اۋىز سۋ ۇڭعىمالارى تازارتىلىپ جاتىر، دەپ حابارلايدى "ادىرنا" ءتىلشىسى.
اۋدان ورتالىعى تۇرعىندارىنا بەلگىلى لەكەر كولىندە ورنالاسقان تازا سۋ ۇڭعىمالارىنا كولگە جينالعان قاردىڭ سۋى كىرۋىنە وراي كازتالوۆ اۋىلىنا جەتكىزىلىپ جاتقان اۋىز سۋ «تۇتىنۋعا جارامسىز» دەپ تانىلعان بولاتىن. وسىدان ءبىر اپتا بۇرىن اۋدان اكىمى اسلانبەك سارقۇلوۆتىڭ باستاماسىمەن ۇڭعىمالاردىڭ اينالاسى بەكىتىلىپ، سۋ كوتەرەتىن قۇدىقتار ىشىنە جينالعان سۋ سىرتقا ايدالىپ، تازارتىلعان بولاتىن.
11 ءساۋىر كۇنى اۋدان باسشىسى اسلانبەك احمەتوللاۇلى لەكەر كولىنە بارىپ، تازا اۋىز سۋ ۇڭعىمالارىن تازارتۋ جۇمىسىنا قاتىستى. بايقاعانىمىزداي، كولگە جينالعان سۋدىڭ دەڭگەيى ءبىراز تۇسكەن. ۇڭعىمالارداعى جينالعان سۋ سورىلىپ، ءىشىن تازارتۋ جۇمىستارى اتقارىلدى. ەندىگى از ۋاقىت ىشىندە ۇڭعىمىلار اينالاسى كەۋىپ قالاتىن ءتۇرى بار.
سوڭعى كۇندەرى اۋىل تۇرعىندارىنىڭ ايتۋىنشا، لايلانعان سۋدىڭ ءتۇسى ءبىراز تازارعانى بايقالادى. اۋدان باسشىسى لەكەر كولىندەگى ۇڭعىمالار اينالاسى سۋدان كەۋىپ، تۇگەل تازارعاسىن اۋىز سۋ سىنامالارىن ارنايى زەرتحانالىق ساراپتاماعا جولداناتىندىعىن جەتكىزدى. ساراپتاما قورىتىندىسىنا وڭ شىقسا، جاقىن ارادا اۋىلداستار قايتادان تازا اۋىز سۋمەن قامتىلاتىن بولادى.
