تارازدا "تازا قازاقستان" اكتسياسى ءوتتى، دەپ حابارلايدى "ادىرنا" ءتىلشىسى.
مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، جامبىل وبلىسىندا رەسپۋبليكالىق «تازا قازاقستان» اكتسياسى اياسىندا «تازا اۋلا. تازا ولكە. تازا ەل!» ەكولوگيالىق ناۋقانى باستاۋ العان بولاتىن. اۋقىمدى اكتسيانىڭ ەكىنشى اپتاسى «كيەلى مەكەن» دەگەن اتاۋمەن تاريحي-مادەني ەسكەرتكىشتەردىڭ اۋماعىن اباتتاندىرۋعا ارنالدى.
سوعان وراي بۇگىن “جەڭىس” ساياباعىنداعى باۋىرجان مومىشۇلى ەسكەرتكىشىنە سانيتارلىق تازالىق جۇمىستارى جۇرگىزىلدى. شاراعا تاراز قالاسى اكىمىنىڭ ورىنباسارى قايرات يسمايل قاتىسىپ، بەلسەندى جانە ەرىكتى جاستارمەن بىرگە ساياباققا تال كوشەتتەرىن وتىرعىزدى.
جالپى وسى كۇنى دەمالىس ورنىنا 500 ءتۇپ راۋشان گۇلى، 30 تۋيا مەن 20 ياسين اعاشى ەگىلدى.
رەسپۋبليكا كولەمىندە ۇيىمداستىرىلعان اۋقىمدى اكتسيانىڭ شەڭبەرىندە تاراز قالاسىندا ەكولوگيالىق ءىس-شارالار وتكىزىلۋدە. ولاردىڭ ارقايسىسى بەلگىلى ءبىر تاقىرىپقا ارنالعان. ايشىقتى ناۋقان الداعى ۋاقىتتا دا ءوز جالعاسىن تابادى.
