2022 jyly 17 qazanda eks-mınıstr Qýandyq Bıshimbaev pen Saltanat Núkenovanyń nekesin qıǵan respýblıkalyq bas meshittiń ımamy Qanat Qydyrmınge qatysty tártiptik shara qoldanyldy. Bul týraly múftııattyń baspasóz hatshysy Aǵabek Qonarbaıuly aıtty, dep habarlaıdy «Adyrna» tilshisi.
«2022 jyldyń 17 qazanynda Astana qalasyndaǵy Respýblıkalyq bas meshitte Q.Bıshimbaev pen S.Núkenovanyń óz ótinishteri boıynsha kýágerlerdiń qatysýymen olardyń nekeleri qıylǵan. Atalǵan azamattardan jáne olardyń týystarynan AHAT bólimine tirkelgenin rastaıtyn kýálik talap etilgende, «jasalyp jatyr» dep jaýap bergen. Olar dástúrge saı eki jaqtyń ata-analarynyń batasy men ruqsatyn alǵanyn, salt-dástúr jolymen nekelerin qıyp berýin ótingen. Atalǵan azamattardan AHAT bólimine tirkelgenin rastaıtyn kýálikti tabandy túrde talap etpegen, ıaǵnı QMDB-nyń ishki jumys tártibin buzǵan respýblıkalyq bas meshittiń ımamy Qanat Qydyrmınge tártiptik shara qoldanylyp, eskertý jasaldy», - dep jazdy ol.
Sondaı-aq QMDB azamattyq nekeniń zınaǵa jatatynyn eskertti.
«Qazaqstan musylmandary dinı basqarmasy AHAT bóliminde resmı tirkelmeı nemese musylmansha neke qıylmaǵan «azamattyq neke» zına bolyp sanalatynyn málimdeıdi. Joǵaryda atalǵan teris sıpattaǵy «azamattyq nekeniń» sharıǵattaǵy úkimi – haram. Musylman balasy arty opyq jegizetin mundaı aýyr ári las kúnádan aýlaq bolýy tıis»,—delingen habarlamada.
