قاسىم-جومارت توقاەۆ پرەزيدەنت جانىنداعى عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىن وتكىزدى. جيىندا ەلىمىزدىڭ عىلىمي-تەحنيكالىق ساياساتىنىڭ الداعى باسىمدىقتارى ايقىندالدى.
مەملەكەت باسشىسى قاي زاماندا دا دامۋدىڭ باستى كىلتى عىلىم ەكەنىن اتاپ ءوتتى.
قازىرگى تاڭدا زامان وتە جىلدام وزگەرىپ جاتىر. ءبىز وسى وزگەرىسكە بەيىمدەلۋىمىز كەرەك. ايتپەسە وركەنيەت داڭعىلىنان قالىپ قويۋىمىز مۇمكىن. تۇپكى ماقساتىمىز – كوشكە ىلەسەتىن ەمەس، سول كوشتى باستايتىن ەلدەردىڭ قاتارىندا بولۋ. بۇل ماقسات، ارينە، وتە كۇردەلى. دەگەنمەن، عىلىمي جەتىستىكتەرگە جەتۋ قازىرگى كەزدىڭ باستى تالابى بولىپ تۇر.
جالپى، اتالمىش كەڭەس قاسىم-جومارت توقاەۆتىڭ شەشىمى بويىنشا قازاقستاندا عىلىمنىڭ زاماناۋي مودەلىن قالىپتاستىرۋداعى العاشقى قادامداردىڭ ءبىرى رەتىندە قۇرىلدى. ەل باسشىلىعىنداعى وسىنداي جوعارى كونسۋلتاتيۆتىك-كەڭەسشى ورگان ۇزدىك الەمدىك تاجىريبەگە سايكەس كەلەدى، مىسالى مۇنداي ۇيىمدار اقش، فرانتسيا، سينگاپۋر جانە باسقا ەلدەردە بار. نەگىزگى مىندەت — ەلدەگى عىلىمدى دامىتۋدىڭ باسىمدىقتارىن ايقىنداۋ، سونداي-اق مەملەكەت باسشىسىنىڭ عىلىمي قوعامداستىقپەن تىكەلەي بايلانىس ارناسىن قالىپتاستىرۋ. سونىمەن بىرگە، قازىر «عىلىم مەن تەحنولوگيالىق ساياسات تۋرالى» زاڭ جوباسى تالقىلانۋ ۇستىندە.
وسىعان وراي، بۇگىنگى وتكەن كەڭەستە پرەزيدەنت وتاندىق عىلىمدى دامىتۋدىڭ بەس باعىتى بويىنشا ۇكىمەتكە بىرنەشە تاپسىرمالار بەردى.
كەڭەستە تاعى ءبىر ماڭىزدى قادام جيىندا ايتىلعان شەتەلدىك عىلىمي ورتالىقتاردا جۇمىس ىستەپ جۇرگەن عالىمدارىمىزدى ەلگە قايتارۋ تۋرالى ۇسىنىستى قولدايتىنىن ايتتى. مەملەكەت ەلگە ورالىپ، ۇلتقا قىزمەت ماقساتىندا زەرتتەۋ جۇرگىزۋگە دايىن عالىمدارعا بارلىق قاجەتتى قارجىلىق-ۇيىمداستىرۋشىلىق كومەك بەرۋگە دايىن ەكەندىگىن دە جەتكىزدى.
ويتكەنى، ەلىمزدە عىلىم سالاسىنداعى بىلىكتى كادر تاپشىلىعىن شەشۋ، وتاندىق عىلىمنىڭ الەۋەتىن كوتەرۋ وتە ماڭىزدى شەشىم بولىپ تۇر. سوندىقتان، ق.توقاەۆ وزىق ويلى عالىمداردى تارتۋ باعىتىنداعى الەمدىك تاجىريبەنى تەرەڭ زەرتتەپ، كاسىبيلىگى جوعارى شەتەلدىك مامانداردى ەل يگىلىگىنە جۇمىس ىستەتۋدىڭ بارلىق مۇمكىندىكتەرىن قاراستىرۋدى تاپسىردى.
سەبەبى، پرەزيدەنت «عالىمدار وتانىمىزدىڭ عىلىمي-تەحنيكالىق دامۋ كوشىن باستاۋى كەرەك. سەبەبى، عىلىم مىقتى بولسا، مەملەكەتتە قۋاتتى بولادى»-دەدى.
