Eki apta buryn kópbalaly otbasylardy baspanamen qamtý boıynsha oblystyq qoǵamdyq keńestiń otyrysy ótken bolatyn. Onda oblys ákimi Danıal Ahmetov jumystyń birinshi kezeńin aıaqtap, aýyldaǵy 230 otbasyna baspana kiltin tabystaıtynyn aıtqan bolatyn.
Aıta ketsek, aımaq basshysynyń tapsyrmasy boıynsha 88 aýyldyq okrýgter men 4 aýdan ortalyǵynda jumys toby qurylǵan bolatyn. Quramynda qoǵamdyq uıym ókilderi men kópbalaly analar bar arnaıy top baspana alý maqsatynda úılerdi aralap, qolaılysyn tańdap aldy. Baspana tańdaý kezinde mal ósirýge, baqsha egýge jáne sharýashylyq júrgizýge tıimdi bolatyndyǵyna zor kóńil bólindi. Sonymen aýyldyq okrýgterde 196 úı men aýdan ortalyqtarynda 34 baspana tańdap alyndy. Olardyń jalpy bıýdjettik emes somasy 558,5 mln teńgeni qurap otyr. Sonymen, Shyǵys Qazaqstan oblysy aýyldaryndaǵy 230 otbasy kópten kútken baspana kiltterine ıe boldy. Aımaq basshysy Danıal Ahmetov Glýbokoe aýdanynda bolyp, 13 otbasyn jańa baspanalarymen quttyqtady. - Kópbalaly otbasylar - elimizdiń basty ıgiligi. Biz aýyldardaǵy kópbalaly otbasylarǵa baspana berip, áleýmettik mańyzdy máseleni sheshtik.
Úıler úkimettiń qalaýymen emes, kópbalaly analardyń ózderimen tańdap alynýy meni qatty qýantady. Barlyq otbasylar qýanyshty. Aldaǵy ýaqytta qalalar men aýdan ortalyqtarynda baspana máselesin sheshetin bolamyz,- dedi Danıal Ahmetov. Tórt balanyń anasy Aınur Toqtarbaeva óziniń qýanyshyn jasyra almaı, jańa úıge kóshken baqytymen bólisti. - Endi meniń otbasymda barlyq qurylys nysandary qarastyrylǵan úlken úı bar ekenine sene alar emespin. Aldaǵy ýaqytta sharýashylyq ashý oıymda bar. Úlken qoldaý kórsetip otyrǵan memleketimizge rızashylyǵym sheksiz,- deıdi baqytty ana.
Sondaı-aq bir mezette oblystyń ózge aýdandarynda da kiltter tabystaldy. Eń kóp Borodýlıha aýdanynda-37, Kókpektide-34, Tarbaǵataı aýdanynda-27, Ulanda-23, Úrjarda -20. Endi jobanyń ekinshi kezeńi júzege asyrylyp, aýdan ortalyqtaryndaǵy 300 otbasyǵa baspana berý jospary tur. Qazirgi ýaqytta qala jáne aýdan ákimderimen Qazaqstan Turǵyn úı qurylys jınaq banki arqyly "Baqytty otbasy" kópbalaly otbasylarǵa jeńildetilgen ıpotekalyq nesıe berý baǵdarlamasynyń barysy qarastyrylýda.
"Adyrna" ulttyq portaly
