بۇگىن 9 مامىر - جەڭىس كۇنى. بۇل جەڭىس كۇنى وڭاي كەلگەن جوق. سوندىقتان ەكىنشى دۇنيەجۇزىلىك سوعىس حالقىمىز ءۇشىن ەڭ قاسىرەتتى كەزەڭ بولىپ تاريحتا قالادى. وتانىن قورعاپ اجداھانىڭ اۋزىنان قايتقان اتا-اپالارىمىزدىڭ تەڭدەسسىز ەرلىگى، وتانشىلدىق نارىنە سۋارىلعان بيىك پاراساتى، اسقاق ادامي بولمىسى بىزگە ماڭگىلىك ونەگە، ومىرلىك مەكتەپ، ىزگىلىك پەن ادامگەرشىلىك ەتولونى بولىپ قالا بەرەدى.
جىلدار جىلجىپ، سول سۇراپىل كەزەڭنەن الىستاعان سايىن، بەيبىت كۇن سىيلاعان سوعىس ارداگەرلەرىنە دەگەن قۇرمەتىمىزدىڭ ەسەلەنە تۇسەرى انىق. ويتكەنى، زىمىراعان ۋاقىتپەن بىرگە اڭىزعا اينالىپ بارا جاتقان سوعىستىڭ اقيقاتىن ايتاتىن ارداگەرلەرىمزدىڭ دە قاتارى تىم سيرەپ بارادى.
بۇگىن شىمكەنتتىكتەر دە جەڭىس كۇنىن اتاپ ءوتۋ ءۇشىن «داڭق مەموريالىنا» جينالدى. قازا بولعان قاھارمانداردىڭ رۋحىنا تاعزىم ەتىپ، ەسىمدەرى قاشالىپ جازىلعان ەسكەرتكىش تاقتاعا گۇل شوقتارىن قويدى. سالتاناتتى شارادا باتىر بابالاردىڭ قايسارلىعى مەن باتىلدىعى دارىپتەلدى.
سونىمەن بىرگە مەملەكەت باسشىسى ق. توقاەۆتىڭ سوعىس جانە تىل ارداگەرلەرىن جەڭىس كۇنىمەن قۇتتىقتاۋ حاتىن قالا اكىمى وقىپ بەردى. ال قالادا الاپات سوعىسقا قاتىسقانداردان 2 ارداگەر بار. ولاردىڭ ءبىرى - نينا ەگوروۆنا موسۋنوۆا. 100 جاستاعى مايدانگەر اجەي سوعىس كەزىندە راديست بولعان. ال ەكىنشى مايدانگەر برەست قامالى، ۆارشاۆا، دانسك، ۆيسسمارك قالالارى ءۇشىن شايقاسقان- مۇراتالى تولەپبەرگەن اقساقال. ول قان مايدان شەبىندە جان اياماي، ەرلىك كورسەتكەنى ءۇشىن «ۇلى وتان سوعىسى»، «گەرمانيانى جەڭگەنى ءۇشىن»، «ۆارشاۆانى ازات ەتكەنى ءۇشىن» وردەندەرىمەن ماراپاتتالعان.
اكىم بۇگىن جەڭىس كۇنىن جاقىنداتقان ەكى ارداگەردى مەرەكەلەرىمەن قۇتتىقتاي وتىرىپ، ەكى مايدانگەرگە پاتەر كىلتىن تابىستادى.
«بۇگىن ءبىز بەيبىت اسپان استىنداعى بۇگىنگىدەي مامىراجاي ءومىر سىيلاعان باتىرلارعا قۇرمەت كورسەتەمىز. ءبىز جەڭىستىڭ قۇندىلىلىعىن ەشقاشان ۇمىتپايمىز »- دەدى، ءوز قۇتتىقتاۋىندا قالا اكىمى عابيت سىزدىقبەكوۆ.
ءوز كەزەگىندە مايدانگەرلەر كورسەتىلگەن قۇرمەتكە شەكسىز العىستارىن ءبىلدىرىپ، باتالارىن بەردى.
