قاراعاندى وبلىسىندا "تازا قازاقستان" رەسپۋبليكالىق اكتسياسى اياسىندا اعاش ەگۋ جالعاسۋدا. كوگالداندىرۋ جۇمىستارىنا ەڭبەك ۇجىمدارى، وقۋشىلار مەن ەكو-بەلسەندىلەر قاتىستى دەپ حابارلايدى Adyrna.kz ءتىلشىسى.
وساكاروۆ اۋدانىندا "جاسىل ايماق" اپتالىعى اياسىندا 22-27 ءساۋىر ارالىعىندا 600 گۇلدەر مەن اعاشتار ەگۋ جوسپارلانعان.
سونىمەن قاتار اعاشتار مەن بۇتالاردى اكتەۋ جانە كەسۋ جۇمىستارى جوسپارلانعان.
"24 ساۋىردەگى جاعداي بويىنشا 222 جاسىل جەلەك وتىرعىزىلدى، 400 اعاش اكتەلدى، 94 توننا قوقىس شىعارىلدى، 19 بىرلىك تەحنيكا تارتىلدى، – دەپ حابارلادى وساكاروۆ اۋدانىنىڭ اكىمدىگى. – جۇمىستارعا بارلىعى 104 ۇجىم، 583 ادام قاتىستى. كوگالداندىرۋ جۇمىستارى ءالى دە جالعاسادى. سونىمەن قاتار، پوليتسيا قىزمەتكەرلەرى حالىقپەن پروفيلاكتيكالىق جۇمىس جۇرگىزۋدە، 10 ەسكەرتۋ رەسىمدەلدى جانە تازالىقتى ساقتاماعانى ءۇشىن 3 ايىپپۇل سالىندى".
تەمىرتاۋدا قالانى كوگالداندىرۋدا جاس ەرىكتىلەر بەلسەندىلىك تانىتىپ جاتىر. "شاڭىراق" ورتالىعىنىڭ ەكو-بەلسەندىلەرى مەن "كرەپىش" ءۇيسىز جانۋارلارعا كومەك كورسەتۋ الەۋمەتتىك جوباسىن ۇيىمداستىرۋشىلار كوشەت ەكتى. سونداي-اق، جۇمىستارعا "وتراجەنيە" قوعامدىق بىرلەستىگىنىڭ ەرىكتىلەرى جۇمىلدىرىلدى.
200-گە جۋىق ادام 670 اعاش ەكتى. بيىل قالادا بارلىعى 5300 اعاش ەگۋ جوسپارلانۋدا، ونىڭ ىشىندە وتەمدىك اعاش ەگۋ اياسىندا كوشەتتەر پايدا بولادى.
پريوزەرسك قالاسىندا جاسىل جەلەكتەردى ەگۋ 25 ساۋىردە باستالادى. قالاعا كىرە بەرىستە جانە ۇيىمدار اۋماعىندا 150 تەرەك پەن 300 قاراعاي ەگۋ جوسپارلانۋدا. بۇگىن اكتسياعا قاتىسۋشىلار ۋچاسكەلەردە جەردى وڭدەۋ جۇمىستارىن جۇرگىزۋدە.
ساران قالاسىندا "تازا قازاقستان" اكتسياسى اياسىندا شاعان، جوكە، ارشا جانە كۇمىس تەرەك اعاشتارىنىڭ 800 كوشەتىن ەگۋ جوسپارلانۋدا. جۇمىس 25 ساۋىردە باستالادى.
ەستەرىڭىزگە سالا كەتەيىك، قاراعاندىدا "تازا قازاقستان" رەسپۋبليكالىق ەكولوگيالىق اكتسياسى اياسىندا 23 ساۋىردە 90 مىڭنان استام اعاش كوشەتتەرىن ەگۋ باستالدى. قالادا كيرزاۆود اۋدانىندا ورتەنگەن ورمان قالپىنا كەلتىرىلىپ، مايقۇدىق ساياباعىندا "جاستار اللەياسى" اتتى جاڭا اللەيا اشىلدى.
اكتسيانىڭ ءار اپتاسى بەلگىلى ءبىر اتاۋمەن وتەدى. "جاسىل ايماق" اپتالىعى كوگالداندىرۋعا، اعاش ەگۋگە ارنالعان.
