ەكى اپتا بۇرىن كوپبالالى وتباسىلاردى باسپانامەن قامتۋ بويىنشا وبلىستىق قوعامدىق كەڭەستىڭ وتىرىسى وتكەن بولاتىن. وندا وبلىس اكىمى دانيال احمەتوۆ جۇمىستىڭ ءبىرىنشى كەزەڭىن اياقتاپ، اۋىلداعى 230 وتباسىنا باسپانا كىلتىن تابىستايتىنىن ايتقان بولاتىن.
ايتا كەتسەك، ايماق باسشىسىنىڭ تاپسىرماسى بويىنشا 88 اۋىلدىق وكرۋگتەر مەن 4 اۋدان ورتالىعىندا جۇمىس توبى قۇرىلعان بولاتىن. قۇرامىندا قوعامدىق ۇيىم وكىلدەرى مەن كوپبالالى انالار بار ارنايى توپ باسپانا الۋ ماقساتىندا ۇيلەردى ارالاپ، قولايلىسىن تاڭداپ الدى. باسپانا تاڭداۋ كەزىندە مال وسىرۋگە، باقشا ەگۋگە جانە شارۋاشىلىق جۇرگىزۋگە ءتيىمدى بولاتىندىعىنا زور كوڭىل ءبولىندى. سونىمەن اۋىلدىق وكرۋگتەردە 196 ءۇي مەن اۋدان ورتالىقتارىندا 34 باسپانا تاڭداپ الىندى. ولاردىڭ جالپى بيۋدجەتتىك ەمەس سوماسى 558,5 ملن تەڭگەنى قۇراپ وتىر. سونىمەن، شىعىس قازاقستان وبلىسى اۋىلدارىنداعى 230 وتباسى كوپتەن كۇتكەن باسپانا كىلتتەرىنە يە بولدى. ايماق باسشىسى دانيال احمەتوۆ گلۋبوكوە اۋدانىندا بولىپ، 13 وتباسىن جاڭا باسپانالارىمەن قۇتتىقتادى. - كوپبالالى وتباسىلار - ەلىمىزدىڭ باستى يگىلىگى. ءبىز اۋىلدارداعى كوپبالالى وتباسىلارعا باسپانا بەرىپ، الەۋمەتتىك ماڭىزدى ماسەلەنى شەشتىك.
ۇيلەر ۇكىمەتتىڭ قالاۋىمەن ەمەس، كوپبالالى انالاردىڭ وزدەرىمەن تاڭداپ الىنۋى مەنى قاتتى قۋانتادى. بارلىق وتباسىلار قۋانىشتى. الداعى ۋاقىتتا قالالار مەن اۋدان ورتالىقتارىندا باسپانا ماسەلەسىن شەشەتىن بولامىز،- دەدى دانيال احمەتوۆ. ءتورت بالانىڭ اناسى اينۇر توقتارباەۆا ءوزىنىڭ قۋانىشىن جاسىرا الماي، جاڭا ۇيگە كوشكەن باقىتىمەن ءبولىستى. - ەندى مەنىڭ وتباسىمدا بارلىق قۇرىلىس نىساندارى قاراستىرىلعان ۇلكەن ءۇي بار ەكەنىنە سەنە الار ەمەسپىن. الداعى ۋاقىتتا شارۋاشىلىق اشۋ ويىمدا بار. ۇلكەن قولداۋ كورسەتىپ وتىرعان مەملەكەتىمىزگە ريزاشىلىعىم شەكسىز،- دەيدى باقىتتى انا.
سونداي-اق ءبىر مەزەتتە وبلىستىڭ وزگە اۋداندارىندا دا كىلتتەر تابىستالدى. ەڭ كوپ بورودۋليحا اۋدانىندا-37, كوكپەكتىدە-34, تارباعاتاي اۋدانىندا-27, ۇلاندا-23, ءۇرجاردا -20. ەندى جوبانىڭ ەكىنشى كەزەڭى جۇزەگە اسىرىلىپ، اۋدان ورتالىقتارىنداعى 300 وتباسىعا باسپانا بەرۋ جوسپارى تۇر. قازىرگى ۋاقىتتا قالا جانە اۋدان اكىمدەرىمەن قازاقستان تۇرعىن ءۇي قۇرىلىس جيناق بانكى ارقىلى "باقىتتى وتباسى" كوپبالالى وتباسىلارعا جەڭىلدەتىلگەن يپوتەكالىق نەسيە بەرۋ باعدارلاماسىنىڭ بارىسى قاراستىرىلۋدا.
"ادىرنا" ۇلتتىق پورتالى
