رەسپۋبليكالىق ادۆوكاتتار القاسىنىڭ توراعاسى ايدىن بيكەباەۆ ەكس-مينيستر قۋاندىق بيشىمباەۆتىڭ ىسىنە قاتىساتىن ادۆوكاتتاردى جاريا تالقىلاماۋعا شاقىردى، دەپ حابارلادى «ادىرنا» ءتىلشىسى.
«ادۆوكاتتاردى بيشىمباەۆ ىسىنە قاتىساتىن ارىپتەستەرىن جاريا تالقىلاۋدى توقتاتۋعا شاقىرامىن. بۇل ارەكەتتەر كاسىبي ادەپ كودەكسىن بۇزۋعا اكەلۋى مۇمكىن. ءار نارسەنىڭ شەگى بولۋى كەرەك. ءاربىر ادۆوكات ادۆوكاتۋرانىڭ بەدەلىن ويلاۋى ءتيىس»،—دەدى ول.
سونداي-اق ايدىن بيكەباەۆ جاقىن كۇندەرى وسى ىسكە قاتىستى جيىن وتەتىنىن مالىمدەدى.
«رەسپۋبليكالىق ادۆوكاتتار القاسىنىڭ تورالقاسى الداعى كۇندەرى وسى ىسكە بايلانىستى بارلىق ماسەلەلەر بويىنشا اۋماقتىق ادۆوكاتتار القالارى باسشىلارىنىڭ قاتىسۋىمەن ارنايى كەڭەيتىلگەن وتىرىس وتكىزەدى»،—دەپ تولىقتىردى توراعا.
ايتا كەتەيىك، ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن ءىستى بولىپ جاتقان ەكس-مينيستر قۋاندىق بيشىمباەۆتى ادۆوكات لەيلا رامازانوۆا، نازكەن قۇسايىنوۆا جانە ەرلان عازىمجانوۆ قورعاپ جاتىر.
