ساراپشى تەڭگە باعامىنا قاتىستى ءوز بولجامىن جاريالادى

حالىقارالىق نارىقتاعى دوللار باعامىنىڭ السىرەۋىنە قاتىستى وتاندىق ەكونوميست ارمان بايعانوۆ ءوز بولجامىن جاريالادى. ول حالىقارالىق نارىقتا مۇناي باعاسىنىڭ ءالى دە قىمباتتايتىنىن ايتىپ، Instagram  پاراقشاسىندا جازبا جاريالادى دەپ حابارلايدى Zakon.kz.

ساراپشى اتاپ وتكەندەي، كەشەگى اقش فەدەرالدىق رەزەرۆ جۇيەسى باسشىسىنىڭ مالىمدەمەسىنەن سوڭ امەريكالىق ۆاليۋتا باسقالارىنا شاققاندا الدەقايدا ارزاندادى. ال بۇل ءوز كەزەگىندە فەدەرالدىق رەزەرۆ جۇيەسى كەلەسى جيىندا بازالىق سىياقى مولشەرلەمەسىن تومەندەتەتىنىن دە جاريالاپ قالادى دەپ بولجام جاساۋعا نەگىز بولۋدا.

وعان قوسا، اقش مۇناي ءوندىرىسىن قىسقارتىپ جاتىر. بۇل مۇنايدىڭ باعاسىنىڭ وسىمىنە اسەر ەتەتىن جايت. وپەك+ ەلدەرى ءوزارا كەلىسىمدى تاعى 9 ايعا شەگەردى، رەسەيدە دە تەحنوگەندىك سەبەپكە بايلانىستى مۇناي ءوندىرىسى شەكتەلدى. وسىنىڭ ءبارى مۇناي باعاسىنىڭ وسۋىنە اكەپ سوعاتىنى ءسوزسىز.

- وسى فاكتورلاردىڭ بارلىعى جانە يران توڭىرەگىندەگى شيەلەنىس جاقىن بولاشاقتا مۇنايدىڭ ءبىر باررەلىن 70 دوللارعا كوتەرەدى. بىراق ۇلتتىق ۆاليۋتانى 380 تەڭگەدەن ءارى تومەن دەڭگەيدە نىعايتۋعا ەشقانداي سەبەپ-سالداردى كورىپ تۇرعانىم جوق. كەرىسىنشە، بيىل مەملەكەت الەۋمەتتىك باعدارلامالارعا ارتىعىمەن شىعىندانىپ قويدى. مىنە، وسى جايتتاردى ەسكەرە وتىرىپ، الداعى ەكى اپتا ىشىندە 1 دوللاردىڭ قۇنى بىزدە 382-386 تەڭگە ارالاعىندا بولادى دەپ بولجام جاساۋعا بولادى، – دەپ جازدى ارمان بايعانوۆ.