مەملەكەتتىك كۇزەت قىزمەتىنىڭ اسكەريلەرى اقمولا وبلىسىنىڭ جىبەك جولى اۋىلىنا باردى. ولار قۇتقارۋشىلارعا سۋ تاسقىنى سالدارىن جويۋعا كومەكتەسەدى، دەپ حابارلايدى «ادىرنا» ءتىلشىسى تجم-نىڭ ءباسپاسوز قىزمەتىنە سىلتەمە جاساپ.
«وسى ساتتە اقمولا وبلىسى جىبەك جولى اۋىلىندا مەملەكەتتىك كۇزەت قىزمەتى كۇشتەرىنىڭ توبى اۆاريالىق-قۇتقارۋ جۇمىستارىن جۇرگىزۋدە. مكق قىزمەتكەرلەرى ەلدى مەكەنگە جاقىن جەردەگi ءۇيىندى بوگەتتىڭ جاعالاۋىن نىعايتۋدا جانە سۋ تاسقىنىنان زارداپ شەككەن جەرگىلىكتى تۇرعىندارعا مەديتسينالىق كومەك كورسەتىپ جاتىر»,—دەلىنگەن حابارلامادا.
ايتا كەتەيىك، مەملەكەتتىك كۇزەت قىزمەتى — پرەزيدەنتكە تىكەلەي باعىناتىن جانە ەسەپ بەرەتىن، ەلدىڭ ۇلتتىق قاۋىپسىزدىگىن قامتاماسىز ەتەتىن كۇشتەرگە جاتاتىن جانە پرەزيدەنتتىڭ، باسقا دا كۇزەتىلەتىن ادامداردىڭ جانە وبەكتىلەردىڭ قاۋىپسىزدىگىن قامتاماسىز ەتۋ بويىنشا كۇزەت ءىس-شارالارىن جۇزەگە اسىراتىن ارناۋلى مەملەكەتتىك ورگان.
