باتىس قازاقستان وبلىسىندا سۋ تاسقىنىنا بايلانىستى مەكتەپ وقۋشىلارىنىڭ ءبىلىم الۋى ءبىراز تۇرعىندى الاڭداتتى. الايدا، وقۋ پروتسەسسى توقتامادى، كەي مەكتەپتەردە قاشىقتان وقىتۋ ءادىسى بويىنشا جۇيەلى جۇمىستار اتقارىلسا، كەيبىرىندە بالالار ءداستۇرلى وقىتۋ بويىنشا ءبىلىم الىپ جاتىر. ءبىلىم ساپاسى تومەندەمەيدى.
قازىرگى تاڭدا وڭىردە سۋ تاسقىنىنان زارداپ شەككەن اۋىلدارداعى 13 مەكتەپتە 4 132 وقۋشى قاشىقتان ءبىلىم الۋدا. سونىڭ ىشىندە ءبورلى اۋدانىندا 2 مەكتەپ جانە تەرەكتى اۋدانىندا 8 مەكتەپ اتالعان قاشىقتان وقىتۋ فورماتىندا جۇمىس ىستەپ جاتىر.
قاراتوبە اۋدانىنداعى 104 وقۋشىعا ساباق اۋدان ورتالىعىنداعى ءداستۇرلى وقىتۋ فورماتىندا ءجۇرىپ جاتىر. سونىمەن قاتار ءبورلى اۋدانىنداعى اقسۋ اۋىلىنان 66 بالا اقساي قالاسىنداعى №5 مەكتەپ جانىنداعى ينتەرناتىندا جاتىپ ءبىلىم الۋدا. بيىل ءساۋىر ايىنىڭ 1-ىنەن باستاپ وبلىستىق دارىندى بالالارعا ارنالعان مامانداندىرىلعان مەكتەپ-ليتسەي-ينتەرناتىنىڭ وقۋشىلارىنا كۇندەلىكتى ساباق وبلىستىق مەكتەپ-ليتسەي-ينتەرناتىندا جۇرگىزىلۋدە.
سونداي-اق وبلىستىق ەستۋ قابىلەتى بۇزىلعان بالالارعا ارنالعان مەكتەپ-ينتەرناتىندا 53 وقۋشى جاتىپ، ال 187 وقۋشى ۇيدەن قاتىناپ وقىپ ءجۇر.
رەتتى جەرىندە ايتايىق، ەۆاكۋاتسيالانعان بالالارعا مەكتەپتەردەگى پەداگوگ-پسيحولوگتار پسيحولوگيالىق قولداۋ كورسەتۋدە جانە قوسىمشا ءبىلىم بەرۋ ورتالىقتار ارقىلى ءارتۇرلى باعىتتا ۇيىرمەلەر ۇيىمداستىرىلۋدا. وبلىستاعى توتەنشە جاعداي جاريالانعان اۋدان مەكتەپتەرىندە ءساۋىردىڭ 8-ىنەن باستاپ ءداستۇرلى وقىتۋ فورماتىنا كوشىرۋ جوسپارلانىپ وتىر.
امانجول يسلامعالي
