پرەزيدەنت قازاقستاندىقتاردى ورازا ايت مەيرامىمەن قۇتتىقتادى، دەپ حابارلايدى "ادىرنا" ءتىلشىسى اقورداعا سىلتەپ.
"بۇل – مۇسىلمان قاۋىمىنىڭ ەرەكشە ىقىلاسپەن قارسى الاتىن ۇلىق مەرەكەسى.
قاسيەتتى رامازان ايىندا جۇرت ادامگەرشىلىك قۇندىلىقتارعا باسا ءمان بەرەدى، رۋحاني تازارۋعا ۇمتىلادى. مۇقتاج جاندارعا قول ۇشىن سوزىپ، اينالاسىنا قايىرىمدىلىق كورسەتەدى. وتىز كۇن ورازاداعى سابىر مەن قاناعاتقا نەگىزدەلگەن يگى امالدىڭ ءبارى ايت مەرەكەسىنىڭ شىنايى بولمىسىن ايشىقتاي تۇسەدى.
اتا ءدىنىمىز ادامزاتتى تاتۋلىق پەن تىنىشتىققا، قامقورلىق پەن مەيىرىمدىلىككە، جاناشىرلىق پەن جاسامپازدىققا ۇندەيدى. ادال ەڭبەك ەتىپ، ادال تابىس تابۋعا شاقىرادى. مۇنىڭ بارلىعى، تۇپتەپ كەلگەندە، بۇكىل ەلىمىزدىڭ ىرىستى ىنتىماعىن ارتتىرۋعا ىقپال ەتەدى", - دەدى پرەزيدەنت.
سونداي-اق مەملەكەت باسشىسى:
"حالقىمىزدىڭ سالت-ءداستۇرى يسلام ءدىنىنىڭ، رامازان ايىنىڭ جانە ايت مەيرامىنىڭ ۇلاعاتىمەن ۇشتاسىپ جاتىر. بۇل ساباقتاستىق بەرەكەلى بىرلىگىمىزدى نىعايتىپ، ادىلەتتى قوعام قۇرۋ جولىندا ماڭىزدى ءرول اتقارادى. ەلىمىز امان، جۇرتىمىز تىنىش بولسىن! ءار شاڭىراققا باق-بەرەكە جانە تولاعاي تابىس تىلەيمىن! ايت قابىل بولسىن، اعايىن!" - دەدى ءوز قۇتتىقتاۋىندا قاسىم-جومارت توقاەۆ.
پرەزيدەنت ءوز قۇتتىقتاۋىندا ەلدەگى سۋ تاسقىنى جايىندا ءسوز قوزعاعان جوق.
