol týraly dıssertaııa jazatyn ýaqytym boldy.  Barlyǵy solardyń aqylyna qarap tursa... Nado je?!.

 

Ústel ústindegi shaqyrý bılettegi sýretke kózi tústi. Qolyna aldy.

 

Qasymda júrgen Gúljanat ta turmysqa shyqty de sonymen... Jurttyń-aq joly bolǵysh. 1-2 aı júrip, qol ustasyp úılenip shyǵa keledi. 3 aı buryn kúıeýi maǵan kelip turatyn. Ol kezde áli Gúljanatty tanymaıtyn.

Biz Dýbaıdaǵy otelde tanystyq. Tańǵy as iship otyrǵanmyn. Dál mundaı kúıdi eshqashan sezinbeppin. Qansha tyryssam da ózimdi basqarýdan qaldym.  Sebebi ol janyma keldi!

Ol naǵyz jigittiń tóresi edi. Eki ıyǵyna eki kisi mingendeı nakachennyı! Iisi mmm.. prıanyı, obvolakıvaıýıı! Naǵyz erkekke tán ótkir ıis. Ony sezgennen bastap erkimnen aıyrylyp, mas boldym!

 

Jigit: Vıskı? Álde Rom?

Darıǵa: Vıskı...

Jigit ákelip berdi.  

Darıǵa: Jigitim, men vıskı dedim...

Jigit: Rom!

Darıǵa: Vıskı !

Jigit: ROM!

Darıǵa: Vıskı!

Jigit: ROM!

Darıǵanyń betine vıskıdi shashyp jiberdi.

Olar qarsylasa bıledi.

Darıǵa: Ońbaǵan! Qyz dep te aıamaıdy!

 

Da poshel ty  k chertý! Eki qoshqardyń basy bir qazanǵa sımaıdy.

 

Ekeýińdi de jek kórem! Jek kórem! Bárińdi...

 

Sýretti jyrtyp-jyrtyp tastady.

 

Oılap otyrsam... Bul ómirden kim jalǵyz ótpeı jatyr? Jas kezinde jigitterdi ábden sapyrǵan Merılın Monro da... Djeın Ostın... Koko Shanel... Barlyǵy da «shyn ǵashyqtar qosylmaıdy» degen támsildi qaýzap ketken beıbaqtar. Ózderin solaı jubatýdan basqa amaldary da joq. Jalpy sol ne sóz??? Shyn ǵashyqtar qosylmaıdy degen ras pa? Menińshe, adamdardyń barlyǵy bir-birine shyn ǵashyq bolady. Qosylǵasyn turmystaǵy urys-kerister týyndap, bir-birine sýyna bastaıdy. Sebebi pende ǵoı! Pende pendeshiligin jasaıdy! V-o-oot, sol kezde otyrady qııaldap, «negizi «anaaaý» shyn ǵashyǵym bolǵan, soǵan qosylǵanymda ǵoı...» dep. Sebebi onymen ursysyp úlgermeı qalǵan ǵoı))) Kak býd-to sonymen qosylsa túk ursyspaıtyndyǵyna, ómir boıy qyzyǵynyń bitpeıtindigine bireý kepil bolyp turǵandaı. Qyzyq!.. Sosyn eki kúıeýmen ómir súredi. Biri tek mıynda, ekinshisi janynda júredi. Sonda... Qaısysy ómirlik jar?

 

Birde anamnan senimdi ómirlik jardy qalaı tabýǵa bolady dep suraǵanymda: Qyzym, Jaratqan shyn máninde pendesiniń mańdaıyna ózine tıesili taǵdyryn jazyp qoıǵan. Imandyǵa ımandy, zulymǵa zulym, jalqaýǵa jalqaý jar kez bolady. Sen eń aldymen ózińdi damytýǵa tyrys. Kúıeý izdeme, ózińdi izde, ózińe ne kerek ekenin túsin, sonda jaqsy kúıeýdiń ózi seni izdep tabady, - degen edi. Men osy sózdi jadymda ustap, kóńilime toqydym. Al sen qandaısyń sonda? Meni nege taba almaı júrsiń? Bálkim... qııalymda ǵana qalǵanyń durys shyǵar... Qoldaryń qandaı qýatty edi... Kózińdegi meıirimdilikke shomylǵym keledi...  Demińe erip baramyn... Ishime myńdaǵan kóbelek uıa salyp alǵandaı. Jan dúnıemdi shymyrlatyp...  Ózińmen birge alyp ketshi... Basqa álemde ómir súreıik. Birge...

 

Paýza.

 

Maıysyp qaldy. Óz-ózine qarap qysylyp, tómen qaraǵyshtaı beredi. Ózin jigittiń aldynda turǵandaı sezindi. Erkelep tur.

