كورنەكتى جازۋشىسى، دراماتۋرگ، پۋبليتسيست، قازاق ادەبيەتىن قالىپتاستىرۋشىلاردىڭ ءبىرى جۇسىپبەك ايماۋىتوۆ بار عۇمىرىن ۇلتقا ارناعان. قازاقتىڭ باعى مەن باعىتىن ويلاپ، بارىن سالعان. جۇسىپبەك ايماۋىتوۆتىڭ ونەگەگە تولى سوزدەرىن ۇسىنامىز. وقىپ، وي قورىتىپ كورىڭىز!
وقىعاندار! بۇل ۋاقىت جان تىنىشتىق ىزدەيتىن، قىزىق قۋاتىن ۋاقىت ەمەس، قىزمەت قىلاتىن، ەڭبەك سىڭىرەتىن ۋاقىت. ويلاڭىزدار: حالىق ءبىز ءۇشىن ەمەس، ءبىز حالىق ءۇشىن تۋعامىز، ولاي بولسا، مويىنىمىزدا حالىقتىڭ زور بورىشى، اۋىر جۇگى جاتىر.
زورلىق، قيانات، قانىشەرلىك جوعالىپ، ءبىر زاماندا ادام بالاسى ءبىرىن ءبىرى ماڭدايعا شەرتپەيتىن، جەر جۇزىنە ۇجماق ورنايتىن شاق بولا ما؟ جوق پا؟ بەلگىسىز بولسا، الىس. ءوزى كوكسەۋ - ءتاتتى قيال; زامان كوكسەتەتىن ەمەس. ەندىگى ماقسات - اياق استىندا قالماي، تىربانىپ تىرنا-قاتار رەتكە كىرۋ، دۇنيەجۇزىنەن جوعالىپ كەتپەس قامىن قىلۋ.
ادامنىڭ ومىردەگى ءىسى - العان تاجىريبەسىنىڭ جەمىسى. جاننىڭ تاربيەلەنەتىن ءۇش ءتۇرلى سىپاتى بار: اقىل، سەزىم، قايرات. ادام جاراتىلىستان اقىلدى بولىپ، وسى ءۇش سىپاتى بىردەي تاربيەلەنگەن بولسا، ول كىسى ءارى دانىشپان بولادى. ول ادام ىسىندە بايىپتى، تاباندى بولىپ كوپ قاتا جىبەرمەيدى.
وتىرىك ايتپا، قيانات قىلما، ادال بول، اقجۇرەك بول، ءوزىڭ ءۇشىن وقىما، مەن ءۇشىن دە وقىما، ۇلتىڭا قىزمەت قىلىپ، پايدا تيگىزۋ ءۇشىن وقى!
دارىگەردەن دە تاربيەشىنىڭ كوپ بولعانى ارتىق، دارىگەر ادامنىڭ دەنەسىن ساۋىقتىراتىن بولسا، تاربيەشى ادامنىڭ اقىلىن، مىنەزىن، جانىن ساۋىقتىرادى.
بiر ءارiپ ۇيرەتكەنگە 40 جىل سالەم بەر.
ەستەرىڭىزدە بولسىن: قارا حالىقتىڭ مادەنيەتتى بولۋىنان مادەنيەتتى كىسىنىڭ قازاق بولۋى قيىن، بالاسىنا وسى باستان ۇلت رۋحىن ءسىڭىرىپ، قازاق ومىرىنە جاقىنداتىپ تاربيەلەۋ كەرەك.
بەكزات تۋلەپبەرگەنوۆ
