22 ءcاۋىر كۇنى MNU ۋنيۆەرسيتەتىندە “AL Jazeera week” اشىلۋ سالتاناتى ءوتتى. “AL Jazeera” حالىقارالىق جۋرناليستيكا مەكتەبىنىڭ ستۋدەنتتەرىنە ءبىر اپتا بويى ترەنينگ وتكىزەدى. كەزدەسۋ قازاقستان رەسپۋبليكاسى پرەزيدەنتىنىڭ تەلەراديوكەشەنى مەن AL Jazeera Media Network كومپانياسىمەن ۇيىمداستىرىلدى.
ءىس-شارا بارىسىندا ۋنيۆەرسيتەت باسقارما توراعاسى تالعات نارىكباەۆ پەن AL Jazeera Media Institute باسشىسى ەمان ال-امري ىنتىماقتاستىق تۋرالى مەموراندۋمعا قول قويدى.
كاتار تەلەارناسىنىڭ ماماندارى ستۋدەنتتەرگە جاڭالىقتار رەپورتاجى، دەرەكتەر جۋرناليستيكاسى، ءموبيلدى جۋرناليستيكا، تسيفرلىق جۋرناليستيكا جانە جاڭالىقتار جۇرگىزۋ كۋرستارى سياقتى تاقىرىپتار بويىنشا تەوريالىق جانە تاجىريبەلىك ءدارىس وقيدى.
سپيكەر رەسۋل سەردار اتاس بۇل ىنتىماقتاستىق ءوزارا تاجىريبە الماسۋعا ۇلكەن مۇمكىندىك دەپ سانايدى.
“MNU ستۋدەنتتەرى شىنىمەن وتە اقىلدى ەكەنىن بايقادىم. ولاردىڭ لەكتسيا بارىسىندا قوياتىن سۇراقتارىنا قاراپ وقۋعا دەگەن قىزىعۋشىلىعى بىردەن كوزگە تۇسەدى. بۇل ترەنينگ ال جازيرا مەدياسى مەن ماقسۇت نارىكباەۆ اتىنداعى ۋنيۆەرسيتەت اراسىندا بايلانىستى نىعايتادى. دەگەنمەن بۇل تەك ال جازيرانىڭ ترەنينگى دەپ قابىلداۋ قاتە. سەبەبى، بۇل ەكى ۇيىم اراسىنداعى ىنتىماقتاستىق - ياعني ەكى جاقتىق جۇمىس”، - دەيدى ول.
حالىقارالىق جۋرناليستيكا مەكتەبىنىڭ دەكانى ايگۇل جامالوۆا ءىس-شارانىڭ ءبىر جىل ارالىعىندا ۇيىمداستىرىلعانىن ايتتى. بولاشاقتا تاعى ترەنەرلەردى الىپ كەلۋ ءتىپتى جاس جۋرناليستەردى پراكتيكاعا جىبەرۋ ويدا بار دەيدى.
“ال جازيرا بۇكىل الەمدىك توپ 10 تەلەارنا قاتارىنا كىرەدى. ولاردا BBC سياقتى بۇرىننان قالىپتاسىپ كەلە جاتقان مەديا تاريحى بولماعانىمەن، 15-20 جىلدىڭ ىشىندە وسىنداي دەڭگەيگە جەتتى. بۇل ارنا اشىلعان كەزدە بريتانيا مەن امەريكانىڭ CNN, BBC, ABC-دا جۇمىس ىستەگەن ەڭ مىقتى جۋرناليستەردى تارتىپ جەرگىلىكتى ماماندارعا ءبىلىم بەردى. سول سەبەپتى ءبىر اپتا بويى وتەتىن ترەنينگ ستۋدەنتتەرگە كۇشتى پراكتيكا”، - دەيدى ايگۇل جامالوۆا.
AL Jazeera — دوحادا ورنالاسقان، 1996 جىلى كاتار ءامىرىنىڭ جارلىعىمەن قۇرىلعان حالىقارالىق تەلەكومپانيا. ول اۋعانستانداعى كواليتسيا كۇشتەرىنىڭ اۋە سوققىلارى جايلى حابارلاپ، ۋساما بەن لادەننىڭ مالىمدەمەلەرىن كورسەتە باستاعاننان كەيىن الەمگە تانىلدى. تەلەۆيزيالىق كومپانيا الەمنىڭ كوپتەگەن ەلدەرىندە اراب جانە اعىلشىن تىلدەرىندە حابار تاراتادى. جالپى 50-دەن استام شەتەلدىك بيۋرولارى بار.
اقبايان اراپشاەۆا