 

Óziń ǵoı endi... Sen meni jylata bermeshi. Men te-e-ez Lenjip qalam... (tómen qarady)

Paýza.

Qydyraıyqshy... Mmm... Mysalyyy?.. Shýly jerden jalyǵyp ketkem. Odan da mysaly, parkke. Typ-tynysh saıabaqqa. Ekeými-i-z ǵana. Qol ustasyp...

O-oı, ómiri súıtesiń... Nege?

Kelshi! Odan da bıleıik.

 

(Bıdiń bas jaǵy baıaý bolǵanymen, jartysy ctreptız goý-goý bıine jalǵasady.)

 

Mýzyka oınap tur. Sahnaǵa kók tústi jaryq jandy.  Juqa  penıýar kıgen Darıǵa bıleı bastady. Jigitti bıge shaqyrdy. Mahabbat. Yntyq sezim. Jigit ketti.  Jaryq kómeskilene bastady. Mýzyka daýysy ortaıdy. Darıǵa ústelderdiń astyna kirip búrisip jatty.

 

Ekinshi kórinis

 

TÚS

Darıǵa 30 jas shamasynda. Bólme qaıtadan jaryq boldy. Darıǵa ústeldiń astynan shyqty.

 

Darıǵa: Ústelderdi ústime úıip tastaǵany nesi? Denemniń bári aýyryp tur. Men ne istep jatyr edim ózi... Aaa, as úıge obed ishýge bara jatyr edim ǵoı. Aıaǵym... synyp qalǵan ǵoı deımin. Aqsańdap júrip ony qalaı qarsy alamyn sonda?  Joq... synbaǵan sııaqty... Onda nege aýyryp tur a?! Bári seniń kesirińnen! Qarashy sen úshin ózimdi taǵy qurban ettim...

Jansaıa?! Úıdesiń be? Ákelgen azyq-túlikti kórdiń be? Keshke deıin úlgermeı qalmaıyq. Dastarhan daıyn bolmaı uıat bolmasyn! Keshegi aıtqanym boıynsha týraı ber salattardy. Joq, tura turshy. (ornynan atyp turyp, óz-ózine suraq qoıa bastady) Ol ózi qandaı salattardy unatýshy edi???

Balyq qosylǵan?..  Qosylmaǵan?..

Balyq jegen jaqsy ǵoı. Densaýlyqqa paıdaly. Qosylǵanyn unatqany durys... Jansaıa, balyq qosa ber. Basqa da tamaqtaryńdy da dámdilep jasarsyń...

 

Teledıdar qosty. Arnalardy aýystyryp kórdi de, óshire saldy.

 

Búgingi kóńil-kúıime saı eshteńe joq eken. Tipti mýz.kanaldardyń ózi  kak to... traýrnyı... muńdy. Bárine ne kóringen?!.

Kútken adamym kele jatyr. Odan asqan baqyt bar ma?! Jansa-a-ıa, menen kómek kerek pe?

(ózimen ózi)Áı, biraq ashana jaǵy qolymnan kele qoımas.

Jansaıa, keshke deıin úlgermeı qalmaıyq áıteýir...

 

Jańyltpashyn kóńildene birneshe qaıtalap aıtty.

 

Han balasy hanzada

Boldy ǵashyq hanshaǵa.

Alyp hannan habar,

Hanshaıymdy tabar.

 

Telefon shyryldady.

Allo! Iá... Sálemetsiń be? ... Túsindim. Nurjan, ony keshegi aıtqanymdaı jasańyz! 25-ne jınalys jasaımyz. ... AQSh-pen áli baılanysqa shyqpadyńyz ba? Ne istep júrsizder osy kezge deıin? ... Ok! Ózim sóılesip, basshylyqqa bir habaryn beremin.  Jaqsy! Nurjan, tapsyrmalardy tyńǵylyqty atqaryp úırenińiz! ... Kóriskenshe!

 

Tutqany qoıdy.

 

Sondaı melochtardy maǵan aıtpaı-aq qoısa da bolady ǵoı. Joq, mindetti túrde aıtý kerek, mazalap...

Taa-a-k, qýanyshymdy qaı qurbyma aıtyp maqtansam eken... Gúlsim! Oı, biraq ol balasynyń qylyǵy men enesin jamandaǵannan basqa áńgime bilmeıdi. Odan da... Marjan! Biraq ol taǵy jan-janýarlardy qorǵaýǵa arnalǵan konferenııalardyń birinde otyrǵan shyǵar... Nazerke qalaı toqal bolyp júrgenin aıtyp aýzy bosamaıdy. Qoısh sony... Basqa kim bar edi ózi... Qatar-qurby da qalmady...

