Su tasqyny saldarynan elımızde 64 myŋǧa juyq tūrǧyn öz üilerın tastap, evakuasiialandy, dep habarlaidy "Adyrna" tılşısı.
Atyrau oblystyq TJD 1 säuırden berı tasqyn su qaupınen 26 467 adam evakuasiialanǧanyn, onyŋ ışınde 5 976 bala bar ekenın habarlaǧan.
Sondai-aq, Qūlsary qalasynda 2 810 tūrǧyn üi jäne infraqūrylymdardy su basyp, 12 myŋnan astam adam evakuasiialandy.
Qūlsary qalasyna kömekke Maŋǧystau, Almaty, Aqtöbe oblystary tötenşe jaǧdailar departamentterınen arnaiy kömekter de kelgen. Su tasqyny apatynan soŋ Aqtöbe, Qostanai, Pavlodar, Aqmola, Atyrau jäne Soltüstık Qazaqstan oblystarynda 3391 jeke tūrǧyn üi, 1059 saiajai jäne 79 türlı maqsattaǧy ǧimarat su astynda qalǧan.«Qazır Jylyoi audanynyŋ ortalyǧy – Qūlsary qalasynda tasyqan sudan qorǧaityn bögettı nyǧaitu jūmysy jalǧasyp jatyr. Oǧan jergılıktı atqaruşy organnan 1 135-ge juyq, tötenşe jaǧdailar, polisiia departamentterınıŋ, äskeri bölım qyzmetkerlerı, 4640 erıktıler men tūrǧyndar jūmylǧan. Būl jūmysqa 204 tehnika, 6 jüzu qūraly, 4 motopompa tartylǧan. Tasqyn suǧa qarsy qūm toltyrylǧan 46 352 qap, 174 372 tonna inerttı material töseldı», - dep habarlady TJD qoǧammen bailanys toby.
«Qazırgı uaqytta 63 927 adam qūtqaryldy jäne evakuasiialandy, onyŋ 45-ı mümkındıgı şekteulı adamdar, 15 283-ı balalar. Uaqytşa ornalastyru ortalyqtarynda 13 328 adam bar, onyŋ 6 742-sı balalar. Psihologtar jūmys ısteude. Barlyq qajettı kömek körsetılude. », - dedı QR Tötenşe jaǧdailar ministrlıgınıŋ Tötenşe jaǧdailardy joiu departamentınıŋ basşysy Qaharman Orazalin brifing barysynda.
Ūqsas jaŋalyqtar
