رەسەي مەملەكەتتىك دۋماسىنىڭ سامارا وبلىسىنان سايلانعان دەپۋتاتى ميحايل ماتۆەەۆ تاجىكستانمەن ۆيزالىق رەجيم ەنگىزۋ قاجەتتىگىن مالىمدەدى، دەپ حابارلايدى «ادىرنا» ءتىلشىسى كوممەرسانتقا سىلتەمە جاساپ.
ساياساتكەردىڭ ايتۋىنشا، كروكۋس سيتي حوللداعى لاڭكەستىك ارەكەت باقىلاۋسىز مەملەكەتتىك كوشى-قوننىڭ قانداي جاعدايعا اكەلەتىنىن كورسەتتى.
«ارنايى اسكەري وپەراتسيا اياسىندا رەسەي بيلىگى قاجەتسىز ەلەمەنتتەردىڭ ەلگە كىرۋىنە جول بەرمەۋى كەرەك. سوندىقتان تاجىكستانمەن، مۇمكىن، ورتالىق ازيانىڭ كەيبىر باسقا مەملەكەتتەرىمەن ۆيزالىق رەجيمدى ەنگىزۋ قاجەت. بۇل شەتەلدىكتەر ەندى رەسەيگە مۇلدەم كىرە المايدى دەگەندى بىلدىرمەيدى. سونداي-اق ەڭبەك كوشى-قونىن قاتاڭ باقىلاۋعا الۋ كەرەك. بۇگىندە تاجىكستاننىڭ كەز كەلگەن تۇرعىنى پويىز بيلەتىن ساتىپ الىپ، رەسەيگە كەلە الادى. ەگەر ميگرانتتاردىڭ كىرۋىنە شەكتەۋ قويماي، تسيفرلىق باقىلاۋدى ەنگىزبەسەك، پوليتسيا مەن بارلاۋ قىزمەتتەرى قارسى كۇرەس جۇرگىزە المايدى»،—دەدى ول.
ەسكە سالايىق، بۇعان دەيىن وپپوزيتسيا جەتەكشىسى الەكسەي ناۆالنىي ورتالىق ازيا ەلدەرىمەن ۆيزالىق ءتارتىپ ەنگىزۋدى ۇسىنعان ەدى. ول ميگرانتتاردىڭ باسىم بولىگى رەسەيگە تمد ەلدەرىنەن كەلەتىنىن ايتىپ، ولاردىڭ جۇمىسپەن قامتىلۋى ەلدەگى ەڭبەك ونىمدىلىگىنىڭ ارتۋىنا اكەلمەيتىنىن مالىمدەگەن.