 

Telefon shyryldady.

 

Taǵy qaısysy...

Allo! Aha, qalyńyz qalaı? ... Mende bári oıdaǵydaı. ... O-o-o, durys bolǵan eken. Ne jańalyq? ... Mmm... Erteń deısiz be? Barlyq týysqandardy shaqyrsańyz tipten jaqsy bolǵan eken. Shúıirkelespegeli kóp boldy.... Sizdiń baýyrsaǵyńyz ben beshbarmaǵyńyzdyń dámi áli tańdaıymnan ketpeı júr ǵoı. ... Ýaqyt bolsa, barýǵa óte qatty tyrysamyn, apaı. ... Sizder de men jaqqa kelip qaıtyńyzdar. ... Keshke únemi úıdemin ǵoı. ... Aha, Jaqsy! ...

Saý bolyńyz!

 

Telefon tutqasyn qoıdy.

 

Qalaǵan adamǵa ýaqyt álbette tabylar. Biraq men barmaımyn. Sebebi árqaısysynyń «Qashan turmysqa shyǵasyń?» degen suraqtarynan ábden jaýyr boldym. Bas-basyna kórgen saıyn qaıtalap suraı beredi, suraı beredi... Kak býdto ıa vse resha-a-aıý ı vse v moıh rýkah!.. Ooo, odan qalsa eski dáýirlerden qalǵan barlyq jalǵyz basty erkektermen tanystyrǵysh... Ózimdi jer betindegi ótpeı júrgen eń sońǵy qyz sezinip ketem ondaı kezderi. Aýzynan sózi, ústinen bózi túsip qalǵan nebir jigitterge telefon nomerimdi beretinin qaıtersiń?! Ol baıqustar turady sosyn, hal suraýdan ary asa almaı. Ondaılarmen birden qoshtasamyn. Good bye! Erkek – erkek sııaqty bolý kerek!

 

Qolynda taqtaı, pyshaǵy bar, aıaǵyaýyr Jansaıa keldi.

(Darıǵa dıvanǵa otyrdy. Kosmetıka jýrnaldaryn paraqtady.)

Mysaly, myna jigitterdeı symbatty, qarasań kóz toıarlyq! Mýjestvennyı! Bireýge mynaý meniń kúıeýim degende de uıalmaı kórsetetindeı...

Paraqtardaǵy ıis sýlardyń probnıktaryn qolymen úıkep ıiskep, rahattandy. Ár paraǵyn ashyp ıiskedi.

Jansaıa, myna jýrnaldyń jańa sanyna tapsyrys bere ǵoıshy. Iisteri kete bastapty....

Qolynda taqtaı, pyshaǵy bar Jansaıa keldi. Darıǵanyń janyna otyryp týraı bastady.

Jansaıa: Osy nege erkekterge arnalǵan ıis sýdyń bir flakonyn túgel satyp ala salmaısyń?

Darıǵa: Bireý kórip qoısa uıat? Erkegi joq úıde ıis sýy neǵyp tur dep oılap qalmaı ma?

Jansaıa: Tyǵyp ıiskep júr.

Darıǵa: Ol bitkenshe jalyǵyp ketpeımin be ol ıisten? Jalpy birnárseni uzaq ýaqyt tutynsań, odan sharshap, jalyǵyp ketesiń ǵoı. Osy senderde kúıeýge tıerde odan jalyǵyp, basqa bireýdi unatyp qalsam qaıtem degen qorqynysh bolǵan  joq pa?

Jansaıa: Shyn ǵashyq bolyp turmysqa shyqsań ol oı mıyńa da kelmeıdi.

Darıǵa: Ne nársege bolsa da qansha jerden yntyǵyp, unatyp tursań da, qolyń jetken kúni arman da óledi degendeı, bir kúni qyzyǵy taýsylyp, kóńiliń sýyp qalýy múmkin ǵoı...

Jansaıa: Jas jubaılardyń qyzyǵy taýsylmaıdy, sebebi ýaqyt óte kele jaı ǵana kúıeý emes, baýyryń sııaqty bolyp ketedi. Mahabbat úlken baýyrmaldylyqqa aınalady.

Darıǵa: Bilesiń be, menińshe jigitter baraholkada satylyp turatyn kóılekter sııaqty.

