شىمكەنت قالاسىندا 17 جاستاعى قىزدى الىپ قاشۋ ءىسى بويىنشا سوت ۇكىمى جاريالاندى، دەپ حابارلايدى "ادىرنا" ۇلتتىق پورتالى.
سوت 25 جاستاعى ەر ادام مەن ونىڭ ەكى تانىسىن كىنالى دەپ تانىپ، ارقايسىسىن 3 جىلعا باس بوستاندىعىنان ايىردى.
سوت ماتەريالدارىنا سايكەس، ايىپتالۋشىلاردىڭ ارەكەتى قىلمىستىق كودەكستىڭ «نەكەگە تۇرۋعا ماجبۇرلەۋ» بابىمەن سارالانىپ، ولار جازاسىن قاۋىپسىزدىگى ورتاشا قىلمىستىق-اتقارۋ جۇيەسى مەكەمەسىندە وتەيتىن بولدى.
سونداي-اق نەگىزگى سوتتالۋشىنى جابىرلەنۋشىگە مورالدىق زيان ءۇشىن 5 ميلليون تەڭگە وتەماقى تولەۋگە مىندەتتەدى. ءىس بويىنشا جالپى ءتورت ادام كۇدىكتى رەتىندە تانىلعان. الايدا ولاردىڭ ءبىرى ءالى كۇنگە دەيىن ىزدەۋدە ءجۇر. مالىمەتتەرگە سايكەس، كۇدىكتىلەردىڭ بارلىعى تۇركىستان وبلىسى سارىاعاش اۋدانىنىڭ دەربىسەك اۋىلىنىڭ تۇرعىندارى جانە ءبىر سىنىپتا وقىعان.
سوت تالقىلاۋى بارىسىندا ايىپتالۋشىلار ءوز كىنالارىن مويىنداعان جوق. ءىس ماتەريالدارىنا سايكەس، جابىرلەنۋشى قىز سوتتالۋشىلاردىڭ بىرىمەن تانىس بولعان جانە كەزدەسۋگە ءوز ەركىمەن بارعان. الايدا سوت ونىڭ تۇرمىسقا شىعۋعا نەمەسە ءوزىن الىپ قاشۋعا كەلىسىم بەرمەگەنىن انىقتادى. ءىس جابىق رەجيمدە قارالدى. جابىرلەنۋشى تاراپتىڭ ۇكىمگە قاتىستى ۇستانىمى ازىرگە جاريالانعان جوق. ال سوتتالعاندار سوت شەشىمىنە اپەللياتسيالىق تارتىپپەن شاعىم ءتۇسىرۋ نيەتىن بىلدىرگەن.
