Búgin, 4 sáýir Saltanat Núkenovany óltirdi dep aıyptalyp jatqan eks-mınıstr Qýandyq Bıshimbaevtyń kezekti sot otyrysy ótýde. Sot barysynda Bıshimbaev pen áıeli Núkenova ekeýiniń jeke hattary oqyldy, dep habarlaıdy “Adyrna” ulttyq portaly.
Sot barysynda oqylǵan ekeýiniń arasyndaǵy hat-habardan Bıshimbaev áıeline túnniń ýaqytynda qaıta-qaıta habarlasyp, tynyshtyq bermeıtini baıqalady.
Memlekettik aıyptaýshy marqum Saltanat Núkenovanyń telefonynan Bıshimbaev ekeýiniń Whatsapp jelisindegi hattaryn oqydy. Marqum Bıshimbaevty “My love” (Meniń mahabbatym) dep saqtaǵan eken. Bıshimbaev bul óz nómiri ekenin rastady.
Sondaı-aq, Bıshimbaev Saltanatqa tún ishinde birneshe márte habarlasqan.
“2:32, 2:38, 3:14, 3:19, 3:20, 3:32, 3:37, 3:39-da Bıshimbaevtyń qabyldanbaǵan qońyraýlary tur. Jaýap bermegen sátte “Salta, tutqany kóter” dep jazǵan, birneshe aýdıohabarlama jibergen”, – dedi prokýror.
Memlekettik aıyptaýshy Saltanattyń telefonyndaǵy jeke jazbalaryn (zametkı) da oqydy.
"Qýandyq, men Pavlodarǵa ketip baram. Endi kelmeımin. Bul kúnderi men aramyzda esh sezim joqtyǵyna kózim jetti. Eshteńeni saqtap qalǵym kelmeıdi. Sen tipti kózime shóp salǵanyń úshin tipti keshirim suraǵan da joqsyń. Onyń úshin eshteńe istegiń de kelmedi. Bárine meni kinálap, “psıhoterapevtke bar” dep qoımadyń. Soqyrlyǵyń sonsha, onyńdy kótere alar emespin. Keshir meni, umyt, bosat. Bárin sheshtim. Ata-anammen bolam, olar maǵan qaraıdy", – dep jazǵan Saltanat.
Qýandyq Bıshimbaev “kózine shóp salý” týraly jazbaǵa qatysty pikir bildirdi.
"Men psıhoterapevt týraly onyń konsýltaııadan ótýi kerek ekenin, onyń jaǵdaıy turaqsyz ekenin aıta berdim. Satqyndyqqa qatysty: Men jaı ǵana keshigip, saǵat 21:30-da kelgenime jáne onyń beıne qońyraýlaryna jaýap bermegenime baılanysty ol qonaqúıge barǵanda aıttym. "Saltanat, men odan sharshadym, basqa nárse oılap taba alasyń ba?" dedim. Ol qonaqúıge bardy. Men ony kútken joqpyn. Eger adam únemi ketip qalsa, ol maǵan mán bermeıtin shyǵar. Men de: "Men úıde otyrmaımyn, kútpeımin" dedim. Sosyn hat jazysyp qaldyq: áıelderdi úıge nege ákelesiń", – dedi.
Eske salaıyq, burynǵy ulttyq ekonomıka mınıstri Qýandyq Bıshimbaev áıeli Saltanat Núkenovany óltirdi degen kúdikpen ustalǵan. Keıinnen qylmysty jasyrdy degen aıyppen Saltanat Núkenova kóz jumǵan meıramhananyń dırektory da tutqyndaldy.