Jansaıa: Qalaı sonda? (kúldi)

Darıǵa: Esińde me stýdent kezimizde stıpendııa túsken boıda baraholkaǵa qaraı ushatyn edik qoı.  Men sonda bir kóılekti bir kún boıy aralap izdep júretinmin. Bireýsin tabasyń qymbat, qaltań kótermeıdi kedeı qyzdardy jaqtyrmaıtyn tym baı jigitter syndy. Endi bireýiniń modeli kelse, túsi jaraspaı qalady, ıaǵnı aqyldy, biraq túri onsha emester, endi biriniń saǵan shaq kólemi tabylmaıdy. Iaǵnı jasy tym úlken aǵaılardyń  sóz aıtatyny sııaqty. Bireýiniń modeli de, túsi de, razmeri de oıdaǵydaı bolǵanymen, kıip kórseń birsumdyq, ózińdi dıskomfort sezinesiń. Ondaı jigitter de kóp boldy, bilimi, aqyly, túri, qaltasy saı kelip turǵanymen, jaqyn aralasa kele áıteýir tartpaıdy, qarym-qatynasta garmonııa tappaısyń.

Jansaıa: Teńeýleriń qyzyq eken.   Bunyń dál baraholkaǵa qandaı qatysy bar sonda?

Darıǵa: Eń qyzyq jeri sonda, baraholka tym úlken ǵoı, tań atqannan bastap kún batqansha qaıdan kirip-qaıdan shyqqanyńdy bilmeı aralaı beresiń, aralaı beresiń, budan da jaqsysy tabylatyn shyǵar degen úmitpen jarasap turǵan kóılekti almaı júre beresiń, júre beresiń... Kesh batyp, saýdagerler jınala bastaǵan sátte tapyryqtaısyń kep. Ne  baǵana jarasqan kóılekterdi qaıtyp baryp tappaısyń, ne qaıtadan basqasyn izdeıtin ýaqyt joq.

Jansaıa: Pysyq, aqyldy qyzdar birden sheshim qabyldap alyp ketken bolar (kúldi) .

Darıǵa: Solaı sııaqty...   Bolaıyn dediń be?

Jansaıa: Týrasyp jibermeseń bitpeıtin túrim bar.

Darıǵa: Davaı, qaısysyn?

Jansaıa: Mine...

Darıǵa:Úshburyshtap týraıyn ba?

Jansaıa: Iá, Solaı.

 

Paýza

 

Darıǵa: Jansaıa, sezesiń be men sondaı baqyttymyn! (Kenet esine birdeńe túsip kettti) Qazir...

 

Darıǵa ornynan turyp, kompıýter aldyna jaıǵasty. Jan-jaǵynan izdep oramalyn taýyp, basyna saldy. Kózildirigin kıdi. Basyn joǵary ustap kózin jumyp biraz otyrdy da jazýǵa kiristi.

 

HAT

Qurmetti, jaratýshy! Qudiretińniń arqasynda

Sheksiz baqytqa ıe bolaıyn dep otyrmyn.

Rahmet, saǵan! Tek... Tek uzaǵynan súıindir...

 

Prınterden shyǵardy.

Hatty ádemilep búktedi. JARTYLAI HAT TOLǴAN hrýstal qumyraǵa aparyp saldy. Oramalyn áspettep sheship qasyna qoıdy.

Ony kórgen Jansaıa basyn shaıqap myrs etti.

Darıǵa stolǵa kelip, salat týrasa bastady.

 

Paýza

 

Darıǵa: Kóp kúttim, óte kóp...

Jansaıa: Qonaqtar tezirek qaıtatyn shyǵar...

Darıǵa: Tipti jarty ómirim ótti desem de bolady.

Jansaıa: Ómir áli alda ǵoı...

Darıǵa: Saǵan solaı bop kórinýi múmkin. Kúıeýiń, balań bar.

Jansaıa: Kún sýytty. Jyly aıaq kıim alyp berý kerek edi.

Darıǵa: Ony kútken ár ýaqytymdy paıdaly iske jumsaǵym keldi. Nátıjesinde...

Jansaıa: Balamyzdy eshtemeden kem qylmaı ósirgimiz keledi.

Darıǵa: Nátıjesinde sabaq pen qyzmetke aldanýǵa tyrystym. Stýdent kezde DAIaShY, joǵarǵy kýrsta – ADMINSTRATOR, magıstratýrada – ATQARÝShY MENEDJER,  mine BAS MENEDJER  boldym. Bári jalǵasa berdi ony kúte-kúte. Mine...

 

Jansaıa: 30 jas!  Oqyǵan degen jaqsy ǵoı. Biz kúıeýimiz ekeýimiz kolledjden ary oqymadyq, kúıbeń tirlikpen...

Darıǵa: Birdemeden qur qalatyndaı kúıeýge tıip, oqýdy tastap ketken ózińnen kór. Sen joǵarǵy oqý oqysyn dep ansha tyrystym.

Jansaıa: Balam úıge mysyq ákelgen eken, tamaq jemeı qalypty.

Darıǵa: Ómir osylaı bolady dep kim oılaǵan?..

Jansaıa:  Áli jaspyn ǵoı. Oqyp alsam bolady.

