تاراز قالاسىنىڭ اكىمى باقىتجان ورىنبەكوۆ تىنىشباەۆ كوشەسى، №1/1 مەكەنجايىندا ورنالاسقان ءورت بولعان ءۇيدىڭ تۇرعىندارىمەن كەزدەستى. جيىن بارىسىندا شاھار باسشىسى توتەنشە جاعدايدىڭ سالدارىن جويۋ بويىنشا قابىلدانعان شەشىمدەردى كەڭىنەن ءتۇسىندىرىپ، تۇرعىندارعا كورسەتىلەتىن قولداۋ شارالارى مەن الداعى اتقارىلاتىن جۇمىستاردى جەتكىزدى.
ەسكە سالا كەتەيىك، اعىمداعى جىلدىڭ 10 قىركۇيەگى كۇنى اتالعان مەكەنجايداعى باراق تيپتەس، 10 پاتەرلى تۇرعىن ءۇيدىڭ شاتىرى ورتەنگەن بولاتىن. ءورتتىڭ جالپى اۋماعى شامامەن 250 شارشى مەتردى قۇرادى.
ءتىلسىز جاۋدى ءسوندىرۋ جۇمىستارىنا توتەنشە جاعدايلار دەپارتامەنتىنىڭ 30 قىزمەتكەرى مەن 8 بىرلىك تەحنيكاسى، سونداي-اق اپاتتار مەديتسينا ورتالىعىنىڭ (تسمك) 4 قىزمەتكەرى مەن 1 بىرلىك تەحنيكاسى جۇمىلدىرىلدى. قۇتقارۋشىلاردىڭ كۇشىمەن 2 ادام قاۋىپسىز جەرگە ەۆاكۋاتسيالانىپ، قىزىل جالىن ساعات 15:30-دا تولىقتاي وقشاۋلاندى. تۇرعىن ۇيدە بارلىعى 30 ادام، ونىڭ ىشىندە 5 كامەلەتكە تولماعان بالا تۇرعان. ءتىلسىز جاۋدىڭ سالدارىنان قازا تاپقاندار مەن جاراقات العاندار جوق.
زارداپ شەككەن تۇرعىنداردىڭ باسىم بولىگى تۋىستارىنىڭ ۇيلەرىنە ۋاقىتشا ورنالاستىرىلعان. ۋاقىتشا باسپاناعا مۇقتاج بولعان 3 وتباسىنىڭ 2-ەۋى الەۋمەتتىك مەكەمەگە جاتقىزىلسا، 1 جانۇيا جاسقا تولماعان بالاسىنىڭ بولۋىنا بايلانىستى وتباسىن قولداۋ ورتالىعىنا جايعاستىرىلدى.
قالا اكىمىنىڭ تاپسىرماسىمەن ارنايى قۇرىلعان توتەنشە جاعدايلاردىڭ الدىن الۋ جانە ولاردى جويۋ جونىندەگى كەزەكتەن تىس كوميسسيا بىرنەشە كۇن بويى جان-جاقتى ساراپتاما جۇرگىزدى. كوميسسيانىڭ ۇيعارىمىمەن اتالعان كوپپاتەرلى ۇيدە توتەنشە جاعداي جاريالاۋ تۋرالى شەشىم قابىلداندى. سونداي-اق وقىس وقيعا سالدارىنان كەلتىرىلگەن زالالدىڭ مولشەرى ەسكەرىلە وتىرىپ، زارداپ شەككەن 10 وتباسىنىڭ ارقايسىسىنا مەملەكەت تاراپىنان 300 ايلىق ەسەپتىك كورسەتكىش مولشەرىندە الەۋمەتتىك كومەك كورسەتىلەدى. بۇل قاراجات تۇرعىنداردىڭ ازىق-تۇلىك جانە كۇندەلىكتى قاجەتتى زاتتارىن قامتاماسىز ەتۋىنە باعىتتالعان.
سونىمەن قاتار زاقىمدانعان تۇرعىن ءۇيدىڭ شاتىرى مەن جابىندىسىنا جوندەۋ جۇمىستارى جۇرگىزىلىپ، تولىعىمەن قالپىنا كەلتىرىلەتىن بولادى. وعان قالا اكىمدىگىنىڭ رەزەرۆتىك قورىنان قارجى قاراستىرىلىپ وتىر.
تۇرعىندار دا ءوز كەزەگىندە قيىن ساتتە جاردەم كورسەتكەن قالا باسشىلىعىنا شىنايى ريزاشىلىقتارىن ءبىلدىردى.
– ءورت بولعان ساتتەن باستاپ قالا اكىمدىگى تاراپىنان جاعدايىمىزعا تۇسىنىستىكپەن قاراپ، قاجەتتى كومەك كورسەتىلىپ كەلەدى. وسىنداي قيىن كەزدە ءبىزدى نازاردان تىس قالدىرماي، ماسەلەمىزدى شەشۋگە ناقتى قولداۋ بىلدىرگەن قالا اكىمىنە جانە بارلىق جاۋاپتى ماماندارعا العىسىمىزدى بىلدىرەمىز. اسىرەسە ۋاقىتشا باسپانامەن قامتاماسىز ەتۋ، الەۋمەتتىك كومەك كورسەتۋ جانە ءۇيىمىزدى قالپىنا كەلتىرۋ بويىنشا قابىلدانعان شەشىمدەر ءبىز ءۇشىن ۇلكەن دەمەۋ بولدى، – دەيدى قالا تۇرعىنى ءۇربيبى بولسىنوۆا.
بۇل باعىتتاعى جۇمىستاردىڭ ساپالى ءارى ۋاقتىلى ورىندالۋى قالا اكىمىنىڭ ءجىتى نازارىندا.
