شىعىس قازاقستان وبلىسى الاكول جاعالاۋىندا بۇقارالىق سپورتتان ءىى رەسپۋبليكالىق ۆەلوجارىس ءوتتى. ەلىمىزدىڭ ءار وڭىرىنەن كەلگەن 100 سپورتشى 16 شاقىرىمدىق جارىسقا ءتۇسىپ، مىقتىسى انىقتالدى. كۇننىڭ قاپتاپ ىستىعىنا قاراماستان 4 جاستاعى بالامەن بىرگە 80 جاستاعى قارتتار دا باقتارىن سىنادى. جاس ەرەكشەلىگى بەلگىلەنبەگەن بۇل جارىس ەلىمىزدىڭ تۋريستىك ينفراقۇرىلىمى دامىعان الاكول جاعالاۋىندا ءوتۋى قاتىسۋشىلار مەن كورەرمەندەردى قۋانتتى. – مەن كورەرمەن جانە سپورت جانكۇيەرى رەتىندە بيىل ەكىنشى رەت بۇل جارىستى تاماشالاپ وتىرمىن. ءوتۋ بارىسى مەن ۇيىمداستىرۋشىلىق جاعى وتە جوعارى دەڭگەيدە. الاكول جاعالاۋى جىل سايىن كوركەيىپ، اباتتاندىرۋ جۇمىستارى كوز تارتادى. جاقسى دەمالىسپەن قاتار ءتۇرلى جارىستاردىڭ، مەرەكەلىك كەشتەردىڭ ءوتۋى جۇرتشىلىقتى قاتتى قۋانتىپ، كەرەمەت كوڭىل-كۇي سىيلايدى، - دەيدى استانالىق دەمالۋشى مارجان الىبەكقىزى.
شارا قورىتىندىسى بويىنشا ءى ورىندى ۇرجارلىق نۇرتاي بايتيكوۆ يەلەنىپ، جۇلدەگە قويىلعان سۋ جاڭا ۆەلوسيپەدتى ءمىندى. سونىمەن قاتار، جارىسقا قاتىسقان ەڭ جاس جانە ەگدە جاستاعى ازاماتتار امىرعالي مۇراتبەكوۆ، ايجان كيماديەۆا، نۇرلانبەك ساندىباەۆ، زياش جاقىپبەكوۆا، نۇرتاي بايتيكوۆ، ەۆگەني مەدۆەد «ابسوليۋتتىك جەڭىمپاز»، «جەڭىسكە دەگەن جىگەرى ءۇشىن» اتتى نوميناتسيالارعا يە بولدى. بارلىق قاتىسۋشىلار قر مادەنيەت جانە سپورت مينيسترلىگىنىڭ ديپلومدارىمەن جانە باعالى سىيلىقتارمەن ماراپاتتالدى.
اۋقىمدى شارانىڭ ەلىمىزدىڭ شىعىسىنداعى كورىكتى جەرلەرىنىڭ ءبىرى – الاكول جاعاسىندا ءوتۋى وتە ورىندى. ويتكەنى تۋريستىك مەكەن جىل سايىن اجارلانىپ، جاڭا رەڭگە يە بولىپ وتىر. قازىرگى كۇنى وبلىس اكىمى دانيال احمەتوۆتىڭ باسشىلىعىمەن الاكولدە اباتتاندىرۋ، كوگالداندىرۋ، قۇرىلىس جۇمىستارى جوعارى دەڭگەيدە جۇرگىزىلىپ، ءىرى جوبالار ىسكە اسىرىلعان. بۇل تۋريستىك كەشەننىڭ الەۋمەتتىك-ەكونوميكالىق الەۋەتىن ەسەلەپ، ەل ماقتايتىن مەكەننىڭ كەلبەتىن كەلتىردى. "تسيفرلى قازاقستان" جوباسى اياسىندا ورتالىققا زاماناۋي پوتتار ورنالاستىرىلىپ، كەز كەلگەن دەمالۋشى ۇناعان دەمالىس ءۇيىن ونلاين جۇيەدە تاڭداي الادى. سونىمەن بىرگە، اجارىمەن كوز تارتاتىن اربات پەن ونداعى ءتۇرلى-ءتۇستى سۋبۇرقاقتار، كول جاعاسىنداعى وازيس باعىتىندا قولعا الىنعان ساياباق، قابانباي اۋىلىنداعى تاريحي-ولكەتانۋ مۇراجايى مەن كول جاعاسىندا بوي كوتەرگەن جاڭا نىساندار اتقارىلعان اۋقىمدى جۇمىستىڭ ناتيجەسى. سوڭعى دەرەكتەر بويىنشا كول باسىنا شومىلۋ ماۋسىمى باستالعالى ەلىمىزدىڭ بارلىق وبلىستارى مەن شاقىن شەتەلدەردەن 1 ميلليونعا تارتا دەمالۋشىلار كەلگەن. بۇل الاكولدىڭ ءيميدجىن كوتەرىپ، تۋريستىك سالانى دامىتۋدا. دەمالۋشىلار قولايلىعى ءۇشىن پوەزد جولى اشىلىپ، ارنايى اۋە رەيستەرى دە تىڭعىلىقتى جۇمىس جاساپ تۇر.
"ادىرنا" ۇلتتىق پورتالى