Darıǵa: Balany kem qylmaı ósirgimiz keledi emes, ósirýge mindettisiń!

Jansaıa: Erteń joldasym úıde monsha jaǵyp qoıamyn dedi. Monshaǵa túsip ket!

Darıǵa: Botoks jasatqan betterge monshanyń bolmaıtynyn bilesiń ǵoı...

Jansaıa: Botoks saldyra bergenshe, ekomen bir bala saldyryp alsańyzshy...

Darıǵa: Qoıshy, sosyn ákemniń betine qalaı qaraımyn?!

Jansaıa: Onda asyrap...

Darıǵa: Nege búgin tym aqyldy bolyp ketkensiń, Jansaıa! Basym jerge jetip turǵan joq, nebári 30-aq jastamyn. #JúregimnińIesine turmysqa shyǵyp, ózim-aq bosanamyn!

Jansaıa: Búgin ǵana kórsem de kúıeýimdi saǵyndym... Úıge ketkim kelip tur.

Darıǵa: Sport zalyndaǵy trenerim bala kótergisi keletinder ishke pressti kóp jasaı bermeý kerektigin eskertti.

Jansaıa: Keıde ózim de túsinbeımin, sonyń qaı jerin jaqsy kóretinimdi. Bilimi de joq, túri de onsha emes, mineziniń de ońyp turǵany shamaly, ne aqsha tappaıdy...

Darıǵa: Týylatyn balań da ádemi bolý úshin, symbatty boıy uzyn jigitke tııý kerek...

Darıǵa shattana ornynan turdy.

 

Bilesiń be, onyń boıy menen... Mine, mynadaı uzyn  (qolymen kórsetti).

 

Jansaıa: Saǵan  ortasha boılylar unaýshy edi ǵoı.

Darıǵa: Joq, oıym ózgerdi. Týra Gaýhardyń kúıeýindeı uzyn bolsa eken deımin. Jigittiń uzyn bolǵany jaqsy eken.

Jansaıa: Qyzyq...

Darıǵa: Kózderi so-o-ndaı móp-móldir. Qyr muryndy... Al qoldary qandaı ádemi deseńshi. Keıin neke júzigin taqqanda odan saıyn ádemi kórinetin bolady. Biraq ol tym symbatty bolyp ketse, men qyzǵanamyn. Sebebi qazir qyzdar ózderi júgiredi jigittiń artynan. Sosyn basyn aınaldyryp úılenip alady. Trenıngte sonyń bárin úıretken, tek men olardy jasaǵym kelmeıdi.

Jansaıa: Nege?

Darıǵa: Ný-ý, bilmeımin. Shyndap qalasam jasaı alamyn. Biraq, bilesiń ǵoı, maǵan qandaı jigit kerek ekenin?! Bireýi tym jýas, biriniń túri onsha emes, endi biri kedeı... Oǵan taǵy JMOTtardy qos.

Jansaıa: Kedeı?

Darıǵa: Iá, kedeı! Qudaı-aý, 30-ǵa kelgenshe astynda arzandaý bolsa da bir mashınasy joq jigitten ary qaraı ne kútýge bolady?

Jansaıa: Kedeı baıymaı ma, baı jarly bolmaı ma? Onda turǵan ne bar? Kerisinshe sende bar olar...

Darıǵa: Iá, bar. Al ondaılarǵa qosylsam úıde matrıarhat ornaıdy! Kim kóbirek aılyq alady, bılik báribir sonyń qolynda. Ony kez-kelgen erkek ishteı bolsa da moıyndaıdy.

Jansaıa: Múmkin...

Darıǵa: Sondyqtan, ol menen barlyq jaǵynan alda turýy kerek. Bilim, aqyl, aqsha...

Jansaıa: Ondaı jigitti tabý qıyndaý... Menińshe, saǵan jýas, baǵynatyn kúıeý kerek sııaqty. Óziń súırep júresiń.

Darıǵa: Joq, Jansaıa! Qatelesesiń... «Baıtal shaýyp báıge almas». Ákem aıtqan... (paýza)

Jansaıa: Sen osy qııaldan jasap alǵan ıdealyńdy izdep ýaqyt ótkize bermeı, bir ýaqyt aınalańa qarap kórseńshi. menińshe, sen izdegen júregińniń ıesi dál janyńda júr!

Darıǵa: Joq! Olar maǵan unamaıdy!

J ansaıa: Oı, qııal!

Qoıshy, odan da túrimdi retke keltireıin keshke deıin. Jaqtyrmaı ketip júrmesin (kúldi).

 

Paýza. Darıǵa jastyqty bala qylyp orap, mápelep júr.

 

Ol keledi... Kezdesemiz...  Keremet!

