Birneshe óńirdi sý alyp, el basyna kún týǵanda aqyndar únsiz qalmady. Olar ishtegi muń men halyqtyń qazirgi kúıin óleń arqyly jetkizýde.
Aqyn Qaıyrbek Shaǵyr Facebook paraqshasyna ne úshin kún oqıǵasyn óleńge túsirgenin bylaı túsindiripti.
"Lırıkaǵa saıasatty aralastyrmaıyn deısiń, biraq aınalada bolyp jatqan oqıǵalar kóńilińdi alańdatqan soń, óleńge túsirmeske laj joq", - dep óleń arnady.
Qalǵanda sý astynda momyn jandar,
Aqshanyń tasqynyna shomylǵandar,
El basyna kún týǵan myna kúnde,
Etikpen sý keshýge qorynbańdar.
Ýaıymdap kedeı júr ǵoı kredıtin,
Ósimqor mıyǵynan kúledi ıtiń.
Halyqty kúnkóriske baılap qoısa,
Qul qylý ońaılyǵyn biledi ıtiń.
Aqyn Ershat Qaıboldın de sý basqan aýyldardyń jáı-kúıin jyrlaǵan:
Kóktem saıyn aýyldy sý basady,
Kóktem saıyn aǵaıyn shýlasady.
Sýdan qurǵaq shyǵatyn sýaıt kókem
Saly sýǵa ketkendeı túr jasady.
“Belgili ǵoı tasqynnyń júretini,
Sabyr, sabyr” kókemniń biletini.
Balshyq basyp kórmegen sýdaı jańa,
Shirkin, qandaı ádemi sý etigi?!
Halyqtyń kóktemgi kóńil-kúıin sel buzǵan.
Sátjan Káripbaev bılik ókilderiniń raportyna meńzep "Turaqtaldy" dep jyrlatyp, baspanasyz qalǵandardyń jaıyn aıtty.
Qazaq san ótkerse de synaqtardy,
Bul qoǵam...
Qashan da bir-aq qalpy...
Topan sý jaılap jatqan jerdi kórsem...
Kókeıimde onsyz da san suraq qaldy.
Bas qaıǵy baspanasy... Bala jylap,
Zar ılep,el bılikke syr aqtardy.
Syr aqtardy...
Bılikten bir-aq jaýap...
"Ol aýdanda jaǵdaı sol turaqtaldy".
Aqyn Dáýren Berikqajyuly Facebook jelisindegi paraqshasynda:
Óz-ózinen sheshiletin sııaqty
Bul qazaqtyń taǵdyry -
Tym alańsyz qar jaýady uıatty,
Tym mezgilsiz sirkireıdi jańbyry.
Baǵym ushyp baratqandaı bastaǵy
Terlep shyqsam óz-ózimdi suraqqa ap.
Tym kóńildi kórinedi aspany,
Aqpany da tym beıkúná, tym áppaq.
Kúnnen-kúnge túsinýden qaldym men
Bul ulysty, rasynda.
Shyǵar dep em aqyl-esim sál kirgen
Dál osynaý jasymda.
Qazaq dese janyn syǵyp beretin
Tym súıkimdi mazdaıdy ot oshaqta.
Sonda meniń áldeqandaı kóretin
Memleketim osy-aq pa? - dep óleńdetti.
Tasqyn máselesine beı-jaı qaraı almaǵan aqynnyń biri - Arman Jýsanbaev. Ol sel basyp, bógetter buzylyp jatqandaǵy bıliktiń búgingi áreketin synǵa aldy.
Kózin jasyn sorly elim kól etkende,
Sel basty da buzyldy bóget demde...
Jemqorlyqpen betpe-bet kelip tursyń,
Qııamet kún qyınalyp sol ótkelde!.
Toımadyń ba sýdyr sóz ýádege,
Qurǵaq qııal –jel qaıyq qýa berme!.
Jumaq jasaý ózińniń qolyńda tur,
Tozaq jasaý tipti ońaı myna jerde!
Jaǵympazdar jalbaqaı qyrtqa aınalar,
Qaıda qamsyz alańsyz jurtqa jáı bar?
Salyń sýǵa ketkende topalańmen,
Qutqarmaıdy seni kep Nuq paıǵambar!
Aqyn Sanjar Kelekeev te "Áı, Úkimet!" dep syndarly shaqtaǵy bıliktiń áreketin synǵa aldy.
Jazamyn jabyǵyp jyr, toryǵyp án,
Kim bar eı... kim bar deısiń sony uǵynǵan?
Bas-basyna bı bolǵan kókelerdiń,
Kelmeıdi eken topan sý tobyǵynan.
Qardyń sýy.
Qarǵyn sý dalany alyp,
Panalaǵan baıǵus jurt jaǵa baryp.
Mańdaıynan bes eli sor ketpegen,
Sol baıaǵy, baıaǵy qara halyq.
Isi basqa..
Sózderi kil jasandy,
Qý bılikke qaraıdy kún qashanǵy?
Ýádesiniń túkke de tamtyǵy joq,
Qur minbede otyryp shýlasady.
Bógeti joq..
Qatyrǵan bógeni joq,
Kóktem kelse jerimdi sý basady.
Túkke turmas sóz qylyp nasybaıdy,
Túkirigi aýyzynan shashyraıdy.
Kótenderin maı basqan kókelerim,
Kresloǵa qul bolǵan basybaıly.
Óz jyrtyǵyn jamaǵan óz eline,
Eshbiriniń jandary ashymaıdy.
Seni qaıdam bıligim...
Men qaıǵyrdym.
Týmastaı bop kógimnen endi aı, kúnim.
Ot alady qısapsyz jer baılyǵyn,
Jat alady esepsiz el baılyǵyn.
Sóz túsinse bas ızer quptaǵany,
Qansha aıtsań da uqpaıdy , uqpaǵany.
Áı, Úkimet qashanǵy jut bolady,
Qashan bizdiń Qazaqqa qut qonady ?
Jaýap ber?!
Áleýmettik jelide oqıǵaǵa ún qosqan aqyndar bir bul emes. Degenmen alǵashqy lekpen 12 oblysta bolǵan apatty jaǵdaıǵa beı-jaı qaramaı, janymen bolsa da elimen birge ekenin tanytqan aqyndar toby osyndaı boldy.
Symbat Naýhan
"Adyrna" ulttyq portaly
