قىلمىستىق ءىستى تەرگەۋ بارىسىندا ۇستالعانداردىڭ تورتەۋى دە ۇيقاماقتا بولعان، بىراق ونى وتەۋ ەرەجەسىن بۇزعان
الماتى پوليتسيا دەپارتامەنتىنىڭ قىزمەتكەرلەرى قازاقستان اۋماعىندا ەكسترەميستىك ۇيىم دەپ تانىلعان دۆك* قوزعالىسىنىڭ ءتورت بەلسەندىسىن قاماۋعا الدى.
ولار قالادا رۇقسات ەتىلمەگەن ميتينگ وتكىزۋگە دايىندالعان، دەپ حابارلادى پوليتسيا.
قىلمىستىق ءىس بويىنشا ءتورت ايىپتالۋشى: جازيرا دەمەۋوۆا، وكسانا شەۆچۋك، گۇلنار جاۋكەروۆا، ءانۋار اشىراليەۆ ۇيقاماقتا بولۋ ەرەجەسىن بۇزىپ، بيلىك وكىلدەرى رۇقسات بەرمەگەن ميتينگىگە دايىندالۋدى جالعاستىرىپ جاتقانى تۋرالى اقپارات شىققاننان كەيىن بۇلتارتپاۋ شاراسى وزگەرتىلدى.
"جەدەل جانە تەرگەۋ ءىس-شارالارى كەشەنىن وتكىزۋ كەزىندە بۇل اقپارات راستالدى. جوعارىدا اتالعان ازاماتتاردىڭ، سونداي-اق تىيىم سالىنعان ۇيىمنىڭ باسقا دا قاتىسۋشىلارىنىڭ تۇرعىلىقتى جەرىن ءتىنتۋ كەزىندە ەكسترەميستىك مازمۇنداعى پلاكاتتار مەن پاراقشالار، تۇتىندەتۋ قۇتىلارى، داۋىس زورايتقىشتار، اەروزول سىر بۇرىككىش باللوندار، كومپيۋتەرلەر، بايلانىس قۇرىلعىسى تابىلدى. سونداي-اق، ءىرى كولەمدە اقشا تاركىلەندى، تەرگەۋشىلەردىڭ بولجامىنشا، بۇل قارجىنى ولار زاڭسىز اكتسيانى ۇيىمداستىرۋ ماقساتىندا جۇمساماق بولعان", - دەپ جازىلعان الماتى پوليتسيا دەپارتامەنتى ءباسپاسوز قىزمەتىنىڭ رەسمي حابارلاماسىندا.
ۆەدومستۆو سونداي-اق، بۇعان دەيىن قاماۋعا الىنعانداردىڭ ارقايسىنا ەكسترەميستىك ۇيىمنىڭ قىزمەتىنە قاتىسۋدىڭ سالدارى ءتۇسىندىرىلىپ، پروفيلاكتيكالىق اڭگىمە جۇرگىزىلگەنىن حابارلادى.
"قازىرگى تاڭدا وسى قىلمىستىق ءىس بويىنشا تەرگەۋ شارالارى جالعاسۋدا. كەيبىر كۇدىكتىلەر كىناسىن مويىندادى. سونىمەن قاتار تىيىم سالىنعان ەكسترەميستىك قوزعالىستىڭ باسقا قاتىسۋشىلارىنا قاتىستى اكىمشىلىك شارالار قابىلداندى", - دەپ حابارلادى پوليتسيا.
ۇستالعاندارعا قاتىستى سوتقا دەيىنگى تەرگەۋ قىلمىستىق كودەكستىڭ 405-بابىنا (ەكسترەميستىك ۇيىمنىڭ قىزمەتىنە قاتىسۋ) سايكەس جۇرگىزىلۋدە.
Sputnik