 

Jańyltpashty ÁRTÚRLI MÁNERDE birneshe  ret  aıtady.

 

Taýdan túsip keledi taý uldary,

Taý uldary súıedi qaýymdaryn.

Taý uldary súıedi aýyldaryn,

Tamashalap júredi taýyn, baǵyn.

 

Gúl ákeler me eken a?!

Keshte sharshaý kórinbeı, 1 saǵat jatyp tynyǵyp alaıynshy.

(Paýza)

Darıǵa tósekke jatty.

Darıǵa: Jalǵyzdyq degen ne osy?

 

38 jas: Menińshe,  jalǵyzdyq degen – Taǵdyr. Sebebi ony eshkim basyna tilep almaıdy.

28 jas: Joq, 38 jas sen qatelesesiń! Menińshe – erkindik! Sebebi  qaıda baram, ne ishem, ne jeımin demeısiń. Rahat!

35 jas: Oı, 28 sen de bir aıta beredi ekensiń! Jalǵyzdyqta adam erkin bolmaıdy.

30 jas: 35! Oıyń durys.  Sebebi jalǵyzdyqtyń keńistigi tar. Sol jerde qysylyp ómir súrýge májbúrsiń!

28 jas:  30 jas! Ne degen qatigez ediń   – menińshe, jalǵyzdyq degen senim...

38 jas: Sen senesiń, senesiń! Sońy tunǵıyq.

25 jas: Joq! 38 Qatelesesiń jalǵyzdyqty – óz paıdańa da sheshýge bolady.

30 jas: Alǵ sen qanshalyqty óz paıdańa sheshe aldyń Darıǵa?

35 jas: Mysaly Dáýren! Bilesińder ǵoı qyzdar?!

25jas: Ol ádemi, sypaıy bolatyn. Sen úshin baryn berýge daıyn edi.

38 jas: Al sen oǵan qaramadyń.

28jas:  Qazir ol úılengen baqytty.

30 jas:  Qazir júrsiń endi sýretterin kórgen saıyn ishiń kúıip. Ony qoıshy, ketti ǵoı. Jandosty aıtsańshy...

25 jas: Ony qııalı, aqynsymaq dep jaqtyrmadyń!

38 jas: Ernar degen de jap-jaqsy jigit edi.

28 jas: Onyń boıy qysqa dedi ǵoı.

25 jas: Qyzdar, Asylbek she?!

38 jas: Sol jigit jaqsy ýhajıvat etip júrgen jerinen, podkablýchnıksiń dep jaqtyrmady emes pe?!

28 jas: Sen sondaı tákkaparsyń!

25 jas: Ózimshilsiń!

38 jas: Jurtty ózińnen tómen sanaısyń!

28 jas: Ózińe ne kerektigin bilmeısiń!

25 jas: Qatigezsiń!

38jas: Sen ómirde aktrısasyń, al naǵyz shynaıy beıneń osy!

Olar shýlap ketti.

25 jas: 23! Sen nege úndemeısiń?

 

 

Úshinshi kórinis

 

TAŃERTEŃ

Qustar saırap tur. Darıǵa 23 jas shamasynda. Uıqydan turdy. Telefony shyryldady.

 

Darıǵa: Allo!..  Qaıyrly tań. ...  Mhm... Joq, renjimeshi, Kezdese almaımyz. Sebebi? ...  Sebebi jumysym kóp. Qosymsha sabaqtarym bar. ... Túsinshi jumystan 1 jyldyq esep daıyndap otyrmyn... Múmkin keıinirek...

Solaı... Jaraıdy, saý bol!

 

Tutqany qoıdy.

 

Qyzǵa uqsap qydyrýǵa da ýaqyt joq. Bir jaǵynan ómir alda ǵoı.  Ózime laıyqty, naǵyz jigit kezdeskende shyǵarmyn qydyrýǵa... Al ázirge jumys, aıaqtan turyp alý kerek. Qydyrý tabylar...

 

Ol da qyzyq. Ózi qatarlas qyz izdemeı me?! Meni apa jasaıyn dep júr me?! Men 23,  Ol nebári 21-de ǵoı. Ol úshin báribir kárimin. Jigit degen qyzdan úlkendeý bolý kerek.

 

Beti-qolyn jýdy.

Telefonyna sms keldi. Oqydy.

 

Tý-ý, myna qyzdar da qoımady ǵoı. Erikken bári shetinen... Qıt etse klýbqa barǵysh... Kezinde sabaqty qatyrmap edi, qazir jumys istep te jarytyp júrgen joq. Ne ómir? Bar tapqanyna shyrttaı bolyp kıinip alyp, qydyrady da júredi. Adam degen bolashaǵyn oılamaı ma?

