الماتى وبلىسى «قوعامدىق كەلىسىم جانە دامۋ ورتالىعى» كمم وبلىستىق امبەباپ كىتاپحاناعا 400 داناعا تارتا كىتاپ تارتۋ ەتتى.
بۇگىن الماتىدا اۋماقتىق ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسياسى جۇمىس توبىنىڭ قورىتىندىلاۋ جيىنى وتكەن ەدى. الماتى وبلىسى بويىنشا 2020-2023 ج. ءۇش جىل بويى زەرتتەۋ-زەردەلەۋ جۇمىستارىنىڭ ناتيجەسىندە جارىققا شىققان كوپتومدىق ماتەريالدار جيناعى كوپشىلىككە تانىستىرىلدى
كىتاپحانا قورىن تولىقتىرعان بۇل جازبالار، ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا زەردەلەگەن اقپاراتتارمەن تولىققان.
اينالاسى 3 جىلدىڭ ىشىندە تاريحشىلار قۇندى ءھام قۇپيا دەرەكتەردى جيناقتاعان، بۇل رەتتە الماتى وبلىسىنا قاتىستى تاريح قويناۋىندا قالعان مالىمەتتەر دە باسىلعان.
كىتاپتىڭ قوس تومىن الماتى وبلىسىندا قۋعىن-سۇرگىن جىلدارىنداعى جايىتقا ارناعان الماتى وبلىستىق وڭىرلىك كوميسسيانىڭ جۇمىس توبىنىڭ جەتەكشىسى ەركىن يمانعازىۇلى اتالمىش كىتاپتى جارىققا شىعارۋ ىسىنە «ارحيۆتەگى رەۆوليۋتسيا» دەپ باعا بەردى.
«وڭىرلىك كوميسسيا مۇشەلەرى وسى ۋاقىت ارالىعىندا تىڭ مالىمەتتەردى ارحيۆتەن كوتەردى. توتە جازۋدان كيرريليتساعا اۋدارۋ ءۇشىن اۋدارماشىلار دا جۇمىلدىرىلدى. بىلگەن ادامعا تاريحتان ارتىق اسىل قۇندىلىق جوق. مەنىڭ ويىمشا، جۇمىس توبى ءوزىنىڭ ماقساتىنا جەتتى. بۇل ومىرشەڭ جوبا بولادى دەپ سەنەمىن»، - دەدى ەركىن يمانعازىۇلى.
تاريحي جازبانى تابىستاعان «قوعامدىق كەلىسىم جانە دامۋ ورتالىعىنىڭ باسشىسى ەلبوسىن اباي جارىق كورگەن تۋىندى ءوزىنىڭ سۇيىكتى وقىرمانىن تاباتىنىن ايتتى.
«ھاكىم اباي «ارتىق ءبىلىم كىتاپتا» دەيدى. سوندىقتان ساپالى كىتاپ قاشاندا قاجەت. سول سەبەپتى، بۇگىن بىزدەر، 400 داناعا جۋىق كىتاپتى الماتى وبلىستىق امبەباپ كىتاپحاناسىنا تابىستادىق. كىتاپحانا قورى تاعى ءبىر اسىل مۇرامەن تولىقتى دەپ ايتۋعا بولادى. وتكەنسىز-تاريح، بۇگىنسىز-بولاشاق جوق. سوندىقتان، وڭىرلىك كوميسسيا مۇشەلەرى بولعان ، كىتاپ شىعارۋعا ات سالىسقان ءار جانعا ايتار العىسىمىز بولەك»،-دەدى ەلبوسىن اباي.
ايتا كەتەيىك، ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك وڭىرلىك كوميسسياعا 10 ادام مۇشە بولعان. ولار تابان اۋدارماستان ۇلتقا قاجەتتى قۇندىلىقتى جيناقتاپ، 52 تومنان تۇراتىن كىتاپ شىعارىپ، ءبۇتىن ەلدىڭ وتكەنىن تۇگەندەدى.
