ۇلىتاۋ وبلىسى اۋماعىندا سۋ تاسقىنى كەزەڭى ءبىرشاما كۇردەلەنگەنىمەن، شتاتتىق رەجيمدە وتۋدە. بۇل تۋرالى وبلىس اكىمدىگى حابارلادى.
وبلىستا كۇن رايىنىڭ كۇرت جىلىنۋى, قاردىڭ جىلدام ەرۋى سالدارىنان گيدرولوگيالىق احۋال 25 ناۋرىزدان كۇردەلەنە باستاعان. قازىرگى تاڭدا جاعداي تولىق باقىلاۋدا. جەرگىلىكتى اتقارۋشى ورگاندار مەن توتەنشە جاعدايلار دەپارتامەنتى، پوليتسيا قىزمەتكەرلەرى تاۋلىك بويى كەزەكشىلىك اتقارىپ، قاۋىپتىڭ الدىن الۋدا.
دەر كەزىندە قولعا الىنعان الدىن الۋ شارالارىنىڭ ارقاسىندا وبلىستىڭ جاڭاارقا، ۇلىتاۋ اۋداندارىنداعى 66 تۇرعىن ءۇي مەن 9 قىستاقتى سۋ باسۋ قاۋپى سەيىلدى. قۇتقارۋ، الدىن الۋ شارالارى بارىسىندا بارلىعى 108 ادام، ونىڭ ىشىندە 56 بالا ەۆاكۋاتسيالاندى. قاۋىپسىزورىنعا 349 باس ءىرى قارا, 858 باس ۇساق مال جانە17 باس جىلقى مالى ايدالدى.
«وبلىس اۋماعىندا قۇتقارۋ جۇمىستارىن ۇيلەستىرۋ ءۇشىن جەدەل شتاب جۇمىس ىستەپ تۇر. وسى ۋاقىت ىشىندە وبلىستىق, اۋداندىق ماڭىزى بار 3 اۆتوكولىك جولىنىڭ كەيءبىر ۋچاسكەلەرءىن سۋ شايۋ وقيعاسى تىركەلءدى. قازىر اتالعان جول ۋچاسكەلەرى قالپىنا كەلتىرىلۋدە. جالپى، وڭىردە رەسپۋبليكالىق، وبلىستىق ماڭىزى بار نەگىزگى جولداردا قاتىناس ۇزىلگەن جوق، ەلەكتر، جىلۋ جەلىلەرى، باسقا دا تىرشىلىك قامتاماسىز ەتۋ نىساندارى شتاتتىق رەجيمدە جۇمىس ىستەپ تۇر»، - دەيدى وبلىس اكىمىنىڭ ورىنباسارى ۇلانتاي ۇسەنوۆ.
اكىمدىكتەر مەن توتەنشە جاعدايلار قىزمەتىنىڭ سۋ بوگەۋ جۇمىستارىنا وڭىردەگى كاسىپورىندار مەن بيزنەس نىساندارى، ەرىكتىلەر دە قول ۇشىن سوزۋدا.
وبلىس ورتالىعىنداعى كەڭگىر سۋ قويماسى 29 ناۋرىزدا قار سۋىنىڭ ەسەبىنەن جوبالىق قۋاتىنا تولدى. ارتىق سۋ ارنايى شليۋز (شاندور) ارقىلى كەڭگىر وزەنىنە اعىزىلۋدا.
