جامبىل وبلىسىندا پوليتسيا قىزمەتكەرىن پىشاقتاپ، دەنەسىن ورتەپ جىبەرگەن

3489
Adyrna.kz Telegram

جامبىل وبلىسىنىڭ شۋ اۋدانىندا پوليتسيا مايورىنىڭ مۇردەسى تابىلدى. كەۋدە تۇسىنان پىشاق جاراقاتىن العان پوليتسەيدىڭ دەنەسى ورتەلگەن ەكەن، دەپ حابارلايدى Stan.kz اقپارات اگەنتتىگى .

باسىلىم مالىمەتىنشە، بەلگىسىز ايەل جايساڭ اۋلىنىڭ شەتىندە مۇردە جاتقانىن تەلەفون ارقىلى حابارلاعان. وقيعا ورنىنا جەتكەن پوليتسەيلەر وزدەرىنىڭ ارىپتەسى – قورداي اۋداندىق پوليتسيا ءبولىمى جەرگىلىكتى پوليتسيا قىزمەتىنىڭ ۇيىمداستىرۋ-ساراپتامالىق جۇمىستار توبىنىنىڭ 30 جاستاعى ينسپەكتورى، ەكى بالانىڭ اكەسى باعدات مامىلەەۆتىڭ ورتەنگەن دەنەسىن كورىپتى.

ونىڭ جەكە كۋالىگى مەن قىزمەتتىك كۋالىگى تۇلعاسىن كۋالاندىردى. سونىمەن قاتار قۇجاتتار جاتقان پاكەتتە ۇيالى تەلەفون، قۋاتتاندىرعىش، ازداعان اقشا، دجينسى شالبار، ەكى جەيدە جانە اۋىستىراتىن كيىمدەرى بولعان. زاتتار سالىنعان پاكەت مۇردەدەن 10 مەتر جەردە جاتقان.

سونداي-اق، پوليتسەيدىڭ 3 جىل بۇرىن جول-كولىك اپاتىنان العان جاراقاتىنىڭ ءىزى ونىڭ تۇلعاسىن انىقتاۋعا مۇمكىندىك بەرىپتى.

باسىلىم مالىمەتىنشە، پوليتسەيدىڭ ولىمىنە ۇرلىق نەمەسە قاراقشىلىق سەبەپ بولۋى مۇمكىن ەمەس. كەرىسىنشە جاعدايدا، قىلمىسكەر ۇيالى تەلەفون مەن اقشانى ۇرلاپ كەتەر ەدى.

«وندا قاندى قىلمىسقا نە سەبەپ بولدى؟ پوليتسەيدى پىشاقتاپ، ارتىنشا ورتەپ، مۇردەسىن ادامدار كورەتىن جەرگە تاستاپ كەتۋدە الدەقانداي قارسىلىق ءبىلدىرۋ بار. جامبىل وبلىستىق پوليتسيا باسشىلىعى پىكىر بىلدىرۋدەن باس تارتىپ وتىر. دەسە دە بۇل وقيعانى اشۋعا بارلىق پوليتسيا كۇشتەرى جۇمىلدىرىلعانى انىق»، - دەلىنەدى باسىلىمدا.

پىكىرلەر