قازاقستان پرەزيدەنتى قاسىم-جومارت توقاەۆ كۇيشى، كومپوزيتور ءابدىمومىن جەلدىباەۆتىڭ قازاسىنا بايلانىستى كوڭىل ايتتى، دەپ حابارلايدى “ادىرنا” پورتالى اقوردانىڭ ءباسپاسوز قىزمەتىنە سىلتەپ.
«قاسىم-جومارت توقاەۆ كورنەكتى كۇيشى، كومپوزيتور، «پاراسات»، «قۇرمەت» جانە «دوستىق» وردەندەرىنىڭ يەگەرى ءابدىمومىن جەلدىباەۆتىڭ دۇنيەدەن وتۋىنە بايلانىستى كوڭىل ايتتى»، - دەلىنگەن حابارلامادا.
مەملەكەت باسشىسى اتاپ وتكەندەي، ءابدىمومىن جەلدىباەۆ ەجەلدەن كەلە جاتقان كۇي ونەرىنىڭ جاڭا بەلەستەرىن اشقان ۆيرتۋوز مۋزىكانت جانە دارىندى ۇستاز بولدى.
«ءابدىمومىن جەلدىبايۇلى كيەلى كۇي ونەرىنىڭ كوكجيەگىن كەڭەيتكەن دارىن يەسى، ۇلاعاتتى ۇستاز بولدى. بار سانالى عۇمىرىن ءتول مۇرامىزدى ناسيحاتتاۋعا ارناپ، ەلىمىزدىڭ مادەنيەتى مەن رۋحانياتىن دامىتۋعا ايرىقشا ەڭبەك ءسىڭىردى. «ەركە سىلقىم» سياقتى ومىرشەڭ كۇيلەرىمەن جۇرتشىلىقتىڭ ىقىلاسىنا بولەندى. ونەگەلى ءومىر ءسۇرىپ، سوڭىنا مۋزىكالىق مول مۇرا قالدىرعان ءابدىمومىن جەلدىبايۇلىنىڭ جارقىن بەينەسى حالقىمىزدىڭ جۇرەگىندە ماڭگى ساقتالادى. مارقۇمنىڭ يمانى سالامات، جانى ءجانناتتا بولسىن»، – دەپ جازىلعان جەدەلحاتتا.
