ەگىس القاپتارىنىڭ الدىن الا قۇرىلىمىنا سايكەس وبلىس بويىنشا جالپى جازدىق ەگىس 5,3 ملن گا قۇرايدى، ونىڭ 4,8 ملن گا داندى جانە ءداندى — بۇرشاق داقىلدارى. بۇل رەتتە مايلى داقىلدار ەگىسىن 400 مىڭ گا دەيىن، ال جەمشوپ داقىلدارىن 368,5 مىڭ گا دەيىن ۇلعايتۋ جوسپاردا بار. قازىرگى كەزدە، اۋىل شارۋاشىلىعى تاۋارىن وندىرۋشىلەردى تۇقىمدىق ماتەريالمەن قامتاماسىز ەتۋ جۇمىستارى جۇرگىزىلىپ جاتىر.
«2024 جىلعى كوكتەمگى ەگىسكە تۇقىم قاجەتتىلىگى 536,8 مىڭ توننانى قۇرايدى. وزدەرىڭىز بىلەتىندەي، وتكەن جىلعى كۇزدەگى جاۋىن-شاشىن استىقتىڭ ساپاسىنا ايتارلىقتاي اسەر ەتتى. وسىعان بايلانىستى وبلىستىڭ اۋىل شارۋاشىلىعى تاۋارىن وندىرۋشىلەر بيىلعى ەگىسكە قاجەتتى تۇقىمدىق ماتەريالمەن قامتاماسىز ەتۋ ماسەلەسىن ەرتە باستان شەشۋگە كىرىستى. جىل باسىنان بەرى اقمولا وبلىسىندا ءوڭىردىڭ جانە قازاقستاننىڭ باسقا دا وڭىرلەرىنىڭ اتتەستاتتالعان تۇقىم شارۋاشىلىعى سۋبەكتىلەرىنەن، سونداي-اق رەسەي فەدەراتسياسى مەن ەۋروپا ەلدەرىنەن 30 مىڭ تونناعا جۋىق جانە بۋدانداستىرىلعان 10 مىڭ تونناعا جۋىق تۇقىمى ساتىپ الىندى»، - دەدى كەنەش ءالىمجانوۆ.
باسقارما باسشىسى اتاپ وتكەندەي، قارجىلاندىرۋدى كۇتىپ وتىرعان، ۋاعدالاستىقتارى بار نەمەسە كوكتەمگى ەگىس جۇمىستارىنا تۇقىممەن تولىق قامتاماسىز ەتۋ ءۇشىن تولەۋگە ءتيىستى كەلىسىمشارتتار جاسالعان شارۋاشىلىقتار بار.
وبلىستىڭ ءىرى جانە ورتا اۋىل شارۋاشىلىعى تاۋارىن وندىرۋشىلەرىنىڭ نەگىزگى بولىگى كوكتەمگى ەگىس جۇمىستارىن جۇرگىزۋ ءۇشىن تۇقىممەن تولىق كولەمدە قامتاماسىز ەتىلگەن. سونىمەن قاتار، اتتەستاتتالعان شارۋاشىلىقتاردا ساتۋعا 5 مىڭ تونناعا جۋىق تۇقىم بار. وڭىردە «ازىق-تۇلىك كورپوراتسياسى» ارقىلى تاۋارلىق كرەديت بەرۋ ارقىلى ازىق-تۇلىك استىعىن تۇقىم رەتىندە ساتۋدىڭ 2024 جىلعا ارنالعان باعدارلاماسى جۇمىس ىستەيدى.
«اگروتەحنيكالىق شارالار مەن وزىق تەحنولوگيانى قولدانۋ ارقىلى مول ءونىم الۋعا بولادى. سونىمەن بىرگە، توپىراقتىڭ قۇنارلىلىعى دا ۇلكەن ماڭىزعا يە. وتكەن جىلدان باستاپ كوپتەگەن اۋىل شارۋاشىلىعى تاۋارىن وندىرۋشىلەر مينەرالدى تىڭايتقىشتار ساتىپ الدى. بيىل تىڭايتقىشتاردى ەنگىزۋ كولەمىن 258,5 مىڭ تونناعا دەيىن ۇلعايتۋ جوسپارلانعان. مەملەكەت تاراپىنان بۇل باعىت بويىنشا قولداۋ كورسەتىلۋدە. ياعني، 13 ناۋرىزدان باستاپ وتاندىق تىڭايتقىشتاردى ساتىپ الۋعا اۆانستىق سۋبسيديالاۋدىڭ مۇلدەم جاڭا تەتىگى ەنگىزىلدى. مەحانيزم وتاندىق تىڭايتقىشتار ءۇشىن سۋبسيديالار نورماسىن 50 پايىزدان 60 پايىزعا دەيىن ۇلعايتۋدى كوزدەيدى، ال شەتەلدىك تىڭايتقىشتار ءۇشىن ول تىڭايتقىشتاردىڭ ەڭ تومەنگى قۇنىنىڭ 50 پايىز دەڭگەيىندە قالادى»، - دەدى باسقارما باسشىسى.
