اقتوبە وبلىسىندا پرەمەر-مينيستر ولجاس بەكتەنوۆتىڭ توراعالىعىمەن سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنىنىڭ سالدارىن جويۋ جونىندەگى رەسپۋبليكالىق شتابتىڭ وتىرىسى ءوتتى، دەپ حابارلايدى «ادىرنا» ءتىلشىسى ۇكىمەتتىڭ ءباسپاسوز قىزمەتىنە سىلتەمە جاساپ.
شتاب باسشىسىنىڭ ورىنباسارى قانات بوزىمباەۆتىڭ ەسەبى تىڭدالدى. بولجامعا سايكەس، جاقىن ارادا بۇكىل ەل بويىنشا جاۋىن-شاشىن بولىپ، كۇن كۇرت جىلىنادى دەپ كۇتىلۋدە. قاردىڭ تەز ەرۋىنەن سۋ قويمالارى تولۋدا. بۇگىنگى تاڭدا سولتۇستىك، شىعىس جانە ورتالىق ايماقتاردىڭ 65%-دان استامى ءالى كۇنگە دەيىن قالىڭ قار استىندا. سوندىقتان الداعى ۋاقىتتا سۋ تاسقىنى قاۋپى بار وڭىرلەردە الدىن الۋ شارالارى كۇشەيتىلدى، تجم-ءنىڭ قاجەتتى كۇشتەرى مەن قۇرالدارى دايىندالدى.
پرەمەر-مينيستر جوندەۋگە جارامدى تۇرعىن ۇيلەر مەن ينفراقۇرىلىمنىڭ ساپاسىنا ەرەكشە نازار اۋدارۋ قاجەت ەكەنىن اتاپ ءوتتى.
«مەملەكەت باسشىسىنىڭ تاپسىرماسى بويىنشا سۋ باسقان ۇيلەردىڭ بارلىعى قۇجاتتاردىڭ بار-جوعىنا قاراماستان، قالپىنا كەلتىرىلەتىن بولادى. مەملەكەت ەشكىمدى باسپاناسىز، دالادا قالدىرمايدى. وسىنداي قيىن جاعدايدا ءىرى، ورتا بيزنەس، سونداي-اق كىشىگىرىم كومپانيالار جانە ەلدىڭ تاعدىرىنا بەي-جاي قارامايتىن قاراپايىم ازاماتتار قول ۇشىن سوزىپ جاتىر. بيۋدجەت قاراجاتىنا قوسىمشا تۇرعىن ۇيلەردى قالپىنا كەلتىرۋگە، جوعالعان مۇلىك پەن مال شىعىنىن وتەۋگە باعىتتالاتىن قوماقتى سوما جينالدى. مەردىگەر كومپانيالار وسىنداي قيىن جاعدايدى بيزنەسكە اينالدىرمايدى جانە بارلىق قاراجات ماقساتتى تۇردە جۇمسالادى دەپ سەنەمىن»، — دەدى ول.
