ارىس قالاسىندا اتقارىلىپ جاتقان جۇمىستار مەن مالىمەتتەر شىنايى ءارى اشىق بولۋى كەرەك. بۇگىن وبلىس اكىمى اپپاراتىنىڭ كەزەكتى سەلەكتورلىق جيىنىندا ءوڭىر باسشىسى ومىرزاق شوكەەۆ وسىلاي دەدى. قورعا اۋدارىلعان قارجى مەن مەملەكەت تاراپىنان بەرىلەتىن ءاربىر قاراجات تا قوعام نازارىندا بولادى.
«ارينە، قىسقا مەرزىمدە قالانى قالپىنا كەلتىرۋ وڭاي ەمەس. مەملەكەت تاراپىنان قولداۋ كورسەتىلىپ، اۋقىمدى جۇمىستار اتقارىلىپ جاتىر. بىراق ءالى دە ەلدى ارانداتقىسى كەلەتىندەر بار. سولارمەن جەكە جۇمىس جۇرگىزىلسىن. ءاربىر سالاعا جاۋاپتى باسشىلار، اسىرەسە، اسكەريلەر مەن وزگە دە قۇزىرلى ورگاندار اقپاراتتى اشىق ءارى ۋاقتىلى بەرىپ تۇرسىن. سوندا عانا ءىس العا باسادى. كەيبىر جىگىتتەر ءالى قورقىنىشتان ارىلا الماي ءجۇر. ۇرەيدەن ارىلىپ، ىسكە كىرىسكەن ءجون. ارىستا تىركەلگەن ءاربىر ادامعا 100 مىڭ تەڭگە بەرىلەدى، ۇيلەرى جوندەلەدى. ەشكىم قولداۋسىز قالمايدى»، – دەگەن ءوڭىر باسشىسى بارلىق جاۋاپتى باسشىلار مەن ماماندارعا جۇمىستى كۇشەيتىپ، ساپالى ءارى ۋاقتىلى اياقتاۋدى تاپسىردى.
قر قورعانىس مينيسترلىگى باس شتابىنىڭ ءبىرىنشى ورىنباسارى ر.شپەكباەۆتىڭ ايتۋىنشا، اسكەري مامانداردان قۇرالعان 42 توپ ارىستىڭ ماڭىنداعى 10 شاقىرىم اۋماقتى تۇگەل تەكسەرىپ، وق-دارىلەردەن تازارتىپ شىققان.
«ساپەرلار ارىس قالاسىمەن بىرگە اقدالا، دەرمەنە اۋىلدارىن تەكسەرىپ شىقتى. ماماندارىمىز بارلىق اۋماقتى باقىلاپ وتىر قازىرگى تاڭدا اسكەري قويمادان وق-دارىلەر كوشىرىلىپ جاتىر. قالادان 60 شاقىرىمداي اۋماقتاعى ارنايى پوليگوندا وق-ءدارىنى جويۋ جۇمىستارى جۇرەدى. سوندىقتان كەيدە ساعات 9 بەن 18.00 ارالىعىندا ءبىردى-ەكىلى جارىلىس داۋىسى ەستىلۋى مۇمكىن. بىراق تۇرعىندارعا جاعداي تولىق باقىلاۋدا ءارى قاۋىپسىز ەكەنىن ايتقىم كەلەدى. الاڭداۋعا نەگىز جوق»، – دەدى ول.
ال تۇركىستان وبلىسىنىڭ پوليتسيا دەپارتامەنتىنىڭ باستىعى قايرات دالبەكوۆ ەلدى ارانداتۋ، جالعان اقپارات تاراتۋ، زاڭسىز شەرۋگە شىعۋ دەرەكتەرى بويىنشا 10 ادام ۇستالىپ، ءتۇسىندىرۋ جانە تەرگەۋ جۇمىستارى جۇرگىزىلگەنىن مالىمدەدى. 4 قىلمىستىق ءىس قوزعالعان.
وبلىس اكىمىنىڭ كەڭەسشىسى ۇلاسبەك سادىبەكوۆ بارلىق سەكتورلار مەن شتابتاردا تۇرعىنداردىڭ تالاپ-تىلەگى تىڭدالىپ جاتقانىن جەتكىزدى. گۋمانيتارلىق كومەك ۋاقتىلى تاراتىلىپ، ۇيلەرى جارامسىز كۇيگە تۇسكەن وتىزعا جۋىق وتباسىمەن كەزدەسۋ وتكەنىن، قولداۋ كورسەتىلگەنىن ايتتى.
وبلىس اكىمى ومىرزاق شوكەەۆ تۇرعىندارمەن ءتيىستى جۇمىس جۇرگىزىپ، ولاردىڭ ماسەلەلەرىن تىڭداۋ، شەشۋ جونىندە تاپسىرما بەردى. سونداي-اق ارىس قالاسىنىڭ زيالى قاۋىمى مەن بەلسەندى ازاماتتارىن، جەرگىلىكتى اتقارۋشى ورگان مەن دەپۋتاتتارىن، اقساقالدارىن دا بەلسەندى بولۋعا شاقىردى.
"ادىرنا" ۇلتتىق پورتالى
