نازەركە سەرىكقىزى: تەك سەن عانا سەزىپ قويۋشى ەدىڭ عوي، قولدارىمنىڭ توڭعانىن...

1068

نازەركە سەرىكقىزى - 1997 جىلدىڭ 15 ءشى ناۋرىزىندا سەمەي وڭىرىندە دۇنيەگە كەلگەن. جاس اقىن قالالىق، رەسپۋبليكالىق جىر ءمۇشايرالارىنىڭ جۇلدەگەرى. ولەڭدەرى اۋداندىق، قالالىق باسىلىمداردا جارىق كورگەن. وقىرمان نازارىنا اقىننىڭ جۋىق ارادا جازعان تۋىندىلارىن ۇسىنامىز.

 

***
قادىرلىم،
اشىپ ايتسام، قادىرىڭە جەتەم بە؟
سەن نەگىزى پاتەر جالداپ تۇرىپ ءجۇرسىڭ بەكەرگە.
تۋرا قازىر قولىڭا اكەپ كىلتىن ءوزىم تاپسىرايىن قالاساڭ،
مىنا مەنىڭ جۇرەگىمدى مەكەندە...

قادىرلىم،
ويىڭ كوركەم، ءار ءسوزىمدى ايتقىزباي-اق ۇعاتىن،
كەيدە ويلايمىن،
ءدال سەن وسى دۇنيەگە مەنى ايالاۋ ءۇشىن كەلگەن شىعارسىڭ؟!
بىراق مەنىڭ جۇرەگىمدى مەكەندەۋىڭ ءۇشىن سەنىڭ قولىڭدا
بولۋ كەرەك،
ماڭگىلىككە بۇل جۇرەككە تىركەلەمىن دەگەن ۇلكەن ادەمى
ءمور باسىلعان قۇجاتىڭ!

قادىرلىم،
كەيدە سەنى بولىسە الماي ارپالىساد(ى) وي-سانام،
ءوزىڭ دە ونى شىعارسىڭ-اۋ بايقاعان...
جۇرەگىمنىڭ ءىشىن ءوزىڭ رەتتەپ جوندەپ الارسىڭ،
كورىكتى ەتىپ قايتادان...

قادىرلىم،
اي امان دا، كۇن دە وسىلاي ەسەن دە،
قامدانا بەر جۇگىڭدى الىپ كوشەرگە.
ءبىر جۇرەكتى بىرگە پانا قىلايىق،
مەنىڭ عانا جۇرەگىمدە مەكەندە...

 

***

اۋا كوردىڭ بە، مەن ەندى كۇلمەيمىن،

سويلەدىڭ دەسەڭشى نەگە وكتەم؟!

«قوش» دەۋگە كەلدىم بە، بىلمەيمىن،

كىدىردىم، كەنەتتەن...

 

مەن كىممىن، سەن كىمسىڭ بۇگىندە،

ءوزىڭ ەڭ ولمەيتىن ولەڭىم.

كەزدەسكەن اداممەن تۇبىندە

بىلگەنمىن قوشتاسۋ كەرەگىن.

 

كوبەيتكىم كەلمەيدى كۇدىكتى،

بايلاعىم كەلمەيدى جولىڭدى.

مەن ۇزە المادىم ءۇمىتتى..

ۇزسەم دە قولىڭنان قولىمدى.

 

قوشتاسۋ كەرەگىن سەزسەم دە،

قوشتاسقىم كەلمەسە نە ىستەرمىن؟

قاي جاقتا سەن عۇمىر كەشسەڭ دە

باعىڭ دا، سورىڭ دا، تەك مەنمىن.

 

كەلەر جىل، تاعى كۇز كەلەدى،

ساعىنساڭ ارتىڭا قارارسىڭ.

مەن سەنى قيمايمىن، سەبەبى،

سەن مەنىڭ ءسات سايىن جۇتاتىن..

اۋاما اينالىپ باراسىڭ...

 

تۇنگى تىلدەسۋ

جازعى ءتۇننىڭ جاڭبىرىنان جاسىرىپ،

كۇزگى كۇننىڭ كۇركىرىنەن قورعادىڭ.

كەزدەسۋگە كەلگەنىمشە اسىعىپ،

ۇمىتتىردىڭ ارامىزدا جول بارىن.

 

بىلگەندەيمىن سونىڭ ءبارى راس، ءۇمىت

سوندىقتان دا بالكىم "سەن" دەپ سولمادىم.

سەن جوق جەردە تولا المادىم تاسىنىپ،

سەن جوق جەردە جارىق بولىپ ورنادىم.

بىراق سونىڭ بارلىعىنان باز كەشىپ

تەك سەن عانا سەزىپ قويۋشى ەدىڭ عوي

قولدارىمنىڭ توڭعانىن...

 

قۇراق ۇشىپ ماعان قاراي بوگەلمەستەن بەتتەدىڭ،

جانارىڭدا ءجۇزى قالماي جاسىرىنعان ينەنىڭ.

جالىنىڭمەن شارپىلادى كەۋدەڭدەگى ءورت دەمىڭ،

مۇمكىن ەمەس مەنىڭ سوندا كۇيمەۋىم.

 

بار الەمدى ءبىر-اق ساتتە ۇمىتتىرىپ جىبەرەتىن

تەك سەنىڭ ماڭدايىمنان سۇيگەنىڭ...

ءوز ەركىڭدى شەتكە ىسىرىپ قويدىڭ دا،

كوزدەرىڭدى الا الماستان كوزىمنەن.

جوق الدە سەن، قارسىلىقتى جويدىڭ با؟

اقىلىمدى الماستىرىپ وزىڭمەن.