 

Jumysyn jalǵastyryp jasap otyr.

 

Darıǵa:  Jumys-úı, úı-jumys. Keıde jalyǵyp, bir saryndy ómirden sharshap ketemin. Úıde shúıirkelesetin Jansaıa da uzatyldy kúıeýden qur qalǵandaı... Dáýren de habarlaspaǵaly biraz boldy. Renjitip aldym sońǵy kezdeskenimde... Jumysyń bitpeıdi ómiri, nege keńseden tym kesh shyǵasyń deıdi... Ol jerde oınap otyratyndaı. Túsinbeı ketedi ol da keıde... Men de jumystan sharshap shyǵyp edim, qatty aıtyp jiberdim ǵoı deımin. Ne istep júr eken... Saǵyndym...

Ýff...

Biraqq seni jolyqtyrǵan taǵdyryma rızamyn janym... Ár mınýtym, ár sekýndym... Ómirime sen engeli juldyzdar da anyq jarqyraıtyndaı... Aınalamdaǵy adamdardyń barlyǵy meıirlene túskendeı... Netken qudiretti ediń?! Seni jolyqtyrǵan taǵdyryma rızamyn janym... Qaı qasıetińmen ózińe yntyqtyryp qoıdyń?.. Jarty kún kórmesem, eleńdep ózińdi saǵynyp turamyn. Qaıda, kimmen, ne istep otyr ekensiń? Qarnyń ashyp qalǵan joq pa? Jumys kúniń sátti ótip jatyr ma? Jaýrap qalmadyń ba eken? Eshkim renjitpedi me? Kóńil-kúıiń qalaı? Bárin-bárin bilgim keledi...

 

Jigit keldi.

 

Jigit: Kúnim meniń! Álemdegi eeeń sulý qyzdyń jaǵdaıy qalaı eken?

Darıǵa: Ke-r-emet! Ózińde bári jaqsy ma?

Jigit: Jaqsy, hanshaıymym.

Darıǵa: Meni qalaı saǵyndyń? Kórsetshi qane ádettegideı...

Jigit: Túk te saǵynǵan joqpyn!

Darıǵa: (burtıyp qaldy) Qalaı sonda? Túk te...

Jigit: Aqymaǵym sol... Renjigen túrinen sol... Seni únemi júregimniń ishine salyp júremin. Árdaıym meniń janymdasyń.

Darıǵa: Al, men seni saǵyndym... Sen joqta saǵynyshymdy qaıtip basqanymdy aıtyp bereıin ba?

Jigit: Kishkene sezip turmyn...

Darıǵa: (burtıdy) Onda menen endi eshteńe surama, aqyry óziń bárin biledi ekensiń ǵoı...

Jigit: Sýretime qarap telmirýmen boldyń ǵoı, ıá?

Darıǵa: neaaa

Jigit: Endi?

Darıǵa: Sen bergen gúldermen sóılesip júrdim kúni boıy... Olar suraqtaryma seniń ornyńa jaýap berdi.

Jigit: Olar da seni jaqsy kóredi.

Darıǵa: Olar sóılegende týra sen sııaqty súúúp-súıkimdi. Sosyn seni odan saıyn jaqsy kórip qaldym. Biraq bir qyzyq aıtaıyn ba?

Jigit: Aıta ǵoı...

Darıǵa: Seniń búgin taǵy gúl beretinińdi bilip, men olardy "lıýbıt ne lıýbıt" dep julyp tastadym)))

Jigit: Kezdesken saıyn gúl beretinime senseń de, seni sheksiz súıetinime kúmánmen qaraısyń,ıá?

Darıǵa: Árıne...

Jigit (qushaqtady): Bári jaqsy bolady janym... Biraq keıde seni sheksiz súıgim kelmeıdi...

Darıǵa: negeee?

Jigit: Ernest Hemıngýeıdiń taǵdyryn qaıtalaǵym kelmeıdi.

Darıǵa: Seni sonshama qorqaq dep oılamappyn))) qorqaq! qorqaq!

Jigit: Ernest óziniń mýzasy Agnessany bar yqylasymen jan-tánimen súıdi. Amerıkadan hattar Italııaǵa qarsha jaýyp turdy.

Darıǵa: sodaaan?

Jigit: Biraq bir kúni qandaı hat alǵanyn bilesińbe?

Darıǵa: Qandaı?

Jigit: «Maǵan jıi hat jazýdyń qajeti joq. Men siz oılaǵandaı áıel emespin. Men ózimdi doly áıelmin dep sanaımyn. Ashýlanbańyz. Saý bolyńyz!» dep jazyp jiberipti...

Darıǵa: Ne degen qatygez qyz bolǵan. Shyn súımegen bolyp tur ǵoı ıa...

