Qazaqstan Prezıdenti Qasym-Jomart Toqaev kúıshi, kompozıtor Ábdimomyn Jeldibaevtyń qazasyna baılanysty kóńil aıtty, dep habarlaıdy “Adyrna” portaly Aqordanyń baspasóz qyzmetine siltep.
«Qasym-Jomart Toqaev kórnekti kúıshi, kompozıtor, «Parasat», «Qurmet» jáne «Dostyq» ordenderiniń ıegeri Ábdimomyn Jeldibaevtyń dúnıeden ótýine baılanysty kóńil aıtty», - delingen habarlamada.
Memleket basshysy atap ótkendeı, Ábdimomyn Jeldibaev ejelden kele jatqan kúı óneriniń jańa belesterin ashqan vırtýoz mýzykant jáne daryndy ustaz boldy.
«Ábdimomyn Jeldibaıuly kıeli kúı óneriniń kókjıegin keńeıtken daryn ıesi, ulaǵatty ustaz boldy. Bar sanaly ǵumyryn tól muramyzdy nasıhattaýǵa arnap, elimizdiń mádenıeti men rýhanııatyn damytýǵa aıryqsha eńbek sińirdi. «Erke sylqym» sııaqty ómirsheń kúılerimen jurtshylyqtyń yqylasyna bólendi. Ónegeli ómir súrip, sońyna mýzykalyq mol mura qaldyrǵan Ábdimomyn Jeldibaıulynyń jarqyn beınesi halqymyzdyń júreginde máńgi saqtalady. Marqumnyń ımany salamat, jany jánnatta bolsyn», – dep jazylǵan jedelhatta.