ءماجىلىستىڭ جالپى وتىرىس زالىندا ونەركاسىپ جانە قۇرىلىس ءمينيسترى دەپۋتاتتاردىڭ سۇراقتارىنا جاۋاپ بەردى، دەپ حابارلايدى "ادىرنا" ۇلتتىق پورتالى.
وتىرىس بارىسىندا قر پارلامەنتى ءماجىلىسىنىڭ دەپۋتاتى قازىبەك يسا ءسوز سويلەپ، مەملەكەتتىك ءتىل مارتەبەسىن ءسوز ەتتى. دەپۋتات ءسوز اراسىندا "ورىسشا جاۋاپ بەرە بەرىڭىز" ءسوزىن توقتاتۋ كەرەكتىگىن ايتتى. ونىڭ سوزىنشە، بۇل تىركەس مەملەكەتتىك ءتىلدى ءولتىرۋ.
"قۇرمەتتى مينيستر قانات بەيسەمبايۇلىنا ەڭ الدىمەن ايتارىم، ونەركاسىپ ءمينيسترى ونەركاسىپتى قايدام، مەملەكەتتىك تىلدە سويلەۋدى جاقسى مەڭگەرىپ الىپتى، راحمەت. ءيا، باياندامادا دا، دەپۋتاتتار سۇراعىنا جاۋاپ بەرۋدە دە، قازاق تىلىندە جاقسى سويلەدىڭىز، سول ءۇشىن راحمەت! ەندى ءسىز قازاق تىلىندەگى سۇراقتارعا عانا ەمەس، ورىس تىلىندەگى سۇراقتارعا دا قازاقشا جاۋاپ بەرە بەرسەڭىز بولادى. ال ارىپتەستەرىمە ايتارىم، "ورىسشا جاۋاپ بەرە بەرىڭىز" دەگەن ءسوز بەن ورىسشا سۇراق قويۋدى توقتاتۋ كەرەك. بۇل - مينيسترگە جاقسىلىق جاساۋ ەمەس، بۇل - ءمينيستردى مۇسىركەۋ! بۇل - پارلامەنت قابىلداعان ءتىل تۋرالى زاڭدى پارلامەنتتە ءولتىرۋ بولىپ تابىلادى", - دەدى قازىبەك يسا.
پارلامەنت دەپۋتاتى ۇكىمەتتىڭ وتاندىق كاسىپورىنداردى قورعاي الماي وتىرعانىن ايتىپ، باياندامادا ايتىلعان ءسوز بەن بۇگىنگى ءوندىرىستىڭ جايىن تالقىلادى.
"مىسالى، وتكەن 2023 جىلى كۇزدە "اق جول" پارتياسى پارلامەنتتە شىمكەنتتە ماقتا وڭدەۋدەن دايىن ءونىم تىگۋگە دەيىنگى تولىق وندىرىستىك تسيكلى بار قازاقستان رەسپۋبليكاسىنداعى جالعىز جۇمىس ىستەپ تۇرعان توقىما فابريكاسى «AZALA Textile» جشس فابريكاسىنىڭ جاعدايىن ايتىپ، ماسەلە كوتەردى. ۇكىمەتكە دەپۋتاتتىق ساۋال جاسادى. ال ءسىزدىڭ بايانداماڭىزدا بۇل فابريكانىڭ اتى اتالمادى دا... بۇل فابريكا 2005 جىلدان بەرى جۇمىس ىستەپ كەلەدى، 20 جىلعا جۋىقتادى. جالپى ينۆەستيتسيالاردىڭ كولەمى 70 ملن اقش دوللارىن قۇرايدى. «AZALA Textile» جشس شىعارعان ءونىمنىڭ 80 پايىزدان استامى ەۋروپالىق وداق ەلدەرىنە ەكسپورتتالدى. سوندىقتان دا بۇل فابريكا مەملەكەتتىك تاپسىرىسقا تاۋەلدى بولعان ەمەس. تەك رەسەي ۋكرايناعا باسقىنشىلىق جاساپ، سوعىس باستالعالى بىرقاتار سەبەپتەرگە بايلانىستى (قاۋىپسىز لوگيستيكالىق باعىتتىڭ بولماۋى جانە ت.ب.) ەۋرووداق ەلدەرىنە ءونىم ەكسپورتى توقتاتىلدى. سوندىقتان، كاسىپورىن قيىندىقتارعا تاپ بولىپ، ءوندىرىس 40 پايىزعا دەيىن تومەندەدى. قازىر فابريكا بانكروتقا ۇشىراپ، جابىلۋ الدىندا تۇر", - دەدى قازىبەك يسا.