Jigit: Shyn súımegen emes. Ózin Ernestke laıyq sanamaǵan.

Darıǵa: aaa))) uryspashy... qaz a tak renjı salam...

Jigit: Mahabbatty tolyq túsinbeısiń, janym.

Darıǵa: Túsindirshi al...

Jigit: Qatty túsinip kerek emes. Kóp bilgen zııan.

Darıǵa: Nege?

Jigit: Tek Kleopatra sııaqty qylyqty bola bilseń boldy

Darıǵa: Jaraaaıd... Janym, janym, meni alǵash kórgen keziń esińde me?

Jigit: Árıne

Darıǵa: Aıtyp bershi, ne sezindiń?

Jigit: Aıtyp jetkizý qıyn.

Darıǵa: oııı, aıtyp beeersh...

Jigit: Kózben kóz túıisip qalǵan sátti esime alsam)))

Darıǵa: Biraq syr bildirmediń ıá?

Jigit: Sol kezde bir óleń shyǵaryp edim.

Darıǵa: Oo, oqyp bershi!

Jigit: Oqýǵa uıalyp júr edim. Al tyńda.

Sen ekensiń júrektiń suraǵany,

Bolsańdaǵy balapan uıadaǵy.

Jasqanýdy bilmeıtin ot janarym,

Senen nege jasqanyp uıalady?

Darıǵa: Óleńiń óte keremet! Sen uıalshaq emes ediń ǵoı. Jaı ǵana qorqaq emes, endi uıalshaq qorqaq bolǵanyń ba)))

Jigit: Raqmet! Uıalshaqpyn negizi, biraq sen úshin ótkir bolýǵa tyrysamyn. Qorqaqpyn. Sen úshin batyl bolamyn!

Darıǵa: Men seni jaqsy-y-y kóremin! Shynyńdy aıtshy, meniń qaı jerim unaıdy saǵan?

Jigit: Qaı jerim unamaıdy deseńshi)

Darıǵa kúldi

Jigit: Seniń bolmysyńda maǵan unamaıtyn jeriń joq.

Darıǵa: Sender barly qyzǵa solaı aıtasyńdar ııa?

Jigit: Tipti tizeńniń ózi ádemi.

Darıǵa: Izvraene!

Jigit: (bas salyp qushaqtap súıdi) Kim ızvraene aaa? Kim, kim...

Darıǵa: Tártipsiz jigitsiń)) Seni buryshqa turǵyzý kerek!)))

 

Olar tósektes boldy.

 

Perde kóterildi. Darıǵa jalǵyz jatyr. Ornynan turyp del-sal kúı keshti. Sharshap tur. Aınalasynan jigitti izdedi. Jigit ketip qalǵan. Telefon soqty.

 

Jigittiń telefony bos emes. Birneshe ret soqty. Zanıat. Taǵy da soqty. « Baılanys aıasynan tys jerde» degen daýys estidi.

 

Meń-zeń kúıde zattaryn jınastyrdy. Jumys qaǵazdaryn rettedi.

 

Birneshe qaıta telefon soqty. « Baılanys aıasynan tys jerde» degen daýys estidi.

 

Sms jazdy.

 

«Janym, qalaısyń? Qaıdasyń...»

 

Sý quıyp ishti. Aqyryn baryp tósegine jatty. Sms keldi. Ornynan atyp turdy.

 

Sms: «Biz keshe úlken qatelik jasadyq. Erterek aıtpaǵanym úshin keshirshi. Meniń otbasym bar. Olardy tastaı almaımyn. Endi mazalamashy..»

 

Qumyranyń qasyna bardy. Qolyna aldy. Qumyraǵa qarap sóıledi.

 

HAT

 

Qudireti kúshti Qudaı!!! Men sharasyzbyn... Sengen adamym... Bári bir mezette... Túkirgenim bar bárine! Tipti oılanýǵa da mursham joq. Endi ne isteımin? Kimnen aldanysh tabamyn? Taǵy qandaı tartýyń bar? Jibere ber shetinen! Eshteme qaldyrma! Túgel jiber! Nem qaldy deısiń? Barlyǵyna daıynmyn!Sebebi men endi ómirdi basqasha súrýdi bastaımyn! Buryńǵy Darıǵa kórge ketti!

 

Úlken hrýstal qumyra «shńń» etip dybys shyǵardy. Darıǵa jalt qarady.

 

Basyndaǵy oramalyn sheshpedi.

 

Oılanǵan qalpy hatyn búktedi. Súıretilip baryp, bos qumyraǵa alǵashqy hatyn saldy.

 

SOŃY

 

Aıdana ALAMAN

"Adyrna" ulttyq portaly

Pikirler