الماتى وبلىسى، قاراساي اۋدانى، قىرعاۋىلدى اۋىلىنىڭ تۇرعىندارى ءبىر شارۋاشىلىقتا ولگەن مالمەن بىرگە ءتىرى مالدىڭ ءبىر قورادا تۇرعانىنا شاعىمداندى. جاعىمسىز ءيىس جايلاعان اۋىل تۇرعىندارى دابىل قاقتى، دەپ حابارلايدى "ادىرنا" ۇلتتىق پورتالى.
جانعا جاعىمسىز كادرلار الەۋمەتتىك جەلىدە تاراپ كەتتى. بەينەدەن ولگەن مالدار مەن تىرىلەرىنىڭ ءبىر قورادا جاتقانىن جانە شوشقا، سيىر، جىلقى مالدارىنىڭ باتپان بالشىققا بىلىققان كۇيىن بايقاۋعا بولادى.
"قىرعاۋىلدى اۋىلى، بىرلىك كوشەسى. بىزدە ماسقارا بولىپ جاتىر. ءتىرى مالدى ولەكسەلەرمەن بىرگە ۇستايدى. كوپ جىلدان بەرى ماسەلە شەشىلمەي كەلەدى. دالىرەك ايتساق، بۇگىن عانا بىلدىك! ءيىستى تازالىق بولماعان سوڭ شىعادى دەپ ويلاپ جۇرسەك، انىعىندا ولگەن مالدار جاتىر ەكەن! – دەيدى ۆيدەو اۆتورى.
الماتى وبلىسىنىڭ اكىمدىگى تۇرعىنداردىڭ جاعىمسىز يىسكە قاتىستى شاعىمى بويىنشا قاراساي اۋدانى اكىمىنىڭ ورىنباسارى مال يەسىمەن اڭگىمەلەسكەنىن حابارلادى.
اۋداندىق اكىمدىكتىڭ رەسمي دەرەگىنە سۇيەنسەك، 4 مامىردان باستاپ، ياعني بۇگىن «اكتاۆا» باسپاناسىندا تىركەلمەگەن 26 شوشقانى ۋاقىتشا ورنالاستىرۋ تۋرالى كەلىسىمگە قول جەتكىزىلگەن. جانۋارلار ۆەتەريناريالىق تەكسەرۋدەن جانە كارانتيننەن وتكىزىلەدى.
سونداي-اق جىلقىلاردى ساعات 12.00-دەن باستاپ تاسىمالداۋ جوسپارلانعان. بۇل ماسەلە اۋداندىق اكىمدىك تاراپىنان شەشىمىن تاپتى.
قازىرگى تاڭدا جاعداي اۋىلدىق وكرۋگ اكىمىنىڭ، پوليتسيا مەن ۆەتستانتسيانىڭ باقىلاۋىندا.
«جانۋارلاردىڭ يەسى قىرعاۋىلدى اۋىلىنىڭ تۇرعىنى الەكسەي ەسىمدى ازامات. بۇل وتباسى وسىنداي جاعدايعا قاتىستى 2022 جىلى ايىپپۇل ارقالاعان. 2023 جىلى 10 باس جانۋاردى ۆەتەرينارلىق ستانتسياعا تىركەتكەن. بۇگىنگى جاعداي ءبىزدىڭ مەكەمەنىڭ باقىلاۋىندا. قورادا مەحانيكالىق جانە بىرنەشە ديزەنفەكتسيالىق تازارتۋلار جۇرگىزىلەدى»، – دەپ مالىمدەدى قاراساي اۋداندىق ۆەتستانتسيانىڭ وكىلى.
ال رايىمبەك اۋىلدىق وكرۋگىنىڭ اكىمدىگى جانۋارلاردىڭ يەسى سانيتارلىق تالاپقا باعىنباي كەلە جاتقانىنا 10 جىلدان اسقانىن مالىمدەدى. اراسىندا ايىپپۇل تولەگەن. اۋىلداستارىنىڭ شاعىمدانۋى ءبىرىنشى رەت ەمەس.
پوسموترەت ەتۋ پۋبليكاتسيۋ ۆ Instagram
