مەملەكەت باسشىسى ءماجىلىس توراعاسى ەرلان قوشانوۆتى قابىلدادى. پرەزيدەنتكە پارلامەنت ءماجىلىسىنىڭ قازىرگى زاڭ شىعارۋ قىزمەتى تۋرالى اقپارات بەرىلدى. بۇل تۋرالى اقوردانىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
ءماجىلىس دەپۋتاتتارى «ادام قۇقىقتارى جونىندەگى ۋاكىل تۋرالى»، «كونستيتۋتسيالىق سوت تۋرالى»، «پروكۋراتۋرا تۋرالى» زاڭ جوبالارىن، سونداي-اق بىرقاتار كونستيتۋتسيالىق جانە باسقا دا زاڭدارعا ەنگىزىلەتىن وزگەرىستەردى قاراستىرىپ، سەناتقا جولدادى. اتالعان قۇجاتتاردى تالقىلاۋعا ساراپشىلار توبى قاتىستى جانە قوعام مەن باق ءۇشىن جاريا تۇردە ءوتتى.
پالاتا ماقۇلداعان زاڭ جوبالارى بيىلعى 5 ماۋسىمدا وتكەن رەفەرەندۋمدا حالىق داۋىس بەرگەن كونستيتۋتسيالىق رەفورمالاردىڭ نەگىزگى ەرەجەلەرىن جۇزەگە اسىرۋعا باعىتتالعان. ەنگىزىلەتىن زاڭ نورمالارى ازاماتتاردىڭ كونستيتۋتسيالىق قۇقىقتارىنىڭ قورعالۋىن كۇشەيتۋگە جانە تۇرعىنداردىڭ ەلىمىزدىڭ ساياسي ومىرىنە ارالاسۋ مۇمكىندىگىن كەڭەيتۋگە سەپتىگىن تيگىزەدى.
ەرلان قوشانوۆ قاسىم-جومارت توقاەۆقا پارلامەنتتىك ديپلوماتيا جانە شەت مەملەكەتتەردىڭ زاڭ شىعارۋشى ورگاندارىمەن اراداعى ءىس-ارەكەتتەر اياسىنداعى جۇمىستاردىڭ نەگىزگى باسىمدىقتارى تۋرالى ايتتى.
ءماجىلىس توراعاسى توقاەۆقا تۇركيانىڭ يزنيك قالاسىندا وتكەن IV دۇنيەجۇزىلىك كوشپەندىلەر ويىندارىنىڭ سالتاناتتى اشىلۋ راسىمىنە ەلىمىزدىڭ دەلەگاتسياسىنىڭ قاتىسقانى جونىندە باياندادى. تۇركى قوعامداستىعى V دۇنيەجۇزىلىك كوشپەندىلەر ويىندارىن 2024 جىلى قازاقستاندا وتكىزۋ جونىندەگى ۇسىنىستى ءبىراۋىزدان قولدادى.
”ادىرنا” ۇلتتىق پورتالى
