مەملەكەت باسشىسىنىڭ باستاماسىمەن اباي وبلىسى جاڭاسەمەي اۋدانى ءشۇلبى كەنتىندە ءوتىپ جاتقان «تازا قازاقستان» رەسپۋبليكالىق اكتسياسىنىڭ «ءمولدىر بۇلاق» اپتالىعى «ەرتىس – دوستىق وزەنى» اكتسياسىنان باستالدى.
اۋدان باسشىلىعى، كەنت تۇرعىندارى، ۇكىمەتتىك ەمەس ۇيىمدار، ۇلتتىق ورتالىقتار، جاستار، مەكتەپ تۇلەكتەرى، مەكەمە قىزمەتكەرلەرى جانە زيالى قاۋىمنىڭ قاتىسۋىمەن كەنت كوشەلەرى مەن ەرتىس وزەنىنىڭ جاعاسىندا سەنبىلىك ءوتتى.
ءشۇلبى كەنتى اقساقالدار كەڭەسىنىڭ مۇشەسى بەيسەن لەپسىباەۆ جينالعاندارعا العىسىن ءبىلدىرىپ، باستاما ءبىر رەتتىك اكتسيا بولماۋى ءتيىس ەكەنىن ايتتى.
-«تازا قازاقستان» اكتسياسىن وتكىزۋدەگى ماقسات – تابيعاتقا ۇقىپتى قاراۋدى قالىپتاستىرۋ، ەلدى مەكەندەردى اباتتاندىرۋدى، كوگالداندىرۋدى تۇراقتى جۇرگىزۋ. بۇل – ءبىزدىڭ ۇلتتىق قۇندىلىقتارىمىزدىڭ بەينەسى. حالقىمىزدىڭ ءبىر شاڭىراق استىنداعى دوستىعى مەن ءوزارا تۇسىنىستىگى جالعاسىپ، ەلىمىزدەگى بەيبىتشىلىك ارقاشان بەرىك بولسىن، ارقاشان بىرلىك بولسىن، -دەدى ەڭبەك ارداگەرى.
بۇل كۇنى اكتسياعا قاتىسۋشىلار 200-دەن استام اعاش كوشەتتەرىن وتىرعىزىپ، ورتالىق كوشەلەر مەن ەرتىس وزەنىنىڭ جاعالاۋىنا ەكولوگيالىق تازالاۋ جۇرگىزدى. اكتسياعا 300-دەن استام ادام قاتىستى. ارنايى تەحنيكانىڭ كومەگىمەن 5 تونناعا جۋىق قوقىس شىعارىلدى.
-«ءمولدىر بۇلاق» اپتالىعى ءبىزدىڭ اۋداندا وتۋدە. وسى اپتا – «تازا قازاقستان» اكتسياسىنىڭ ءبىر بولىگى جانە ءبىز دە وعان قاتىسۋعا شەشىم قابىلدادىق. كوشەلەر مەن اۋماقتاردى تازالاۋدا عانا ەمەس، قارتتارعا دا كومەكتەسىپ، جاستارعا ۇلگى كورسەتەمىز، - دەدى جاستار كەڭەسىنىڭ مۇشەسى اينۇر ساتىبالدينوۆا.
مەملەكەت باسشىسى ۇسىنعان باستامانى جاڭاسەمەي اۋدانىنىڭ جاستارى بورودۋليحا اۋدانىنىڭ جاستارىنا جولداپ، تابيعاتقا ۇقىپتى قاراۋعا شاقىردى.
وبلىستا بارلىعى 1 068 سۋ اعىندارى مەن وزەندەر، 55 كول، سونداي-اق 95 گيدروتەحنيكالىق قۇرىلىستار بار.
