الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى وتكەن جىلدىڭ جەلتوقسانىندا ءۇش ادامنىڭ ولىمىنە سەبەپ بولعان اۆتوبۋس اپاتى ءىسى بويىنشا ۇكىم شىعاردى، دەپ حابارلايدى «ادىرنا» ءتىلشىسى.
32 جاستاعى ايىپتالۋشى دارحان احمەتجانوۆ قىلمىستىق كودەكستىڭ 351-بابىنىڭ 3-بولىگى (كولىكتىڭ قاۋىپسىز جۇمىسىن قامتاماسىز ەتەتىن، ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان ەرەجەلەردى بۇزۋ) بويىنشا، 293-بابىنىڭ 1-بولىگى (بۇزاقىلىق) بويىنشا كىنالى دەپ تانىلدى.
احمەتجانوۆ 8 جىل باس بوستاندىعىنان ايىرىلدى. سوتتالۋشى ءوز كىناسىن ءىشىنارا مويىندادى. ول جازاسىن قاۋىپسىزدىگى بارىنشا تومەن تۇزەتۋ مەكەمەسىندە وتەيدى.
ەسكە سالايىق، قايعىلى وقيعا الماتىدا 2023 جىلدىڭ جەلتوقسانىندا بولعان ەدى. دارحان احمەتجانوۆ جول اقىسىن تولەۋدى وتىنگەن ايەل جۇرگىزۋشىگە اگرەسسيامەن جاۋاپ بەرگەن. جانجال كەزىندە ەر ادام قوعامدىق كولىكتى رۇقسات ەتىلمەگەن جەردە توقتاتۋدى تالاپ ەتىپ، جۇرگىزۋشىنىڭ باس تارتۋىنان كەيىن ونىڭ بەتىنەن ەكى رەت ۇرعان. سالدارىنان ايەل ەسىن جوعالتىپ، كولىكتى باسقارا الماعان. ناتيجەسىندە اۆتوبۋس جول جيەگىندە تۇرعان ادامدارمەن سوقتىعىستى.
جول اپاتى سالدارىنان ءۇش ادام وقيعا ورنىندا قايتىس بولىپ، ءبىر ادام زارداپ شەكتى.
