قۋاندىق بيشىمباەۆتىڭ ءىسى بويىنشا مەملەكەتتىك ايىپتاۋشى مىندەتىن اتقارۋشى پروكۋرور ايجان ايماعانوۆا Instagram جەلىسىندە ءوز پاراقشاسىن اشىپ، وقىرماندارىنا مالىمدەمە جاسادى، دەپ حابارلايدى "ادىرنا" ۇلتتىق پورتالى.
بۇعان دەيىن الەۋمەتتىك جەلىلەردە قۋاندىق بيشىمباەۆتىڭ ءىسى بويىنشا ايىپتاۋشى، پروكۋرور ايجان ايماعانوۆانىڭ اتىنان قۇرىلعان بىرنەشە فەيك پاراقشالار پايدا بولعان. سودان كەيىن باس پروكۋراتۋرا بۇل پاراقشالاردىڭ بارلىعىنىڭ ايماعانوۆاعا ەش قاتىسى جوق ەكەنىن حابارلادى.
جەلىدە تۋىنداعان جانكۇيەرلىكتەن كەيىن پروكۋرور ايماعانوۆا Instagram جەلىسىندەگى ءوزىنىڭ جەكە پاراقشاسىن اشىپ، پايدالى بولۋعا تىرىساتىنىن ايتتى:
«مەن، ايجان ايماعانوۆا، استانا قالاسى پروكۋرورىنىڭ اعا كومەكشىسىمىن. قازىرگى ۋاقىتتا قوعامدىق رەزونانس تۋدىرعان قىلمىستىق ءىس بويىنشا مەملەكەتتىك ايىپتاۋشى قىزمەتىندەمىن. الەۋمەتتىك جەلىلەردە بەلگىسىز فەيك اككاۋنتتار اشىلىپ جاتقاندىقتان مەن ءوز اتىمنان Instagram-دا جەكە اككاۋنتىمدى اشۋدى شەشتىم. بۇعان دەيىن مەندە ەشقانداي جاريالانىم بولعان جوق، بىراق مەن مۇمكىندىگىنشە اشىق جانە پايدالى بولۋعا تىرىسامىن»، - دەدى ايماعانوۆا.
قازاقستان رەسپۋبليكاسىنىڭ باس پروكۋراتۋراسى "zhakiti" لوگينىندەگى پاراقشانىڭ شىنىمەن دە پروكۋرور ايماعانوۆانىڭ جەكە پاراقشاسى ەكەنىن راستادى.
ايتا كەتەيىك، ايماعانوۆا سالتانات نۇكەنوۆانىڭ ولىمىنە قاتىستى سويلەگەن سوزدەرىمەن، ايىپتاۋ فاكتىلەرىمەن قازاقستاندىقتاردى تاڭعالدىرعان بولاتىن. جۇرتشىلىق سوت وتىرىستارىنىڭ ترانسلياتسياسىنان ۇزىندىلەر الىپ، الەۋمەتتىك جەلىلەردە پروكۋروردىڭ قايسارلىعىنا ءتانتى ەكەندەرىن اشىق قولداي باستادى.
پوسموترەت ەتۋ پۋبليكاتسيۋ ۆ Instagram
