قازاقستاندا الەۋمەتتىك-ساياسي جاعدايدى تۇراقسىزداندىرۋ ارەكەتتەرى ءجۇرىپ جاتىر. بۇل تۋرالى ءماجىلىس دەپۋتاتى، «AMANAT» پارتياسى فراكتسياسىنىڭ مۇشەسى ەرلان سايروۆ «Abay live» Youtube-ارناسىنا بەرگەن سۇحباتىندا مالىمدەدى.
اۋقىمدى تابيعي اپات جاعدايىندا، ءدال وسى قيىن كەزەڭدە «ەسكى قازاقستاننىڭ» جەكەلەگەن وكىلدەرى جاعدايدى پايدالانۋعا تىرىسادى، دەپ ەسەپتەيدى ەرلان سايروۆ. پارلامەنتاريدىڭ ايتۋىنشا، رەۆانشيستىك كۇشتەر قوعامدا ساياسي تۇراقسىزدىقتى ورناتۋعا بىرنەشە رەت ارەكەت جاسادى.
«كونستيتۋتسيا بويىنشا بىزدە زاڭدى پرەزيدەنت بار، ول – قاسىم-جومارت توقاەۆ. ءبىزدىڭ مىندەتىمىز – كونستيتۋتسيا نورمالارىن قاتاڭ ساقتاۋ جانە ءبىز ونى قورعاۋعا دايىنبىز. شىن مانىندە، بۇل جاي عانا سىن ەمەس، بۇل رەۆانشيستىك كۇشتەردىڭ ساياسي تۇراقسىزدىقتى قۇرۋ ارقىلى بيلىككە قايتا ورالۋ ارەكەتى. ولار كىم؟ ەڭ الدىمەن، بۇل بۇعان دەيىنگى پرەزيدەنت تۇسىندا بايىپ، حالىق اقشاسىن يەمدەنگەندەر جانە ولار بۇرىنعى ومىرىنە ورالعىسى كەلەتىندەر»، – دەدى دەپۋتات.
ەرلان سايروۆ قازىر قوعامدا مەملەكەت باسشىسى قاسىم-جومارت توقاەۆتىڭ بەدەلىن تۇسىرۋگە ىقپال ەتىپ جۇرگەن ۇيىمداستىرىلعان كامپانيانىڭ بەلگىلەرى بار ەكەنىن ايتتى. ولار الەۋمەتتىك جەلىلەردە ءتۇرلى چەللەندجدەر تاراتىپ ءجۇر.
«مۇنىڭ ءبارى ۇيىمداسقان تۇردە جۇزەگە اسىرىلۋدا. بۇل ەشقانداي دا سىني پىكىر ەمەس. بۇل – قازىر ەلگە قاۋىپ ءتونىپ تۇرعان جاعدايدا مەملەكەتتىڭ ىشىنە ىرىتكى سالۋ. ياعني ساياسي دەستابيليزاتسيا جاساۋ ارەكەتى سانالادى. بۇل زاڭعا قايشى كەلەتىن ارەكەت. مۇنداي اكتسيالار ۇلكەن قاۋىپ توندىرەدى. الايدا ءبىز بار كۇش-جىگەرىمىزدى، بىرلىگىمىزدى كورسەتۋىمىز كەرەك. مەنىڭ ويىمشا، ەلىمىزدە حالىق ءبارىن تۇسىنەدى جانە كونستيتۋتسيالىق تەتىكتەردى اينالىپ ءوتۋ ءۇشىن بيلىكتى ءوز قولىنا الۋعا تىرىساتىن كۇشتەردىڭ ارانداتۋىنا بەرىلمەيدى»، – دەپ اتاپ ءوتتى ماجىلىسمەن.
سۇحباتتىڭ تولىق نۇسقاسىمەن سىلتەمە ارقىلى تانىسا الاسىز.