 

سەن بار كەزدە كۇش-قۋات جوق بويىمدا،

تىم شاراسىز، تىم بەيكۇنا ەدىم مەن.

ءدال سول ساتتە الدىمداعى بۋى بۇققان ءشايدىڭ دا

سەنەن ىستىق ەمەستىگىن سەزىنگەم.

 

ودان ءارى ءسال اياڭداپ كەتكەنبىز،

ويلاماستان ۇيگە ەرتەرەك جەتۋدى.

سول كۇزگى ءتۇن ەسىڭدە مە ەكەۋمىز،

جاياۋ ءجۇرىپ ءوتىپ ەدىك كوپىردى.

سەنىڭ سىرلى سەزىمىڭمەن كەتكەن كۇز،

مەنىڭ مامىق ماxابباتىم سەكىلدى.

سەن سۇيگەندەي، تومەن قاراپ وتكەن قىز،

جەل سۇيگەندە بەتىمدى...

 

ءسات

جاقىننان كورىپ، ءوزىمدى بىراق تۇساتتاپ،

سەن بۇرىلمايسىڭ، سەن تۇنىق ايسىڭ ءتۇسى اپپاق.

قاسىمدا مەنىڭ ءسال كىدىرە تۇرشى،

جاس تولى كوزىڭنەن، قالايىن قۇشاقتاپ...

 

شاشتارىڭ تولقىن، جانارىڭ تۇنىق ءتۇن بەينە ،

سەن بۇيىرمايسىڭ، سەن قۇيىندايسىڭ تىم كەيدە.

كەۋدەمدى مەنىڭ جالىنىڭ جاتىر كۇيدىرىپ

ەرىنىڭ سوندا قالاي ءسۇيۋدى بىلمەي مە؟

 

جاقىنداپ بارىپ، تورىنە ءورتتىڭ ەنەيىك،

وت بولىپ جانىپ، شوق بولىپ بىرگە سونەيىك.

كوككە ۇشىپ سوسىن اينالىپ كۇلگە ءبىر دەمدە،

جوق بولىپ كەتىپ كورەيىك...

(كەلىسەيىك پە، نە دەيىك؟)

 

***

ماما،

تاعدىرىما تاپ بەرگەندە وكپە-مۇڭ،

قالامادىم قادىرىمنىڭ كەتكەنىن.

جۇرەگىمە جانە قاتتى باتادى،

كەي كەزدە وكپەلەتكەنىم...

 

ماما، ساعىم سىنىپ، قايرىلعاندا قاناتىم،

جالعىز پانام سەنسىڭ ىزدەپ باراتىن.

تەك مەن عانا كىنالىمىن ءتۇن سايىن،

ءار جاسىڭا جاستىعىڭا تاماتىن.

 

ماما، كوڭىلسىزدەۋ كۇي توككەندە كوڭىلىم،

سەنەن باسقا جۇباتادى مەنى كىم؟

اللا الدىندا اعى ءۇشىن دە ءار شاشىڭنىڭ،

كەرەك جاۋاپ بەرۋىم...

 

ماما، سەن ولەڭسىڭ، ولەڭىمسىڭ ءوزىمنىڭ،

كۋاسى بول، تەك باقىتتى كەزىمنىڭ.

بۇل عالامدا سەن داراسىڭ، مەن بىلەم

سەن نۇرىسىڭ كوزىمنىڭ...

 

ماما، ءومىرىمدى وزگەرتۋگە بولار شىن،

ۋايىم قىلىپ جىلاي بەرمە وعان تىم.

بىراق ماما، ۋادە بەرەم كۇنى ەرتەڭ

مەندەي قىزىڭ بولعانى ءۇشىن ومىردە

ەل الدىندا ءور باسىڭدى كوتەرىپ

تىك جۇرەتىن بولاسىڭ!

سەنشى، ماما..

 

سوڭعى ءسوز

بولساق تا جەردەن بيىك، تومەن جۇرتتان،

كوزدەرىڭ مەنى دە ۇقتى، ولەڭدى ۇققان.

ماعان ءۇنسىز جىميۋ، بىلەسىڭ بە،

سەنەن جۇققان...

 

ءدال سولاي، جازباي كەتتىم كوپتەن ولەڭ،

ال جازسام شالىنارداي ورتكە دەنەم.

مەن سەنەن كۇتىپ ءجۇردىم تەككە حابار،

سەن بەلگى كۇتىپ ءجۇردىڭ تەككە مەنەن.

 

تالعامادىق تاماقتى تاڭداپ ءجۇرىپ،

جاسامادىق، جاعىمسىپ جالعان قىلىق.

اسپان مەن جەر، اي مەن كۇن تەڭەسكەندەي،

ساي قوسىلعان اڭقاۋ قىز، اڭعال جىگىت.

 

شىنىمەن باقىتسىزدىق ورنادى ما؟

وتكەننىڭ ءبارى وتىرىك بولعانى ما؟

سەن دە وتىرىك كۇلدىڭ بە ءتۇن ۇستىنەن

جۇلدىز قۇلاپ تۇسكەندە قولدارىما.

 

تاۋسىلىپ بارا جاتىر دەمىم ىشتەن،

جۇرەگىم تاعى ورالدى جەڭىلىسپەن.

ۇمىتتىرا المايسىڭ سەن دە مەنى،

ۇمىتتىرا المايمىن مەن دە كۇشپەن.

 

وكىنسەڭ عانا ءومىردى ۇعا الارسىڭ،

«كوك تيىنسىز ەدىم» -, دەپ قۇلاعانسىڭ.

شىنىنا كەلسەك ەگەر، سەن ماعان سول،

كوك تيىنسىز قالپىڭمەن ۇناعانسىڭ.

 

"ادىرنا" ۇلتتىق پورتالى

 

پىكىرلەر