بۇعان دەيىن «ايەلدەرىڭە يە بولىڭدار!» دەپ ارىس وقيعاسى كەزىندە اتى داۋعا ىلىككەن شىمكەنت قالاسىنىڭ اكىمى عابيدوللا ابدىراحىموۆ شىمكەنتتەگى قىز الىپ قاشۋعا بايلانىستى قىزداردىڭ ءوزىن كىنالادى. ول بۇل تۋرالى ۇكىمەت وتىرىسىنان كەيىن جۋرناليسترەگە بەرگەن سۇحباتىندا ايتتى.
جۋرناليستەرگە شىمكەنت قالاسىنىڭ 2023 جىلعا دەيىن دامۋ جوسپارىن ايتىپ بەرگەن اكىم ءسوز اراسىندا شىمكەنت قالاسىنا تۋريستەردى تارتۋ ءۇشىن ەڭ قاۋىپسىز قالاعا اينالدىرۋ ماسەلەسىنە توقتالعان. وسى سوزدەن كەيىن شىمكەنتتە قىز الىپ قاشۋ ماسەلەسىنىڭ ءالى دە بار ەكەنىن العا تارتقان تىلشىلەر «قىزدارعا ءسىزدىڭ قالاعا بارۋ قاۋىپتى ەمەس پە؟» دەگەن سۇراق قويدى.
"شىمكەنتتە قىزداردى الىپ قاشپايدى. قازىر وسى تاقىرىپتىڭ اينالاسىندا بولىپ جاتقان جاعدايلارعا قاراساڭ، بۇل شىمكەنت تۋرالى اشەيىن ءبىر داقپىرت قانا. بىراق، كەيدە وسى قىزداردىڭ ءوزى مەنى الىپ قاشىپ كەتسە عوي دەيتىن سياقتى", - دەدى اكىم.
"ادىرنا" ۇلتتىق پورتالى
