الماتىدا اۆتوبۋس جۇرگىزۋشىسىن ۇرىپ، ءۇش ادامنىڭ ولىمىنە سەبەپشى بولعان ەر ادامعا قاتىستى سوت وتىرىسى تىكەلەي ەفيردە وتەدى، دەپ حابارلايدى "ادىرنا" ۇلتتىق پورتالى جوعارعى سوتتىڭ مالىمدەمەسىنە سىلتەپ.
الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا بۇزاقىلىق جاساپ، كولىكتى قاۋىپسىز پايدالانۋدى قامتاماسىز ەتۋ ەرەجەلەرىن بۇزىپ، ابايسىزدا ءۇش ادامنىڭ ولىمىنە اكەپ سوقتىرعان دەپ ايىپتالعان سوتتالۋشىعا قاتىستى قىلمىستىق ءىس بويىنشا كەزەكتى سوت وتىرىسى وتەدى.
جوعارعى سوت پەن سوت اكىمشىلىگى قوعامنىڭ قىزىعۋشىلىعىن ەسكەرىپ، سوت وتىرىستارىنىڭ ونلاين-ترانسلياتسياسىن ۇيىمداستىرۋ تۋرالى شەشىم قابىلدادى.
سوت وتىرىسى الماتى قالالىق قىلمىستىق ىستەر جونىندەگى مامانداندىرىلعان اۋدانارالىق سوتىندا 2024 جىلىڭ 24 ءساۋىر كۇنى ساعات 15:00-دە وتەدى. سوت پروتسەسىنىڭ ونلاين-ترانسلياتسياسى جوعارعى سوتتىڭ YouTube-ارناسىندا كورسەتىلەدى.
ەسكە سالا كەتەيىك، الماتىدا 2023 جىلعى 22 جەلتوقساندا 18 ساعات 15 مينۋتتا 47-باعىتتاعى قوعامدىق كولىكتىڭ جولاۋشىسى جانجال سالدارىنان جۇرگىزۋشى ايەلدى ۇرعان، ول ەسىنەن تانىپ، كولىكتى باسقارا الماي بىرنەشە ادامدى باسىپ كەتكەنىن حابارلاعان بولاتىنبىز. اپات سالدارىنان 3 ادام قازا تاپتى.