ارزانداتىلعان ديزەل وتىنىنىڭ كەپىلدىك بەرىلگەن كولەمىنە كەلەتىن بولساق، بيىلعى ەگىس ناۋقانىنا قاجەتتى ديزەل وتىنىنىڭ كولەمىن قالىپتاستىرۋ اۋىل شارۋاشىلىعى تاۋارىن وندىرۋشىلەردىڭ ەلەكتروندىق وتىنىمدەرى نەگىزىندە gosagro.kz مەملەكەتتىك اقپاراتتىق جۇيەسى ارقىلى جۇزەگە اسىرىلدى. پاۆلودار مۇناي-حيميا زاۋىتىنىڭ 82,5 مىڭ توننا ديزەل وتىنىنا 2163 ءوتىنىم قالىپتاستىرىلدى. شارتتار جاساسۋ، ديزەل وتىنىن تولەۋ جانە جەتكىزۋ ءۇشىن دەربەس 15 وپەراتور جانە ەكى ءىرى اۋىل شارۋاشىلىعى قۇرىلىمدارى انىقتالدى.
باسقارما باسشىسى اتاپ وتكەندەي، قازىر الاڭداۋعا ەش نەگىز جوق. 22 ساۋىرگە 59,2 مىڭ تونناعا شارتتار جاسالدى، 37,3 مىڭ توننا تولەندى جانە 33,3 مىڭ توننا نەمەسە قاجەتتى كولەمنىڭ 40,4 پايىزى جونەلتىلدى.
جۇمىس كەستەسىنە سايكەس وبلىستا 20 جۇمىس كۇنى ىشىندە ءداندى داقىلداردى ەگۋ جوسپارلانعان. بيىل تۇقىم سەبۋ ناۋقانىنا 15,1 مىڭ تراكتور، 16,6 مىڭ سەپكىش جانە 1,5 ونىمدىلىگى جوعارى ەگىس كەشەنى جۇمىلدىرىلادى. قازىرگى كەزدە وڭىردە كوكتەمگى دالا جۇمىستارىن جۇرگىزۋ ءۇشىن قاجەتتى اۋىل شارۋاشىلىعى تەحنيكالارى دايىن. شارۋاشىلىقتار جاڭا اۋىل شارۋاشىلىعى تەحنيكالار ساتىپ الىپ، ماشينا-تراكتور پاركىن جاڭارتىپ جاتىر. زاماناۋي تەحنيكانى قولدانۋ ەگىس ساپاسىن قامتاماسىز ەتۋگە، اۋىل شارۋاشىلىعى وندىرىسىنە ناقتىلى ەگىنشىلىك ەلەمەنتتەرىن ەنگىزۋگە جانە جاڭعىرتۋ ءۇشىن نەگىز جاساۋعا مۇمكىندىك بەرەدى. 2023 جىلدىڭ قورىتىندىسى بويىنشا 70,2 ملرد.تەڭگەدەن استام سوماعا 2195 بىرلىك اۋىل شارۋاشىلىعى تەحنيكاسى ساتىپ الىندى، جاڭارتۋ 5,5% - عا جەتتى. اعىمداعى جىلدىڭ ءۇش ايىندا 248 اۋىل شارۋاشىلىعى ماشيناسى ساتىپ الىندى.
قارجىلاندىرۋعا كەلەتىن بولساق. قازىردىڭ وزىندە فەرمەرلەر ازىق-تۇلىك كورپوراتسياسى ارقىلى استىقتى فورۆاردتىق ساتىپ الۋ تەتىگى بويىنشا قاراجات الا الادى. ءساۋىر ايىنىڭ ورتاسىندا 11,7 ملرد تەڭگەگە 81 ءوتىنىم قابىلداندى. «كەڭ دالا» باعدارلاماسى اياسىندا 34,9 ملرد تەڭگەگە 363 ءوتىنىم بەرىلدى، 28 ملرد تەڭگەدەن استام ءوتىنىم بەرىلدى.
