30 ءساۋىر كۇنى قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ دۋشانبەگە رەسمي ساپارمەن باردى، دەپ حابارلايدى "ادىرنا" ۇلتتىق پورتالى.
ولجاس بەكتەنوۆتى تاجىكستان رەسپۋبليكاسىنىڭ پرەزيدەنتى ەمومالي راحمون قابىلدادى. كۇن تارتىبىندە ساۋدا جانە ينۆەستيتسيالار، ونەركاسىپ كووپەراتسياسى، ەنەرگەتيكا، اۋىل شارۋاشىلىعى جانە كولىك بايلانىسى، سونداي-اق سۋ-ەنەرگەتيكالىق ىنتىماقتاستىق سالاسىنداعى قازاق-تاجىك ءوزارا ءىس-قيمىلى ماسەلەلەرى تالقىلاندى.
قازاقستان – تاجىكستاننىڭ ءتورتىنشى ءىرى ساۋدا سەرىكتەسى. بۇگىنگى تاڭدا قازاقستان پرەزيدەنتى قاسىم-جومارت توقاەۆ پەن تاجىكستان پرەزيدەنتى ەمومالي راحمون اراسىنداعى قارقىندى ساياسي ديالوگ پەن قول جەتكىزىلگەن ۋاعدالاستىقتاردىڭ ارقاسىندا ەكىجاقتى ساۋدا-ەكونوميكالىق ىنتىماقتاستىق تۇراقتى دامىپ كەلەدى. قولدا بار زور الەۋەتتى ەسكەرە وتىرىپ، ۇكىمەتتەر الدىنا تاۋار اينالىمىن 2 ەسەگە – $2 ملرد-قا دەيىن ارتتىرۋ مىندەتى قويىلدى.
ۇكىمەتارالىق كەلىسسوزدەر كەڭەيتىلگەن قۇرامدا ءوتتى جانە ىنتىماقتاستىقتى نىعايتۋ ءارى ساۋدا اعىندارىن ءارتاراپتاندىرۋ شارالارىنا ارنالدى. سونداي-اق قازاقستاننىڭ شامامەن قۇنى $190 ملن بولاتىن 85 تاۋار پوزيتسياسى بويىنشا ەكسپورتتى ارتتىرۋعا دايىندىعى اتاپ ءوتىلدى.
ۇكىمەتتىك دەلەگاتسيالار ونەركاسىپ كووپەراتسياسىن دامىتۋدىڭ ماڭىزدىلىعىنا توقتالىپ، ەكسپورتقا باعدارلانعان جاڭا بىرلەسكەن وندىرىستەر قۇرۋدىڭ وزەكتىلىگىن اتاپ ءوتتى.
قازاقستاننىڭ مول تاجىريبەسىن ەسكەرە وتىرىپ، تاجىكستان اۋماعىندا كەن ورىندارىن بىرلەسىپ يگەرۋ جانە جوبالاردى جۇزەگە اسىرۋ مۇمكىندىگى قاراستىرىلدى. سونىمەن قاتار قازاقستاندا تاجىك تەمىر جولدارى ءۇشىن تەمىر جول تەحنيكاسىن شىعاراتىن ءىرى وندىرىستىك الەۋەت بار. اقتوبە زاۋىتى رەلس ارقالىق ونىمدەرىن جەتكىزۋدە ىنتىماقتاستىق ورناتۋعا دايىن. سونداي-اق قازاقستاندا شىعارىلاتىن لوكوموتيۆتەردىڭ، تەپلوۆوزداردىڭ، باعىتتامالىق بۇرمالاردىڭ، ترانسفورماتورلاردىڭ، اۋىل شارۋاشىلىعى تەحنيكالارىنىڭ، اككۋمۋلياتورلاردىڭ، اۆتوكولىك قۇرالدارىنىڭ ەكسپورت كولەمىن ارتتىرۋ مۇمكىندىگى زور.
ىنتىماقتاستىقتىڭ جاڭا باعىتتارى قاتارىندا تسيفرلاندىرۋ سالاسى بار. جوعارى دەڭگەيدەگى ۋاعدالاستىقتاردى جۇزەگە اسىرۋ شەڭبەرىندە قازاقستان تاجىكستانعا Smart Bridge, يربپ (ينتەرنەت-رەسۋرستاردىڭ بىرىڭعاي پلاتفورماسى), Smart Data Ukimet سەكىلدى «eGOV» ەلەكتروندىق ۇكىمەتىنىڭ مەنشىكتى ۇلتتىق جۇيەلەرىن ورىستەتۋگە كومەك كورسەتۋ بويىنشا جۇمىستارىن باستادى. IT سالاسىنداعى ناتيجەلى ىنتىماقتاستىق ەكى ەل ەكونوميكاسىن دامىتۋعا جانە ازاماتتارىنىڭ تۇرمىس ساپاسىن جاقسارتۋعا جول اشادى.
سونىمەن قاتار تاراپتار مادەني-گۋمانيتارلىق ىنتىماقتاستىق ماسەلەلەرىن تالقىلادى. بيىل تاجىكستانداعى قازاقستاننىڭ مادەنيەت كۇندەرىن وتكىزۋ ماڭىزدى وقيعا بولماق. ولجاس بەكتەنوۆ الداعى ۋاقىتتا دۋشانبەدە قازاقتىڭ ۇلى ويشىلى اباي قۇنانباەۆ ەسكەرتكىشىنىڭ اشىلۋىنىڭ ماڭىزدىلىعىن اتاپ ءوتتى.
كەلىسسوزدەر قورىتىندىسى بويىنشا ۇكىمەتتەر باسشىلارى بارلىق باعىت بويىنشا ەكىجاقتى ستراتەگيالىق ارىپتەستىكتىڭ جوعارى سەرپىنىن ساقتاۋعا دايىن ەكەندىكتەرىن راستادى.
