الماتى وبلىسىندا سۋ دەڭگەيى تومەندەپ كەلەدى، دەپ حابارلايدى "ادىرنا" ءتىلشىسى.
كەشە ىلە اۋدانى بايكەنت اۋىلدىق وكرۋگىندەگى ۆوروشيلوۆ سۋ قويماسىنىڭ بوگەتى توپان سۋدان بۇزىلعان ەدى. تجد مالىمەتىنشە، 31 ناۋرىز ساعات 13:00-دە جاعداي تۇراقتالىپ، سۋ دەڭگەيى تومەندەگەن.
«تۇندە قاۋىپسىزدىك ماقساتىندا جاقىن ماڭداعى بايكەنت اۋىلىنان 28 ادام قاۋىپسىز جەرگە كوشىرىلدى. مەكتەپتە ولارعا ىستىق تاماق، جاتىن ورىن جانە باسقا دا قاجەتتى زاتتارمەن قامتاماسىز ەتىلدى. 31 ناۋرىز تۇسكى ساعات 12.00-دە ەۆاكۋاتسيالانعان ادامدار تۋىستارىنا كەتتى. اكىمدىك تاراپىنان وقيعا ورنىندا جۇمىس ىستەپ جاتقان اسكەريلەر مەن باسقا دا قىزمەتكەرلەرگە ىستىق تاماقتار تاراتىلدى. بوگەتتىڭ بۇزىلۋ سەبەبى تولىق جويىلعانشا، ۋچاسكەدە تاۋلىك بويى كەزەكشىلىك ۇيىمداستىرىلادى»، - دەپ حابارلادى الماتى وبلىسى اكىمدىگىنىڭ ءباسپاسوز قىزمەتى.
سۋ تاسقىنىنان قازا تاپقان قۇرباندار مەن زارداپ شەككەندەر جوق. توتەنشە جاعداي دەپارتامەنتى اپات تۋىنداعان جاعدايدا ادامدار قاراوي اۋىلىنداعى № 49 جانە № 18 ورتا مەكتەپتەرىنە ەۆاكۋاتسيالاناتىنىن ايتادى.
«تارتىلعان كۇشتەر جانە قۇرالدارمەن 250 توننا ينەرتتى ماتەريال، 3 000 قاپشىقپەن جاعانى نىعايتۋ جانە توسەۋ جۇمىستارى جۇرگىزىلۋدە. ينجەنەرلىك تەحنيكامەن بوگەت ساڭىلاۋىن بەتون كونسترۋكتسيالارى، توپىراقپەن جابۋ جۇمىستارى جۇرگىزىلۋدە. توتەنشە جاعدايدى جويۋعا الماتى وبلىسى تجد، جاو، پد، 28237, 2466 اسكەري بولىمدەرى، رجقج، رەق جانە گاز قىزمەتىنەن بارلىعى 300-گە جۋىق قىزمەتكەر مەن 70-كە جۋىق تەحنيكا جۇمىلدىرىلدى»، - دەپ حابارلادى الماتى وبلىسى تجد-نىڭ ءباسپاسوز قىزمەتى.
