تورعاي وزەنىندەگى سۋ دەڭگەيىنىڭ كوتەرىلۋىنە بايلانىستى نۇرا مەن مامىر اۋىلدارىن سۋ باستى، دەپ حابارلايدى "ادىرنا" ءتىلشىسى "دياپازونعا" سىلتەپ.
ىرعىز اۋدانىنداعى مامىر، نۇرا اۋىلدارىنا تورعاي وزەنىنەن كەلگەن سۋ كىردى. اۋىل تۇرعىندارى مەن توتەنشە جاعدايلار قىزمەتكەرلەرى، جەرگىلىكتى اتقارۋشى ورگان وكىلدەرىنەن 120-دان استام ادام، 7 تەحنيكا جۇمىلدىرىلعانىمەن، بوگەت بۇزىلدى.
"نۇرا اۋىلىندا قورعانىس بوگەتى شايىلىپ، اۋىلدى سۋ باستى. احۋالدى باعامداۋ ءۇشىن وبلىستىق توتەنشە جاعدايلار دەپارتامەنتىنىڭ باستىعى نۇرعالي ءجۇنىسوۆ مي-8 تىكۇشاعىمەن جەتتى. مۇندا الدىن الا 1 100 دانا قاپ جانە 390 توننا ينەرتتى ماتەريال تاسىمالدانعان بولاتىن. بۇل اۋىلدان 12 جانە 13 ءساۋىر كۇندەرى 242 ادام الدىن الا ەۆاكۋاتسيالاندى. ولار ىرعىز اۋدانىنىڭ ورتالىعىندا ۇيىمداستىرىلعان قاۋىپسىز ورىنعا كوشىرىلدى. قالعانى تۋىسقاندارىنىڭ ۇيىنە جەتكىزىلدى. نۇرا اۋىلىندا 112 تۇرعىن ءۇي بار، 691 ادام تۇرادى", – دەدى اقتوبە وبلىسى اكىمىنىڭ ءباسپاسوز قىزمەتى.
