بيىل ەكىنشى دۇنيەجۇزىلىك سوعىستىڭ اياقتالعانىنا - 79 جىل.
9 مامىر جەڭىس كۇنى باتىس قازاقستان وبلىسىنىڭ اكىمى ناريمان تورەعاليەۆ وبلىس ورتالىعىنداعى «جەڭىس» الاڭىنا بارىپ، ماڭگىلىك الاۋعا گۇل شوقتارىن قويدى.
ءىس-شاراعا ەڭبەك ارداگەرلەرى، قۇقىق قورعاۋ سالاسىنىڭ قىزمەتكەرلەرى، زيالى قاۋىم وكىلدەرى، قوعام بەلسەندىلەرى مەن جاستار قاتىستى.
جينالعاندار سۇراپىل سوعىس جىلدارىندا كەۋدەسىن وتقا توسىپ، بەيبىتشىلىك ءۇشىن كۇرەسكەن باتىرلارعا تاعزىم جاساپ، گۇل شوقتارىن قويدى.
گۇل شوقتارىن قويۋ راسىمىنەن سوڭ، بقو اكىمى ناريمان تورەعاليەۆ ورال قالاسىندا تۇراتىن سوعىس جانە ەڭبەك ارداگەرلەرىنىڭ ۇيىنە باردى.
اتاپ ايتقاندا، ناريمان تورەعاليەۆ سوعىس ارداگەرلەرى – يۆان گاپيچتى، ۆەنيامين سكالەنكونى جانە تىل ارداگەرى – اقباي جايساڭدى جەڭىس كۇنىمەن قۇتتىقتادى.
وبلىس اكىمى سوعىس ارداگەرلەرىنە قر پرەزيدەنتى قاسىم-جومارت كەمەلۇلى توقاەۆتىڭ اتىنان قۇتتىقتاۋ حاتتارىن تابىس ەتتى.
«ارداگەرلەرىمىزدىڭ ۇلى ەرلىگىن ءاربىر قازاقستاندىق قۇرمەتتەپ، ەستە ساقتاۋى كەرەك. سىزدەردىڭ ارقالارىڭىزدا قازىرگى ۇرپاق بەيبىت كۇندە ءومىر ءسۇرىپ جاتىر. ارداگەرلەرگە قامقورلىق كورسەتۋ – ءبىزدىڭ ورتاق پارىزىمىز. ولارعا قولداۋ ءبىلدىرۋ ارقاشان مەملەكەتتىڭ باستى نازارىندا بولادى» -دەدى وبلىس اكىمى ناريمان تورەعاليەۆ.
قازىرگى ۋاقىتتا باتىس قازاقستان وبلىسىندا ۇوس-نىڭ 14 ارداگەرلەرى بار. بيىل 9 مامىر قارساڭىندا ولاردىڭ ارقايسىسىنا 1,5 ملن.تەڭگەدەن الەۋمەتتىك كومەك بەرىلدى.
